Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 114: Wanikisa Wa Otakhala Wotheene

Mwaha 114: Wanikisa Wa Otakhala Wotheene

NYUWO munoona exeeni va? Aayo, anakhotto awenle ikhavalo sootteela. Masi nkawehani weiwo sinikhuma aya. Ikhavalo iyo sinitthimakasa sikhumaka wirimu mmeekuni! Sookhala tthiri ikhavalo wirimu?

Wiirimu, Yesu ori ntoko Mwene

Nnaari, iya khahiyo ikhavalo ineene. Hiyo ninnisuwela ela okhala wira ikhavalo khisinwerya otthyawa mmeekuni, khahiyo siiso? Masi Biibiliya onnihimya tthiri sa ikhavalo wirimu. Nyuwo munnisuwela mwaha aya onihimya awe siiso?

Nthowa noowi khalai ikhavalo saanivariheliwa muteko vanceene mukhottoni. Siiso Biibiliya oninleela sa atthu aneettiha ikhavalo akhumaka wirimu wira ooniherye wi Muluku ookhalana ekhotto yoowana ni atthu a mulaponi. Nyuwo munnisuwela moota siniihaniwa aya nipuro na ekhotto ela? Harmagedoni. Ekhotto eyo enrowa omala-maliha otakhala wotheene mulaponi.

Yesu ti Yoowo onrowa ohoolela mu owana nno mu ekhotto ela va Harmagedoni. Muupuweleke, Yesu ti yoowo Yehova omuthanlalya awe wira okhalee mwene a ekuvernu Awe. Nna ti nthowa naya Yesu owanrya awe ekorowa ya omwene. Nto ekatana onooniherya wira owo onrowa owiiva awanani otheene a Muluku. Nohaana okhala ootikinihiwa wira Muluku onrowa waanyaanya atthu otheene ootakhala?

Mutthikele oweha Mwaha 10. Nyuwo munoona exeeni vale? Aayo, Epula yuulupale ya Mutaaseke yeeyo yaapwetenxe atthu ootakhala. Tanii aakumihenrye Epula ele ya Mutaaseke? Yehova Muluku. Vano nwehee Mwaha 15. Exeeni eniiraneya vale? Sodoma ni Gomora onoohononiwa ni mooro yoowo onirumihiwa ni Yehova.

Murukunuwele Mwaha 33. Nwehee ele eniiraneya wa ikhavalo ni ikaaro sa ekhotto sa atthu a wEjiitu. Tanii iirinhe maasi wira arwe ni waamorela mootakhala awosa? Yehova. Owo aahipaka ela wira aakiherye nloko nawe. Nwehee Mwaha 76. Nyuwo munrowa woona vale wira Yehova onnihiya hataa nloko nawe, anaIsarayeli, nipwetexiwaka mwaha wa otakhala waya.

Siiso-nto, hiyo nihikhale ootikinihiwa wira Yehova onrowa waarumiha anakhotto awe a wirimu wira omala-malihe otakhala wotheene mulaponi. Masi nkuupuwelani enrowa aya otaphulela! Mukhunule epaaxina, nto nrowee niwehee.

Wisupulula 16:16; 19:11-16.



Makoho

  • Nthowa xeeni Biibiliya vanilavula awe sa ikhavalo wirimu?
  • Tinivi nsina na ekhotto ya Muluku wa atthu ootakhala valaponi, nto yotthuna ya ekhotto ela tanii?
  • Valataratoni, tanii Yoowo onrowa okhala muhooleli a owana, nthowa xeeni owanrya awe ekorowa, nto ekatana awe enitaphulela exeeni?
  • Ntthikelaka oweha elatarato ya Mwaha 10 ni 15, nthowa xeeni vahinitthuneya ahu okhala ootikinihiwa wira Muluku onrowa waanyaanya atthu ootakhala?
  • Moota xeeni Miyaha sa 33, 36, ni 76 sinooniherya aya wira Muluku onrowa waanyaanya atthu ootakhala hataa akhuwelaka wira animukokhorela owo?

Makoho oowuncererya

  • Mmusome Wisupulula 19:11-16.

    Moota xeeni Soolempwa vaniiwanyeiha aya wira Yesu Kristu towenle ekhavalo yootteela? (Wis 1:5; 3:14; 19:11; Yes 11:4)

    Moota xeeni onaanihiwa wa nlaya na Yesu ni ephomee enttittimiherya aya oxintta wawe wa kuruu ni woomalela? (Wis 14:18-20; 19:13; Yes 63:1-6)

    Tanii mowooneya aniheliwa muhina mu anakhotto animutthara Yesu owenle ekhavalo awe yootteela? (Wis 12:7; 19:14; Mat 25:31, 32)