Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 110: Timooteyo—namakhaliherya Musyaa A Paulo

Mwaha 110: Timooteyo—namakhaliherya Musyaa A Paulo

MMIRAVO owo oninweha anyu ori ni murummwa Paulo ti Timooteyo. Timooteyo onikhala ni amusi awe oLiistira. Maama awe oniihaniwa Eunisi ni piipi awe ti Loide

Ela ekwaha ya neeraru yeeyo Paulo enixukurya awe oLiistira. Wanipacerya wene, moophiyeryaka eyaakha emosaa vahinatthi, Paulo ni Baarnaba yaahirwa va mmukwaha aya woolaleerya. Nto vano Paulo ootthikela-tho ni mpatthani awe Sila.

Paulo ni Timooteyo

Nyuwo munnisuwela yeeyo Paulo enimuhimeerya awe Timooteyo? ‘Nyuwo munniphavela otakaahana ni Sila ni miyo?’ owo onnikoha. ‘Hiyo nanwerya ovarihela muteko nikhaliheryo nanyu wira naalaleerye atthu mapuro oorakamela.’

Timooteyo onaakhula wira, ‘aayo, miyo kinniphavela orowa.’ Siiso mowaakuveya vattuli vaya Timooteyo onnaahiya amusi awe ni onarowa ni Paulo ni Sila. Masi nihinatthi wiixutta sa mukwaha aya, nrowee niwehee yeeyo enimwiiraneela Paulo. Soovira iyaakha 17, ovenyerya vaavale Yesu vaamukumelenlya awe owo mu ephiro ya oDamaasiko.

Muupuweleleke, Paulo aarwiiye oDamaasiko wira aahaaxe awiixutti a Yesu, masi vano owo mwaneene mwiixutti! Vattuli vaya anyokhani akina anuupuwelela omwiiva Paulo okhala wira khaniphavela wiixuttiha wawe voohimya sa Yesu. Masi awiixutti annimukhaliherya Paulo wira woopowe. Awo annimuhela muttankani ni anamukuruxerya otaa wa exirii ya muttetthe.

Vattuli vaya Paulo onirowa wAntiyokiya wira alaleerye. Opuro yoola atthareli a Yesu onipacerya aya wiihaniwa okhala maKristau. Nuumala vo Paulo ni Baarnaba annirumihiwa okhuma wAntiyokiya mmukwaha woolaleerya arowaka mu ilapo soorakamela. Imosaa sa mittetthe seiyo awo sinixukurya aya ti Liistira, muttetthe wa Timooteyo.

Vano, moophiyeryaka mwaakha mmosaa vattuli vaya, Paulo orii-tho oLiistira mmukwaha awe wa nenli. Vaavo Timooteyo vanikhuma awe ni Paulo ni Sila, nyuwo munnisuwela weiwo anirowa aya? Nwehee maapha, ni nrowee niixutte sa mapuro makina a yaawo.

Wanipacerya, awo anirowa wIkonio nipuro nowaattamela, nuumala vo muttetthe wa nenli oniihaniwa Antiyokiya. Vattuli vaya awo anneetta mukwaha woorowa oTrowade, nuumala vo oFilipi, oTesalonika ni oBereya. Nyuwo munniweha Athena vamaaphani? Paulo onnilaleerya vale. Vattuli vaya annimaliha mwaakha mmosaa ni nuusu alaleeryaka muKorinto. Wanikisa waya anneemela vakhaani mu Eefeso. Nuumala vo annitthika ni ekalawa arowaka oKesareya, ni anneetta mukwaha woorowa wAntiyokiya, weiwo Paulo onimaka awe.

Siiso Timooteyo onneetta mukwaha wa ikiloomo imiya imiya sene omukhaliheryaka Paulo olaleerya “ihapari sooreera” ni wira opacerihe miloko sinceene sa eKristau. Vaavo nyuwo vaninnuwa anyu, munrowa okhala murumeyi oororomeleya a Muluku ntoko Timooteyo?

Miteko 9:19-30; 11:19-26; miruu 13 mpakha 17; 18:1-22.

Maapha

1. Roma; 2. Malta; 3. Bereya; 4. Tesalonika; 5. Korinto; 6. Filipi; 7. Athena; 8. Kereta; 9. Trowade; 10. Eefeso; 11. Mileto; 12. Kolosi; 13. Antiyokiya; 14. Ikonio; 15. Listira; 16. Kiipero; 17. Antiyokiya; 18. Kesareya; 19. Yope; 20. Damaasiko; 21. Yerusalemu; 22. Ephareya yuulupale (Mediterraaneo)



Makoho

  • Mmiravo owo valataratoni tanii, onikhala woowi, ni nsina na amamawe ni apiipi awe tanii?
  • Timooteyo onaakhula sai vaavo Paulo vaninvekela awe akhala wira onniphavela otakaahana ni Sila ni Paulo mu waalaleerya atthu ootteiwene?
  • Ti woowi atthareli a Yesu onipacerya aya wiihaniwa okhala maKristau?
  • Nuumala Paulo ni Baarnaba okhuma wAntiyokiya, mittetthe xeeni sikina sinixukurya aya?
  • Timooteyo onimukhaliherya sai Paulo, nto nikoho xeeni yaareerela aya amiravo olelo wiikoha mmensaya?

Makoho oowuncererya

  • Mmusome Miteko 9:19-30.

    Moota xeeni murummwa Paulo oonihenrya awe ephoole vaavo vaakumanne awe ni ovaanyihiwa wa ihapari sooreera? (Mit 9:22-25, 29, 30; Mat 10:16)

  • Mmusome Miteko 11:19-26.

    Moota xeeni yoohimmwa eri mMiteko 11:19-21, 26 enooniherya aya wira munepa wa Yehova yoolakiherya ni yoothoonyerya ya muteko woolaleerya?

  • Mmusome Miteko 13:13-16, 42-52.

    Moota xeeni Miteko 13:51, 52 sinooniherya aya wira awiixutti khiyeemerenrye wira ovaanyihiwa waatteettheihe? (Mat 10:14; Mit 18:6; 1 Ped 4:14)

  • Mmusome Miteko 14:1-6, 19-28.

    Moota xeeni masuu oowi ‘yaahaaveleela w’Apwiya’ annikhaliherya aya ovukula soothananiha siri sotheene soohireerela vaavo vaneixuttiha ahu a niinano? (Mit 14:21-23; 20:32; Yoh 6:44)

  • Mmusome Miteko 16:1-5.

    Moota xeeni Timooteyo weemererya wira othikiliwe onttittimiherya aya otthuneya waya wiira ‘itthu iya sotheene mwaha w’Ehapari Yooreera’? (Mit 16:3; 1 aKor 9:23; 1 aTes 2:8)

  • Mmusome Miteko 18:1-11, 18-22.

    Miteko 18:9, 10 onooniherya exeeni voohimya sa Yesu wiirela wawe mpantta mu ohoolela muteko wa olaleerya, ni nroromelo xeeni ninnivaha aya olelo? (Mat 28:20)