Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 93: Yesu Onnaalyiha Atthu Anceene

Mwaha 93: Yesu Onnaalyiha Atthu Anceene

EHIIRANEYA etthu emosaa yootakhala. Yohani Mbatiza iiviwe niinano va. Herodiya, mwaara a mwene, khaamphavela owo. Nto aahiwerya omwiiriha mwene orumiha wiikitthiwa muruu wa Yohani.

Vaavo Yesu vaniiwa awe ela, owo orii ooriipiwa murima vanceene. Owo onirowa mekhawe nipuro nihinviraviriwa. Masi atthu annimutthara. Vaavo Yesu vaniweha awe mittitthi, owo onnoonela othunku. Siiso onaaleela awosa sa omwene wa Muluku, ni onnaavoniha aretta aya.

Oxekuwa yoole awiixutti awe annoorwa wa owo ni anamuleela wira: ‘Vahiila, nto nna nipuro nihikhanle etthu. Mwaaleele atthu ala wira aroweke siiso awo anoowerya othuma yoolya aya mmittetthe sookhuveela.’

Yesu onnaavaha yoolya atthu anceene

‘Awo khantthuneya orowa,’ onnaakhula Yesu. ‘Nyuwo mwaavahe etthu wira alye.’ Orukunuwelaka wa Filipe, Yesu onikoha wira: ‘Ninrowa othuma wuuwi yoolya yoophiyerya waalyiha atthu ala otheene?’

‘Onooyiiheya musurukhu munceene, munceenexa wira nthume yoolya eniphiyerya wira ori otheene okhalane paahi yoolya vakhaanixa,’ onnaakhula Filipe. Vano Andreya onihimya wira: ‘Mwammiravo ola, ookhalana iphaawu thanuu ni ihopa piili. Masi iya khisinaattamela ophiyerya wa atthu ala otheene.’

‘Mwaaleele atthu wira akilaathi vamalaxini,’ onnihimya Yesu. Nuumala vo owo onnimuxukhurela Muluku mwaha wa yoolya, ni onapacerya okawanya mapattuxa ene. Moottharelana, awiixutti anaavaha ephaawu ni ehopa atthu otheene. Aakhala alopwana 5.000, ni athiyana ni anamwane oovikana ikonto sinceene. Otheene aya annoolya mpakha ovona. Nto vaavo awiixutti vanithukumanya aya seiye saahanle, sinnisareya mavuku 12!

Vano Yesu onniwiiriha awiixutti awe okela mukalawani wira alapuwe Ephareya ya oGalileya. Okathi wa ohiyu onnikhumelela munamukhaya muulupale, ni mampili annitekhumiha ekalawa ninno-ninno. Awiixutti arii oowoova vanceene. Nuumala vo, ohiyu eriyari, awo annimoona mutthu eettaka vasuluu va maasi orwaaka wa awo. Awo annikhuwela mowoova, okhala wira khansuwela exeeni enoona aya.

‘Muhoove,’ onnihimya Yesu. ‘Ti miyaano!’ Nlelo awo khanwerya okupali ela. Siiso Pedru onihimya so: ‘Akhala wira tthiri ti nyuwo, Pwiya, mukiirele wira keette vasuluu va maasi kirowaka wa nyuwo.’ Yesu onnaakhula oriki: ‘Murweeke!’ Nto Pedru onnikhuma ni onneetta vasuluu va maasi! Nuumala vo owo onnoova ni onnipacerya osama, masi Yesu onnimoopola.

Valokenle ene, Yesu onnilyiha vasyaa-tho ikonto sinceene sa atthu. Ekwaha ela owo onipaka-tho siisaale ni iphaawu thanuu na piili ni ihopa saamukhaani vakhaani. Nto vasyaa-tho yookhala yoolya yoophiyerya wa otheene. Khahiyo vootikinihexa moota Yesu sinaakhapelela awe atthu? Vaavo vanilamulela awe ntoko mwene a Muluku hiyo khininrowa-tho oxankiheyaka ni etthu eri yotheene!

Mateyo 14:1-32; 15:29-38; Yohani 6:1-21.



Makoho

  • Etthu xeeni yootakhala emwiiranenle Yohani Mbatiza, nto Yesu onoonela sai?
  • Moota xeeni Yesu sinilyiha awe mittitthi sa atthu seiyo sinimutthara, ni waatta waya eri sai yoolya enihala?
  • Nthowa xeeni awiixutti ary’aya owoova ohiyu, nto exeeni enimwiiraneela Pedru?
  • Moota xeeni Yesu sinaalyiha awe atthu ikonto sene mmukwaha wa nenli?
  • Nthowa xeeni vanrowa aya okhala vooreerexa vaavo Yesu vanrowa awe olamulelaka elapo ntoko Mwene a Muluku?

Makoho oowuncererya

  • Mmusome Mateyo 14:1-32.

    Ehimmwale mMateyo 14:23-32 ennikhaliherya wiiwexexa exeeni voohimya sa omutthu wa Pedru?

    Moota xeeni Soolempwa sinooniherya aya wira Pedru aahinnuwa momunepani ni aahivikana mukhalelo awe wookhummwa murima? (Mat 14:27-30; Yoh 18:10; 21:7; Mit 2:14, 37-40; 1 Ped 5:6, 10)

  • Mmusome Mateyo 15:29-38.

    Yesu oonihenrye sai nttittimiho ni soovaha sa werutthuni saakhuma wa Tiithi awe? (Mat 15:37; Yoh 6:12; aKol 3:15)

  • Mmusome Yohani 6:1-21.

    Moota xeeni maKristau olelo anitthara aya ntakiheryo na Yesu na omuttittimiha kuvernu? (Yoh 6:15; Mat 22:21; aRom 12:2; 13:1-4)