Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 109: Pedru Onimuxukurya Kornelio

Mwaha 109: Pedru Onimuxukurya Kornelio

OLE eemenle vale ti murummwa Pedru, ni ale ari ottuli wawe ti amosaa a apatthani awe. Masi nthowa xeeni mulopwana owo vanimukhoromela awe Pedru? Aahaana opaka eyo? Nyuwo munnimusuwela tanii owo?

Pedru onikumana ni Kornelio

Mulopwana owo Kornelio. Owo mukhulupale aanakhotto ooRoma. Kornelio khonimusuwela Pedru, masi aahileeliwa omulattula wira orowee owannyawe. Nrowee noone moota ela siiranen’ya aya.

Atthareli oopacerya a Yesu yaari aYuda, masi Kornelio khahiyo muYuda. Hataa vari siiso, owo onnimphenta Muluku, onnivekela wa owo, ni onnipaka itthu sinceene moowaareerela murima atthu. Saana, makaaripi omosaa nlaikha nimosaa ninnikhumelela wa owo ni khiyahimya so: ‘Muluku oohakalala ni nyuwo, nto onrowa waakhula mavekelo anyu. Mwaarumihe alopwana akina wira amphwanye mulopwana oniitthaniwa Pedru. Owo onikhala oYope mu empa ya Simoni, yoowo onikhala muxerexere mwa ephareya.’

Saana, niinanoru Kornelio onaaruma alopwana akina wira amphwanye Pedru. Nihiku noottharelana, vaavo alopwana vanaattamela aya oYope, Pedru orii owannyawe Simoni mu empa ya vasuluu. Vale Muluku onimwiiriha Pedru wuupuwelaka wira owo onimoona nansoole muulupale onikhuruwa okhumaka osuluu. Munansooleni sookhala inamaa sa mithinto sotheene. Moovarihana ni nlamulo na Muluku, inamaa iya saari soohiloka wira sikhuuriweke, nto hataa vari siiso nsuu nle nnihimya so: ‘Pedru, nvenyee. Mwiive ni mukhuureke.’

‘Nnaari!’ onnaakhula Pedru. ‘Nkitonko okhuura etthu yoohiloka.’ Masi nsuu ninnimuleela Pedru wira: ‘Muttharuwe wiitthana okhala yoohiloka yeeyo Muluku vano onihimya awe okhala yooloka.’ Ela enniiraneya ikwaha tthaaru. Nlelo Pedru oryeene ootikinihiwa voohimya sa yootaphulela aya, alopwana yaarummwale ni Kornelio anniphiya vatthokoni vale ni anamukohererya Pedru.

Pedru onnikhuruwa ni onahimya wira: ‘Miyo ka mutthu yoowo nyuwo munimphavela anyu. Nyuwo murweenleni?’ Vaavo alopwana awo vanitthokiherya aya wira nlaikha nimosaa naahimuhimeerya Kornelio wira omulattule Pedru orowa owannyawe, Pedru onneemererya orowa hoothe. Nihiku noottharelana Pedru ni apatthani awe annivenya wira yamuxukurye Kornelio oKesareya.

Kornelio aahithukumanya poromosa emusi awe ni apatthani awexa. Vaavo Pedru vanrwa awe, Kornelio onnikumana n’uwo. Owo onnimorela vathii ni onuuramela inawu sa Pedru, ntoko siniweha anyu va. Masi Pedru onihimya so: ‘Mweemele; miyo ka mutthu paahi.’ Aayo, Biibiliya onooniherya wira khahiyo vooloka omukhoromela ni omukokhorela mutthu. Hiyo nohaana omukokhorela Yehova paahi.

Vano Pedru onaalaleerya otheene yaale athukumanne. ‘Kinnoona wira Muluku onniweemererya atthu otheene yaale aniphavela omurumeela,’ onnihimya Pedru. Nto nlelo oriki olavula, Muluku onnirumiha munepa awe wootteela, nto atthu annipacerya olavula mu ilavulelo soovirikana. Ela ennaatikiniha awiixutti aYuda yaawo arwiiye ni Pedru, okhala wira awo yuupuwela wira Muluku oniweemererya aYuda paahi. Siiso ela enniwiixuttiha awosa wira Muluku khonaathanla atthu a nloko nri notheene okhala noolokexa aahiiso nootthuneya vanceene wa Muluku ovikana nloko nikina na atthu. Ela khahiyo etthu yooloka wa otheene ahu wira nuupuweleleke?

Miteko 10:1-48; 11:1-18; Wisupulula 19:10.



Makoho

  • Mulopwana owo onuuramela vathii valataratoni va tanii?
  • Nlaikha nnimuleela exeeni Kornelio?
  • Exeeni Muluku enimwiiriha awe Pedru woona vaavo vary’awe owannyawe Simoni oYope mu empa ya vasuluu?
  • Nthowa xeeni Pedru vanimuleela awe Kornelio wira owo khaatthuneya omuuramela ni omukokhorela?
  • Nthowa xeeni awiixutti aYuda ari ni Pedru ary’aya ootikinihiwa?
  • Etthu xeeni yootthuneya yaareerela ahu wiixutta wa Pedru mu omuxukurya Kornelio?

Makoho oowuncererya

  • Mmusome Miteko 10:1-48.

    Anooniherya exeeni masuu a Pedru aniphwanyaneya mMiteko 10:42 voohimya sa muteko woolaleerya ihapari sooreera sa Omwene? (Mat 28:19; Mar 13:10; Mit 1:8)

  • Mmusome Miteko 11:1-18.

    Muupuwelelo xeeni oonihenrya awe Pedru vaavo yoohoolela ya Yehova voohimya sa Amalapo vaakhanle aya yoowooneya, nto ninwerya sai otthara ntakiheryo nawe? (Mit 11:17, 18; 2 aKor 10:5; aEf 5:17)