Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 106: Otaphuliwa Mukhatteya

Mwaha 106: Otaphuliwa Mukhatteya

NKAWEHANI nlaikha nna va nivarenle mukhora woohuleya wa ekhatteya. Alopwana yaawo nnaataphula aya arii arummwa a Yesu. Nrowee niwehee yeeyo eniiriha wira aheliwe mukhatteya.

Nlaikha ninwoopola arummwa

Ela yiiranen’ye paahi okathi wa vakhaani okhuma vaavale munepa wootteela waayiiheriwa awe wa awiixutti a Yesu. Nto ela ti etthu eniiraneya: Pedru ni Yohani anirowa mu empa ya Muluku muYerusalemu makaaripi. Vale, waattamela vamukhora, ookhala mulopwana yoowo aari oorakala okumi awe wotheene. Atthu annimuttukhulela va khuta nihiku wira owerye oveka esimola ya musurukhu wa atthu yaawo anikela mu empa ya Muluku. Vaavo owo vaninweha awe Pedru ni Yohani, oniveka esimola wira anvahe etthu. Arummwa anrowa opaka exeeni?

Awo anneemela ni ananweha mulopwana owo oohaawa. ‘Nkirina musurukhu,’ Pedru onnihimya, ‘masi miyo kinrowa woovahani yeeyo erina aka. Mu nsina na Yesu, nvenyee ni mweetteke!’ Pedru onnimukuxa mulopwana owo mu ntata nawe noolopwana, nto niinanoru onnitupha ni onavenyerya weetta. Vaavo atthu vaniweha aya ela, awo annitikinihiwa ni ohakalala vanceene mwaha wa mutikiniho ola wooreera.

‘Ela eniiraneya orweela mwa owerya wa Muluku, yoowo onvenxale Yesu mwaalipa-ookhwa, tivonto hiyo noopaka mutikiniho ola,’ onnihimya Pedru. Nlelo owo ni Yohani ariki olavula, ahooleli akina a itiini anniphiya. Awo arii oonanariwa mwaha woowi Pedru ni Yohani anaaleela atthu voohimya sa Yesu wira oovenxiwa mwaalipa-ookhwa. Siiso annaavara awosa ni waahela mukhatteya.

Nihiku noottharelana ahooleli a itiini annikhalana muthukumano muulupale. Pedru ni Yohani, vamosaa ni mulopwana yoowo anvoninha aya, anniruuhiwa. ‘Ni owerya waani nyuwo mupanke anyu mutikiniho ola?’ annikoha ahooleli a itiini.

Pedru onaaleela awosa wira ela yiiranen’ye orweela mwa owerya wa Muluku, yoowo onvenxale Yesu mwaalipa-ookhwa. Alipa a mukuttho khanisuwela yoopaka, aayo awo khanwerya ovaanyiha wira mwiiriira ola wootikiniha tthiri ohiiraneya. Siiso annaalopola arummwa wira ahilavule-tho voohimya sa Yesu, nto nuumala vo annaahiya arowaka.

Vaavo mahiku vanivira aya arummwa annivikaniha olaleerya voohimya sa Yesu ni waavoniha aretta. Ihapari voohimya sa mitikiniho iya sinnimwaramwareya. Siiso-nto hataa mittitthi sookhuma mu ipooma soomurukurerya Yerusalemu sinnaaruuha aretta wira arummwa yaavonihe. Ela enniwiiriha ahooleli a itiini okhalana nrima, siiso annaavara arummwa ni waahela mukhatteya. Masi khanikhala mme okathi munceene.

Ohiyu, nlaikha na Muluku ninnihula mukhora wa ekhatteya, ntoko nyuwo siniwerya anyu woona va. Nlaikha nnihimya wira: ‘Rowani ni mwakhale mu empa ya Muluku, ni nvikanihe olavula ni atthu.’ Mmeeloni mwaya voosiisu, vaavo ahooleli a itiini vanaarumiha aya alopwana wira yaakuxe arummwa mukhatteya, awo khakhanle. Vattuli vaya alopwana awo anaaphwanya yiixuttihaka mu empa ya Muluku ni annaaruuha mu esaala ya eSineedrio.

‘Hiyo nihoolamulani mwakuruu wira muhiixuttihe-tho voohimya sa Yesu,’ annihimya ahooleli a itiini. ‘Masi nyuwo moosarya muYerusalemu ni yowiixuttiha anyu.’ Arummwa annaakhula wira: ‘Hiyo nohaana omwiiwelela Muluku ntoko namalamulela ovikana atthu.’ Siiso annivikaniha nlelo wiixuttiha “ihapari sooreera.” Khahiyo nno ntakiheryo noolokexa wa hiyo wira ntthareleke?

Miteko miruu 3 mpakha 5.



Makoho

  • Exeeni enimwiiraneela Pedru ni Yohani makaaripi omosaa vaavo vanrowa aya mu empa ya Muluku?
  • Pedru onimuleela exeeni mulopwana oorakala, nto Pedru oninvaha etthu xeeni ya efaita enivikana musurukhu?
  • Nthowa xeeni ahooleli a itiini ary’aya oonanariwa, nto animwiiriha exeeni Pedru ni Yohani?
  • Pedru onaaleela exeeni ahooleli a itiini, nto yoolopola xeeni enaakhela aya arummwa?
  • Nthowa xeeni ahooleli a itiini anikhalela aya nrima, masi eniiraneya exeeni vaavo arummwa vanikuhiwa aya mukhatteya ekwaha ya nenli?
  • Arummwa anaakhula sai vaavo vaniruuhiwa aya mu esaala ya Sineedrio?

Makoho oowuncererya

  • Mmusome Miteko 3:1-10.

    Nnaamwi nihirina owerya wa opaka mitikiniho olelo, moota xeeni masuu a Pedru ari mMiteko 3:6 annikhaliherya aya ovaha efaita muhupi wa Omwene? (Yoh 17:3; 2 aKor 5:18-20; aFil 3:8)

  • Mmusome Miteko 4:1-31.

    Vaavo vanikumana ahu ni ovaanyihiwa mmuteko wa orummwa, mu ephiro xeeni nintthuneya ahu waatakiha annihu maKristau a eseekulu yoopacerya? (Mit 4:29, 31; aEf 6:18-20; 1 aTes 2:2)

  • Mmusome Miteko 5:17-42.

    Moota xeeni akina ahikhanle Anamoona, khalai ni mahiku ala, yoonihenrya aya oreera murima voohimya sa muteko woolaleerya? (Mit 5:34-39)