Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Mwiixutte Myaha sa Biibiliya

 YOOSOMA 66

Ézira Aahiixuttiha Nlamulo na Muluku

Ézira Aahiixuttiha Nlamulo na Muluku

Saahivira iyaakha sowiiraka 70 okhuma vaavale aIsarayeli anceene yaatthikenle aya oYerusalemu. Masi akina nlelo yaakhala ipantte soovirikana sa Olamulelo wa oPersia. Mmosa a yaawo aari Ézira, yoowo aari namukuttho aixuttiha Nlamulo na Yehova. Ézira aahiiwa wira aIsarayeli yaahihiya weettela Nlamulo nlo, nto aahuupuwela orowa waakhaliherya. Mwene Artaserse aahimuleela wira: ‘Muluku ohookhalihani musuweli wira mwiixuttiheke Nlamulo nawe. Muroweke, nave mwaakuxeke atthu otheene antthuna orowa ni nyuwo’. Ézira aahaathukumanya atthu otheene yaaphavela otthikela oYerusalemu. Awo yaahinvekela Yehova wira aakhaliherye mukwaha aya, nuumala-vo yaahirowa.

Nuuvira myeeri 4, awo yaahiphiya oYerusalemu. Makhulupale yaahimuleela Ézira wira: ‘AIsarayeli aamutthekela Yehova ni ahaathela athiyana anaakokhorela amuluku eethiru’. Exeeni Ézira aapanke awe? Owo aahikokhora ohoolo wa atthu, ni aahinvekela Yehova oriki: ‘Khoo Yehova, nyuwo moopaka itthu sinceene mwa mureerelo ahu, masi hiyo ninnootthekelani’. Atthu yaahimuleela Yehova soottheka saya, masi yaahivikaniha opaka itthu soohiloka. Ézira aahaathanla makhulupale ni aphuki wira aphuke myaha iyo. Nuuvira myeeri miraru, atthu ootheene yaale yahaamukokhorela Yehova, yaahoomoliwa.

Vano saahivira iyaakha 12. Muhina mwa okathi owo saahilokiheriwa ixiri sa oYerusalemu. Nto Ézira aahaathukumanya atthu wira asome Nlamulo na Muluku. Nuumala Ézira okhunula eliivuru, atthu otheene yaaheemela. Nto owo aahimuttottopela Yehova, vano atthu otheene yaahiteexerya matata aya musulu yooniheryaka waakhulela. Moottharelana, Ézira aahisoma ni aahitaphulela Nlamulo, nave atthu otheene yaahiwiriyana ni ephoole. Awo yaaheemererya wira yaahihiya-tho omwiiwelela Yehova, nto yaaninla. Mmeeloni mwaya, Ézira aahisoma-tho Nlamulo ohoolo wa atthu ale. Awo yaahoona wira yaahaana opaka Efesta ya Maxaxa. Moohipisa, yaahipacerya olokiherya efesta eyo.

 Efesta ele yaahiviriha mahiku 7. Nto atthu yaahihakalala ni omuxukhuru Yehova mwaha wa okhalana soolya sinceene. Khiyaatonko opakiwa Efesta ya Maxaxa sintoko ele okhuma mahiku a Yoxuwa. Yaavinre aya efesta ele, atthu yaahithukumana, nto Ézira aahilompa ohimyaka so: ‘Khoo Yehova, nyuwo moonikumiha weepotthani, mooneettiha moothakoni, ni moonivaha elapo ela yooreera. Masi nnaamwi muniirenle itthu iyo, hiyo noohiya owiiwelelani ikwaha sinceene. Nyuwo mwahaaruma maprofeta wira enilopole, masi hiyo naanikhootta waawiriyana. Nyuwo mwaanipixa murima. Khammuhononne natiri mwammanenle anyu Abrahamu. Vano ninnilapha wira okhuma olelo-vaava hiyo nnoowiiwelelakani’. Nuumala Ézira olavula masu awo, atthu yaahilepa yooleiherya aya vapapheloni, nto epaphelo eyo yaahitthittiwa ni makhulupale, aLevi, ni anamukuttho.

“Òreriwa toko t’ale anìwa molumo a Muluku, enettela”.​—Luka 11:28