Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 97: Yesu Onrwa Ntoko Mwene

Mwaha 97: Yesu Onrwa Ntoko Mwene

OKATHI wa vakhaani nuumala waavoniha anasimola anli oohoona, Yesu onniphiya mmuttetthe mwaamukhaani waattamela oYerusalemu. Owo onaaleela awiixutti awe anli wira: ‘Murowee muttetthe mwaamukhaani ni munrowa omphwanya mwaabuuru. Mmutaphule ni mmuruuhe wa miyo.’

Vaavo vaniruuheliwa awe buuru, Yesu onikilaathi vasuluu vawe. Nto onnimweettiha okelaka muYerusalemu mukwaha wookhuveela. Vaavo vanikhuveela awe epooma, muttitthi muulupale wa atthu onnoorwa okumana n’uwo. Anamunceene a yaawo anirula malaya aya ni anaatala mphironi. Akina aniikittha makukhu a mirii sa korooro. Awo anikuha mphironi-tho, ni okhuwela ariki: ‘Muluku omureelihe mwene yoowo onrwa ni nsina na Yehova!’

Atthu animwaakhela Yesu

Okathi wa khalai mamwene masyaa a Isarayeli yaakela muYerusalemu anwenle ene mwaabuuru wira yiixooniherye wa nloko. Ela ti etthu Yesu enipaka awe. Nto atthu ala anooniherya wi aniphavela wira Yesu okhalee mwene aya. Masi khahiyo wira atthu otheene annimphavela owo. Hiyo nnoowerya woona ela orweela mwa yeele eniiraneya vaavo Yesu vanikela awe mpaani mwa Muluku.

Va empa ya Muluku Yesu onaavoniha atthu yaale ari oohoona ni oorakala. Vaavo axinamwane vaniweha aya ela, awo anikhuwela monvuwiha Yesu. Masi ela enniwiiriha alipa a mukuttho okhala oonanariwa, nto awo annimuleela Yesu wira: ‘Nyuwo munniiwa yeeyo anamwane ala enihimya aya?’

‘Aayo, miyo kinniiwa,’ onnaakhula Yesu. ‘Nyuwo khimutonko osoma mBiibiliya mapuro anihimya wira: “Vayanoni va axinamwane Muluku onrowa okumiherya ovuwa?”’ Siiso anamwane annivikaniha onvuwiha mwene a Muluku.

Hiyo nimphavela okhala ntoko anamwane ale, khahiyo siiso? Atthu akina pooti weererya onikhoottiherya olavula sa omwene wa Muluku. Masi hiyo ninrowa ovikaniha moohihiyererya olavula itthu sootikiniha seiyo Yesu sinrowa awe owiirela atthu.

Ola khiwaari okathi wa Yesu wira opacerye olamulela ntoko mwene vaavo vaary’awe mulaponi. Ti silinii vanrowa aya orwa okathi ola? Awiixutti a Yesu aniphavela osuwela. Hiyo ninrowa osoma ela moottharelana.

Mateyo 21:1-17; Yohani 12:12-16.



Makoho

  • Vaavo Yesu vaniphiya awe mmuttetthe mwaamukhaani waattamela oYerusalemu, onaaleela opaka exeeni awiixutti awe?
  • Valataratoni va, eniiraneya exeeni vaavo Yesu vanaattamela awe muttetthe wa oYerusalemu?
  • Exeeni anamwane enipaka aya vaavo vaninweha aya Yesu aavonihaka atthu yaawo ari oohoona ni oorakala?
  • Yesu onaaleela exeeni alipa a mukuttho oonanariwa?
  • Moota xeeni siniwerya ahu okhala ntoko anamwane yaawo aninvuwiha Yesu?
  • Awiixutti amphavela osuwela exeeni?

Makoho oowuncererya

  • Mmusome Mateyo 21:1-17.

    Waavirikanne sai moota Yesu saakenlya awe muYerusalemu ntoko Mwene, ni makhulupale ooxintta mu okathi wa aRoma? (Mat 21:4, 5; Zak 9:9; aFil 2:5-8; aKol 2:15)

    Etthu xeeni eniwerya aya wiixutta amiravo wa ooyeveela anaIsarayeli yaawo yaahimmye masuu a Esalimo 118 okathi yoowo Yesu aakenlya awe mu empa ya Muluku? (Mat 21:9, 15; Sal 118:25, 26; 2 Tim 3:15; 2 Ped 3:18)

  • Mmusome Yohani 12:12-16.

    Ovariheliwa muteko makukhu a korooro ni atthu yaawo animutthapela Yesu onithoonyerya exeeni? (Yoh 12:13; aFil 2:10; Wis 7:9, 10)