Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 103: Musaala Yootthukiwa

Mwaha 103: Musaala Yootthukiwa

NUUMALA Pedru ni Yohani okhuma omahiye weiwe waakuhiwe erutthu ya Yesu, Maria onihiiwa vale mekhawe. Ola onnipacerya wunla. Nuumala vo onnuurama ni onaweha muhina mwa mahiye, ntoko elatarato ekisenrya ahu woona. Vale onnoona malaikha manli! Awo animukoha wira: ‘Xeeni muninla anyu?’

Maria onnaakhula wira: ‘Awo aamukuxa Pwiya aka, nto nkinsuwela ti woowi omwixaathalya aya.’ Nuumala vo Maria onnirukunuwa ni onamoona mulopwana. Owo onnimukoha Maria wira: ‘Tanii onimuhaaya anyu?’

Maria onuupuwela wira mulopwana owo mulipa a ejardim, ni wira owo khino tokunxe erutthu ya Yesu. Siiso onihimya wira: ‘Akhala wira nyuwo mmukunxe, mukihimeerye omwiixantha anyu.’ Masi, mwekeekhai, mulopwana ola Yesu. Owo oowara erutthu yeeyo Maria ehinsuwela awe. Masi vaavo vanimwiitthana awe ni nsina nawe, Maria onnisuwela wira Yesu. Ola onnitthimakasa ni onaaleela awiixutti wira: ‘Miyo konweha Pwiya!’

Nihiku nenne okathi mukina, awiixutti anli ariki mweetta arowaka muttetthe mwaamukhaani wa Emawuusi, mulopwana mmosaa onniitakaaha n’awosa. Awiixutti arii ooriipiwa murima vanceene okhala wira Yesu ohiiviwa. Masi vaavo vaneetta aya, mulopwana onnaatthokiherya itthu sinceene sa mBiibiliya seiyo siniwiiriha okhala oomaaliheya. Wanikisa waya, vaavo vaneemela aya wira alye, awiixutti annisuwela wira mulopwana ola Yesu. Nuumala vo Yesu onnilakaseya, ni awiixutti ala anli annitthika mowaakuveya mpakha oYerusalemu wira yaaleele arummwa voohimya sa owo.

Vaavo eyo vaniiraneya aya, Yesu onnikhumela-tho wa Pedru. Akina annitteeliwa murima vanceene vaavo vaniiwa aya ela. Nto awiixutti ala anli anirowa oYerusalemu ni annaaphwanya arummwa. Awo annaaleela moota Yesu-tho aakhumenlya awe wa awosa mphironi. Nto vaavo vaniira aya ahimyaka iya, nyuwo munnisuwela etthu yootikiniha yeeyo eniiraneya?

Nkawehani valataratoni. Yesu onnikhumela musaala memme, nnaamwi mukhora oryeene ootthukiwa. Moota awiixutti siry’aya oohakalala! Khahiyo nihiku nootteeliha murima? Nyuwo munniwerya waalikela ikwaha seiyo Yesu sikhumenlya awe vano wa atthareli awe? Nyuwo mwaalikenle toko ikwaha thanuu?

Yesu onnikhumelela wa awiixutti awe

Murummwa Tomee kokhanle n’awo vaavo Yesu vanikhumela awe. Siiso awiixutti animuleela wira: ‘Hiyo nomoona Pwiya!’ Masi Tomee onihimya wira ohinatthi okupali ela oohaana onweha Yesu mmensawe. Saana, mahiku mathanuu ni mararuu vattuli vaya awiixutti arisa poromosa-tho musaala yootthukiwa, ni okathi ola Tomee orii n’awosa. Mootutuxerya, Yesu onnikhumela musaala memme. Vano Tomee onnikupali.

Yohani 20:11-29; Luka 24:13-43.



Makoho

  • Maria onihimya exeeni wa mulopwana yoowo onuupuwela awe wira mulipa a ejardim, masi exeeni enimwiiriha osuwela wira mwekeekhai ti Yesu?
  • Exeeni eniwiiraneela awiixutti anli yaawo aneetta arowaka muttetthe mwaamukhaani wa Emawuusi?
  • Etthu xeeni yootikiniha eniiraneya vaavo awiixutti anli vanaaleela aya arummwa wira aamoona Yesu?
  • Yesu iixoonihenrye ikwaha kavii wa atthareli awe?
  • Tomee onihimya exeeni vaavo vaniiwa awe wira awiixutti aamoona Pwiya, masi exeeni eniiraneya mahiku mathanuu na mararuu vattuli vaya?

Makoho oowuncererya

  • Mmusome Yohani 20:11-29.

    Niireke wi mu Yohani 20:23 Yesu aahimya wira apinaatamu aheemereriwa olevelela soottheka? Nkatthokiheryani. (Sal 49:2, 8; Yes 55:7; 1 Tim 2:5, 6; 1 Yoh 2:1, 2)

  • Mmusome Luka 24:13-43.

    Moota xeeni siniwerya ahu olokiherya murima ahu wira aakhele ikeekhai sa Biibiliya? (Luk 24:32, 33; Ezi 7:10; Mat 5:3; Mit 16:14; aHeb 5:11-14)