Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 99: Musaala Ya Vasuluu

Mwaha 99: Musaala Ya Vasuluu

VANO ola ohiyu wa Namaxexe, mahiku manli vattuli vaya. Yesu ni arummwa awe 12, ahoorwaasa va esaala ela yuulupale ya vasuluu wira alye yoolya ya Pasikha. Mulopwana owo oninweha anyu okhumaka ti Yuda Isikaryoti. Owo onirowa waaleela alipa a mukuttho moota sinkela aya owerya onvara Yesu.

Yoolya ya makaaripi ya Apwiya

Paahi nihiku nimosaa vahinatthi, Yuda aahirowa wa awosa ni aahaakoha wira: ‘Exeeni enrowa anyu okivaha miyo akhala wira kinrowa wookhaliheryani onvara Yesu?’ Awo yaahimmye so: ‘Musurukhu miloko miraruu wa eparatha.’ Siiso Yuda onirowa okumana ni alopwana ala wira owerye waahoola wa Yesu. Khahiyo etthu yootakhala eyo?

Yoolya ya Pasikha yoomala. Masi Yesu vano onipacerya yoolya ekina ya vameekh’aya. Owo onaavahererya ephaawu arummwa awe ni onahimya so: ‘Mukhuureke ela, okhala wira ela entaphulela erutthu aka yeeyo enrowa ovahiwa wa nyuwo.’ Nuumala vo onaavaha ekoopho ya eviinyu ni onahimya so: ‘Muwurye ela, okhala wira ela entaphulela ephomee aka, yeeyo enrowa omwarexiwa mwaha wa nyuwo.’ Biibiliya oniitthana ela okhala ‘yoolya ya makaaripi y’Apwiya.’

AnaIsarayeli yaanimulya Pasikha wira owuupuxerye vaavale nlaikha na Muluku ‘naavikanne aya’ ipa saya wEjiitu, masi nnamwiiva mwaana oopacerya a ipa sa atthu a wEjiitu. Masi vano Yesu oniphavela wira atthareli awe amuupuweleke, ni moota owo ovanha awe okumi awe mwaha wa awosa. Nto nna nthowa naya onaaleela awe wira yuupuweleleke yoolya ela ya vameekh’aya khuta mwaakha.

Nuumala olya Yoolya ya Makaaripi y’Apwiya, Yesu onaaleela arummwa awe wira akhalee oolipa murima ni aikuruu munroromelo. Wanikisa waya, awo animwiipela masipo Muluku nto nuumala vo anakhuma. Vano vahiila vanceene, waaniheryasa woovira ohiyu eriyari. Nrowee niwehee weiwo anirowa aya.

Mateyo 26:14-30; Luka 22:1-39; Yohani ikapitulu 13 mpakha 17; 1 aKorinto 11:20.



Makoho

  • Ntoko sooniheriwa aya valataratoni va, nthowa xeeni Yesu ni arummwa awe 12 vary’aya mu esaala yuulupale ya vasuluu?
  • Mulopwana owo onikhuma tanii, nto onrowa opaka exeeni?
  • Yoolya xeeni ya vameekh’aya Yesu onipaceriha awe vattuli va omaliha yoolya ya Paasikha?
  • Paasikha oniwuupuxerya yoowiiraneya xeeni anaIsarayeli, nto yoolya ela ya vameekh’aya eniwuupuxerya exeeni atthareli a Yesu?
  • Nuumala Yoolya ya Makaaripi ya aPwiya, Yesu onaaleela exeeni atthareli awe, nto anipaka exeeni?

Makoho oowuncererya

  • Mmusome Mateyo 26:14-30.

    Moota xeeni Mateyo 26:15 sinooniherya awe wira Yuda onveleela wawe Yesu yaari etthu yoolakela?

    Soolakela xeeni piili sinirumeeliwa mwaha wa oyiihiwa ephomee ya Yesu? (Mat 26:27, 28; Yer 31:31-33; aEf 1:7; aHeb 9:19, 20)

  • Mmusome Luka 22:1-39.

    Mmukhalelo xeeni Satana saakenlya awe vamurimani va Yuda? (Luk 22:3; Yoh 13:2; Mit 1:24, 25)

  • Mmusome Yohani 13:1-20.

    Moovarihana ni yoohimmwa mu Yohani 13:2, Yuda ookhalana nthowa mu yeele yaapanke awe, ni etthu xeeni eniwerya aya wiixutta arumeyi a Muluku mwa yeela? (Maph 4:7; 2 aKor 2:11; aGal 6:1; Yak 1:13, 14)

    Yoowiixuttiha xeeni yuulupale yoovareleya muteko Yesu evanha awe? (Yoh 13:15; Mat 23:11; 1 Ped 2:21)

  • Mmusome Yohani 17:1-26.

    Mmukhalelo xeeni Yesu aavekenlya awe wira atthareli awe “akhalee mmosaru”? (Yoh 17:11, 21-23; aRom 13:8; 14:19; aKol 3:14)