Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 108: Mu Ephiro Enirowa Odamaasiko

Mwaha 108: Mu Ephiro Enirowa Odamaasiko

NYUWO munnimusuwela tanii ola ommaathale vathii? Ola ti Saulo. Muupuweleleke, owo ti yoole aawehererya malaya aalopwana yaale yanvonyakasa maluku Siteefano. Nkawehani omwaleya iwo onaarya! Exeeni eniiraneya?

Vattuli va wiiviwa Siteefano, Saulo onnihoolela mu waalupattha atthareli a Yesu wira aahaaxe. Owo onirowa empa ni empa ekhw’aya ni onaapurulela otaa ni waarihela awosa mukhatteya. Anceene a awiixutti annitthyawela mittetthe sikina ni anapacerya olaleya iwe “ihapari sooreera.” Masi Saulo onirowa mittetthe sikina wira aaphwanye atthareli a Yesu. Vano orii mmukwaha awe woorowa oDamaasiko. Masi, oryeene mphironi, ela ti etthu yootikiniha yeeyo eniiraneya:

Mootutuxerya omwaleya onikhuma musuluu onnivarela moomurukurerya Saulo. Owo onnimorela vathii, ntoko siniweha ahu va. Nuumala vo nsuu nnihimya so: ‘Saulo, Saulo! Xeeni nyuwo munikilupattha anyu?’ Alopwana yaawo ari ni Saulo anniweha omwaleya ni anniiwa oruma wa nsuu, masi khanwerya wiiwexexa enihimmwa.

Omwaleya onnimwiiriha Saulo ohoona

‘Pwiya, nyuwo tanii?’ Saulo onnikoha.

‘Miyo ka Yesu, yoowo nyuwo munimulupattha anyu,’ nsuu ninnihimya. Yesu onnihimya ela okhala wira vaavo Saulo vanaalupattha awe atthareli a Yesu, Yesu onoona ntoko wira tonilupatthiwa owo mwaneene.

Vano Saulo onikoha oriki: ‘Pwiya, miyo kipake exeeni?’

‘Nvenyee ni murowee oDamaasiko,’ onnihimya Yesu. ‘Iwe nyuwo munrowa oleeliwa yeeyo munitthuneya anyu opaka.’ Vaavo Saulo vanivenya awe ni okhunula maitho awe, owo khonwerya woona etthu. Owo khonoona! Siiso alopwana arina awe anninvarelela ntata ni anamuhoola arowaka oDamaasiko.

Vano Yesu onnilavula ni mmosaa a awiixutti awe oDamaasiko, oriki: ‘Nvenyee, Ananiya. Murowee ephiro eniihaniwa Yowookowa. Mu empa ya Yuda mwamphavelase mulopwana oniihaniwa Saulo. Miyo koomuthanla wira okhalee murumeyi aka a vameekh’aya.’

Ananiya onniiwelela. Vaavo vanikumana awe ni Saulo, owo onnimunxaatherya matata awe ni onahimya oriki: ‘Pwiya ookiruma wira muwerye woona vasyaa-tho ni musareye ni munepa wootteela.’ Niinanoru etthu emosaa enilikana ni maapaliwe ennikhuma mmaithoni mwa Saulo, nto owo onniwerya woona vasyaa-tho.

Saulo onnivariheliwa muteko mmukhalelo muulupale wira waalaleeryeke atthu a maloko manceene. Owo onnisuweliwa okhala murummwa Paulo, sa yoowo ninrowa ahu wiixutta sikina sinceene. Masi wanipacerya, nrowee niwehee yeeyo Muluku enimuruma awe Pedru wira opakee.

Miteko 8:1-4; 9:1-20; 22:6-16; 26:8-20.



Makoho

  • Saulo onipaka exeeni nuumala wiiviwa Siteefano?
  • Vaavo Saulo vary’awe mmukwaha awe woorowa oDamaasiko, etthu xeeni yootikiniha eniiraneya?
  • Yesu onimuleela Saulo opaka exeeni?
  • Soolakiherya xeeni Yesu oninvaha awe Ananiya, nto Saulo oniwerya sai woona vasyaa-tho?
  • Saulo onisuweliwa ni nsina xeeni, ni owo onivariheliwa sai muteko?

Makoho oowuncererya

  • Mmusome Miteko 8:1-4.

    Moota xeeni wuncerereya ottharatthariwa waaphwannye muloko wa niinano wa eKristau waavanrya aya muteko wira omwaramwarye waamini wa eKristau, ni etthu xeeni yoolikana eniiraneya okathi ola? (Mit 8:4; Yes 54:17)

  • Mmusome Miteko 9:1-20.

    Miteko xeeni miraruu seiyo Yesu suupulunlya awe wira ookhalana mmuupuweleloni wira Saulo opake? (Mit 9:15; 13:5; 26:1; 27:24; aRom 11:13)

  • Mmusome Miteko 22:6-16.

    Moota xeeni siniwerya ahu okhala ntoko Ananiya, ni nthowa xeeni ery’aya yootthuneya? (Mit 22:12; 1 Tim 3:7; 1 Ped 1:14-16; 2:12)

  • Mmusome Miteko 26:8-20.

    Moota xeeni Saulo okela wawe eKristau sinirumeela aya ntoko yoolipiha wa yaale athelanne ni mutthu oohiroromela olelo? (Mit 26:11; 1 Tim 1:14-16; 2 Tim 4:2; 1 Ped 3:1-3)