Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 105: Owehererya Muyerusalemu

Mwaha 105: Owehererya Muyerusalemu

ATTHU ala va arii atthareli a Yesu. Awo aamwiiwelela ni khukhala muYerusalemu. Nto nlelo otheene aya ariki owehererya poromosa, onyakula wuulupale onnisareya mpaani motheene. Oruma waya waalikana ntoko woopa wa epheyo ya ikuruu. Nto nuumala vo malumi a mooro annipacerya okhumela vasuluu va miruu sa khuta mmosaa a awiixutti. Nyuwo munniwerya woona mooro vasuluu va khuta mmosaa a yaawo? Sotheene iya sintaphulela exeeni?

Munepa wootteela wahaaphwanya awiixutti a eseekulu yoopacerya

Ola mutikiniho! Yesu ootthikela wirimu nto orii ni Tiithi awe, ni oniyiiherya munepa wootteela wa Muluku wa atthareli awe. Nyuwo munnisuwela yeeyo munepa ola oniwiiriha aya opaka? Otheene aya annipacerya olavula ilavulelo soovirikana.

Atthu anceene muYerusalemu anniiwa onyakula weiwo onlikana ni epheyo ya ikuruu, nto annoorwa wira yoone yeeyo eniiraneya. Atthu akina a yaawo anikhuma maloko makina, yaawo arwiiye va mwaha wa efesta ya Isarayeli ya Pentekoositi. Yootutuxerya xeeni enaakhela aya aletto ala! Awo anniwiiwa awiixutti alavulaka mu ilavulelo saya voohimya sa itthu sootikiniha seiyo Muluku sipanke awe.

‘Atthu ala otheene anikhuma oGalileya,’ aletto annihimya. ‘Moota xeeni, vanonto, wi awo arii oowerya olavula ilavulelo iya soovirikana sa ilapo seiyo hiyo sinikhuma ahu?’

Vano Pedru onneemela wira aatthokiherye awosa. Owo onnincererya nsuu nawe ni onaaleela atthu moota Yesu iiviwe awe ni wira Yehova onvenxa mwaalipa-ookhwa. ‘Vano Yesu orii wirimu mu ntata noolopwana na Muluku,’ onnihimya Pedru. ‘Nto owo ooyiiherya munepa wootteela waaleihenrya awe. Ti nthowa naya nyuwo muwenha anyu ni mwiiwalya anyu mitikiniho iya.’

Saana, vaavo Pedru vanihimya awe itthu iya, atthu anceene anniikhupanyerya vanceene voohimya sa seiyo siirihiwe Yesu. ‘Exeeni nintthuneya ahu opaka?’ awo annikoha. Pedru onnaaleela wira: ‘Nyuwo muntthuneya orukunuxa ikumi sanyu ni obatiziwa.’ Siiso mu nihiku nenne tthiri atthu oophiyeryaka 3.000 yaahibatiziwa ni anakhala atthareli a Yesu.

Miteko 2:1-47.



Makoho

  • Ntoko sinooniherya aya elatarato, exeeni eniwiiraneela atthareli a Yesu yaawo aniwehererya muYerusalemu?
  • Yootutuxerya xeeni aletto enaakhela aya oYerusalemu?
  • Pedru onaatthokiherya exeeni atthu awo?
  • Atthu anoona sai nuumala onwiriyana Pedru, nto exeeni enaaleela awe opaka?
  • Yaabatiziwe atthu akavii nihiku na Pentekoositi, na 33 E.C.?

Makoho oowuncererya

  • Mmusome Miteko 2:1-47.

    Masuu a Pedru ari mMiteko 2:23, 36 anooniherya sai wira aYuda otheene ntoko nloko yaahikhalana muritti mu okhwa wa Yesu? (1 Tes 2:14, 15)

    Moota xeeni Pedru aavanha awe ntakiheryo nooloka na otthokiherya orweela mwa Soolempwa? (Mit 2:16, 17, 29, 31, 36, 39; aKol 4:6)

    Wanipacerya Pedru aarumeelale sai “mihulelo s’omwene wa wirimu,” yeeyo Yesu yaamuleihenrya awe onvaha? (Mit 2:14, 22-24, 37, 38; Mat 16:19)