Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 104: Yesu Onitthikela Wirimu

Mwaha 104: Yesu Onitthikela Wirimu

MOOVIRA wa mahiku, Yesu oniixooniherya wa atthareli awe ikwaha sinceene. Ekwaha emosaa awiixutti oophiyeryaka 500 anninweha. Vaavo vanikhumela awe wa awosa, nyuwo munnisuwela yeeyo Yesu enaahimeerya awe? Omwene wa Muluku. Yehova oomurumiha Yesu mulaponi wira wiixuttihe sa Omwene. Ni onnivikaniha opaka ela hataa vattuli va ohihimuxiwa mwaalipa-ookhwa.

Yesu onitthikela wiirimu

Nyuwo munnuupuwela omwene wa Muluku exeeni? Aayo, Omwene orii ekuvernu yekeekhai ya Muluku wirimu, ni Yesu ti Yoowo Muluku omuthanlalya awe wira okhalee mwene. Ntoko siisaale siixuntta ahu, Yesu ohooniherya wira onrowa okhala mwene ooloka mu waalyiha ale oovoliwa etala, waavoniha aretta, ni hataa waattikiherya okumi atthu ookhwa!

Siiso, vaavo Yesu vanilamulela awe ntoko mwene wirimu mu iyaakha ekonto emosaa, elapo enrowa okhala sai? Aayo, elapo yotheene enrowa opakiwa okhala eparayiisu yooreera. Vale khivanrowa okhala-tho ikhotto, ecrime, iretta, nnakhala okhwa. Hiyo ninnisuwela wira ela ekeekhai okhala wira Muluku aapanke elapo wira ekhalee eparayiisu wira atthu ahakalaleke. Ti nthowa naya aapanke awe ejardim ya wEedeni wanipacerya. Ni Yesu onrowa ottittimiherya wira yeeyo Muluku enitthuna awe wanikisa waya yaakhwaniheriwe.

Vano okathi woophiya wira Yesu otthikele wirimu. Mmahiku 40 Yesu ohiixooniherya wa awiixutti awe. Siiso awo khanaaniherya wira owo mukumi-tho. Masi ohinatthi waahiya awiixutti awe owo onaaleela wira: ‘Mukhalee muYerusalemu mpakha nyuwo waakhela munepa wootteela.’ Munepa wootteela orii ikuruu soowerya sa Muluku, ntoko woopa wa epheyo, yoowo onrowa waakhaliherya atthareli awe wira apake yotthuna ya Muluku. Wanikisa waya, Yesu onihimya so: ‘Nyuwo munrowa olaleerya voohimya sa miyo mpakha mipantta soorakamelexa sa elapo.’

Nuumala Yesu ohimya ela, enniiraneya etthu yootikiniha. Owo onnipacerya owela orowaka wirimu, ntoko muniwerya anyu woona va. Nuumala vo neeku ninnimukhuneela ohinaaneya, ni awiixutti khanimoona-tho Yesu. Yesu onirowa wirimu, nto okhuma vaavale onnipacerya waalamulela atthareli awe mulaponi.

Awiixutti aniweha musulu

1 aKorinto 15:3-8; Wisupulula 21:3, 4; Miteko 1:1-11.



Makoho

  • Awiixutti akavi animoona Yesu mu ekwaha emosaa, nto onaaleela exeeni?
  • Omwene wa Muluku exeeni, nto onrowa okhala sai okumi valaponi vaavo Yesu vanilamulela awe ntoko Mwene mu iyaakha ekonto emosaa?
  • Yesu oniixooniherya mmahiku makavii wa awiixutti awe, masi vano okathi woowi Yesu opake exeeni?
  • Ohinatthi waahiya awiixutti awe, Yesu onaaleela opaka exeeni?
  • Exeeni eniiraneya valataratoni va, ni nthowa xeeni Yesu ohinooneya awe-tho?

Makoho oowuncererya

  • Mmusome 1 aKorinto 15:3-8.

    Nthowa xeeni murummwa Paulo aawerya awe olavula moororomeleya sa ohihimuwa wa Yesu, nto itthu xeeni maKristau siniwerya aya olelo olavulaka moororomeleya? (1 aKor 15:4, 7, 8; Yes 2:2, 3; Mat 24:14; 2 Tim 3:1-5)

  • Mmusome Miteko 1:1-11.

    Waamwaramwaren’ye sai muteko woolaleerya, ntoko saahimmwalya aya vahinatthi mMiteko 1:8? (Mit 6:7; 9:31; 11:19-21; aKol 1:23)