Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 94: Owo Onnaaphenta Axinamwane

Mwaha 94: Owo Onnaaphenta Axinamwane

MUNNINWEHA Yesu va omukhupaarelaka mwammiravo owo. Nyuwo munoowerya woona wi Yesu mwekeekhai onnaakhapelela ooyeveela. Alopwana awo aniweha arummwa awe. Exeeni Yesu enihimya awe wa awosa? Nrowee niwehee.

Yesu ni arummwa awe atthinke niinano mmukwaha aya woorakama. Ari mphironi arummwa yaahivaanyihana eriyari aya. Siiso amalinhe ene weetta mukwaha Yesu onnaakoha oriki: ‘Exeeni yaavaanyihana anyu mphironi?’ Mwekeekhai, Yesu onnisuwela etthu ene yaavaanyihana aya. Masi owo onaakoha arummwa wira oone akhala wira anrowa omuleela.

Yesu oryeene ni anamwane

Arummwa awo khanaakhula, okhala wira mphironi yaavaanyihana sa tanii a yaawo orii muulupalexa. Arummwa akina aniphavela okhala ootthuneyexa waavikana akina. Moota xeeni Yesu sinrowa awe waaleela wira khahiyo vooloka ophavela okhala muulupalexa?

Owo onimwiitthana mwammiravo, ni onamweemexa ohoolo wa otheene ayasa. Nuumala vo owo onihimya wa awiixutti awe wira: ‘Kiniphavela wira musuwele ela moohaaniherya, vaahikhale wira munrowa orukunuwa ni okhala ntoko axinamwane, nyuwo khimunkhala-khala mukelaka moomweneni mwa Muluku. Mutthu muulupalexa moomweneni ti yoole onikhala ntoko mwaana ola.’ Nyuwo munnisuwela nthowa xeeni Yesu vaahimmya awe ela?

Saana, axinamwane tthiri khanixankiheya voohimya sa okhala muulupale aahiiso ootthuneya waavikana akina. Siiso arummwa yaahaana wiixutta okhala ntoko anamwane mmukhalelo ola ni ohivaanyihana voohimya sa okhala muulupale aahiiso ootthuneya.

Nave-tho, ookhala okathi mukina, vaavo Yesu vanooniherya awe moota onaakhapelela awe axinamwane. Nuumala miyeeri sa vakhaani atthu annaaruuha anaaya wira anwehe Yesu. Arummwa anneererya waakhoottiherya. Masi Yesu onaaleela arummwa awe wira: ‘Mwaahiye anamwane arwe wa miyo, ni muhaakhoottiherye, okhala wira omwene wa Muluku ti wa atthu ntoko awo.’ Nuumala vo Yesu onaakuxa anamwane mmatatani mwawe, ni onnaareelihasa. Khahiyo vooloka osuwela wira Yesu onnaaphenta axinamwane?

Mateyo 18:1-4; 19:13-15; Marko 9:33-37; 10:13-16.



Makoho

  • Arummwa aninyakuliheryanani mphironi atthikaka mmukwaha aya wooraka?
  • Nthowa xeeni Yesu vanimwiitthana awe mwaana ooyeveela ni omweemexa eriyari ya arummwa?
  • Mmukhalelo xeeni arummwa yaatthuneya aya wiixutta okhala ntoko anamwane?
  • Miyeeri vakhaani vattuli vaya, moota xeeni Yesu sinooniherya awe wira onnaaphenta anamwane?

Makoho oowuncererya

  • Mmusome Mateyo 18:1-4.

    Nthowa xeeni Yesu vanirumeela awe malikanyiheryo wira iixuttihe? (Mat 13:34, 36; Mar 4:33, 34)

  • Mmusome Mateyo 19:13-15.

    Mikhalelo xeeni sa anamwane sinitthuneya ahu otakiha akhala wira nimphavela waakhela mareeliho a Omwene? (Sal 25:9; 138:6; 1 aKor 14:20)

  • Mmusome Marko 9:33-37.

    Exeeni Yesu yaawiixuttinha awe awiixutti awe voohimya sa ophavela mapuro oovuwa? (Mar 9:35; Mat 20:25, 26; aGal 6:3; aFil 2:5-8)

  • Mmusome Marko 10:13-16.

    Moota xeeni Yesu saary’awe ookhweya olavulana, ni exeeni aniwerya aya wiixutta axitokweene eeKristau mu ntakiheryo nawe? (Mar 6:30-34; aFil 2:1-4; 1 Tim 4:1)