Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 59

Amiravo Axexe Yaawo Yaamwiiwelenle Yehova

Amiravo Axexe Yaawo Yaamwiiwelenle Yehova

Okathi Nabukhodonosori aavanre awe makhulupale oYuda ni aaroiha oBabilonia, aahimuthanla mukhulupale mmosa aitthaniwa Axipenazi wira aakhapeleleke. Nabukhodonosori aahimuruma Axipenazi wira aathanle amiravo ooreera ni ooratta. Amiravo awo yaahaana wiixuttihiwa mpakha iyaakha 3 wira ekhale makhulupale a oBabilonia. Awo yaahaana wiixutta osoma, olepa ni olavula nttaava na oBabilonia. Mwene aahiruma-tho wira evahiweke eyoolya emosaru aalya awe mwene ni makhulupale awe. Mwa amiravo yaathanliwe, aahikhala Daniyeli, Hananiya, Misayeli ni Azariya. Vano Axipenazi aahaavaha masina makina a oBabilonia. Masina aya taala: Baltasari, Xadraki, Mexaki, ni Abedi-Nego. Niireke wiixuttihiwa nno waahiwiiriha ohiya omurumeela Yehova?

 Amiravo ale axexe yaahilakela omwiiwelela Yehova. Yaanisuwela wira yaahaana okhootta eyoolya ya mwene okhala wira Nlamulo na Yehova naanikhoottiha eyoolya ekina mwene aalya awe. Nto awo yaahimuleela Axipenazi wira: ‘Xontte muhinivaheke eyoolya ya mwene’. Vano Axipenazi aahiwaakhula so: ‘Nyuwosa mwaahilyeeke eyoolya ya mwene ni mootta-vale munakhala ntoko munoowereiwa, mwene onookiiva!’

Daniyeli aahiphwanya miruku. Vano aahimuleela mulipa oolipelela wira: ‘Munivaheke mathaapa a makukhu ni maasi paahi. Nuumala-vo, mulikanyihe irutthu sahu ni irutthu sa amiravo akina anlya yoolya ya mwene’. Mulipa oolipelela ole aaheemya.

Nuuvira mahiku 10 yeehereriwaka, Daniyeli ni apatthani awe araru yaari ooreera ni ooneneva waavikana amiravo otheene. Yehova aahihakalala okhala wira amiravo ale yaahimwiiwelela. Owo aahinvaha Daniyeli miruku wira osuweleke otaphulela sooloha.

Vaavirale aya iyaakha 3, Axipenazi aahaaroiha amiravo otheene wa Nabukhodonosori. Mwene aahilavula ni khula mmiravo, ni aahiweha wira Daniyeli, Hananiya, Misayeli, ni Azariya, yaari atthu a ankhili ni oosuwela, waavikana amiravo otheene. Tivo mwene aahaathanla amiravo ale 4 wira emurumeeleke. Nto khula mwaha muulupale, mwene aanaavekela miruku amiravo ale axexe. Yehova aahaavaha miruku ni ankhili waavikana asuweli ootheene ni anahako a omwene ole.

Nnaamwi yaaroihiwe elapo ekina yoorakamela, Daniyeli, Hananiya, Misayeli ni Azariya, khiyaaliyanle wira yaari atthu a nloko na Yehova. Niireke nyuwo munrowa omuupuwelaka Yehova hata axipaapa anyu erakamenle ene?

“Ahikhalé onothanyani mwaha w’okhala mmiravo: tivó, mwakhalele aKristu nthonyeryo norera ni molumo anyu ni mwettelo woloka n’uphenta ni wamini ni wisumaliha wanyu”.​—1 Timótheyo 4:12