Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 92: Yesu Onaavenxa Alipa-ookhwa

Mwaha 92: Yesu Onaavenxa Alipa-ookhwa

MWAARUUSI owo onimoona anyu va orina iyaakha 12. Yesu onivarela ntata nawe, nto amamawe ni apapawe yeemenle vakhiviru vale. Nyuwo munnisuwela nthowa naya awo anooneya aya okhala oohakalalexa? Nrowee niwehee.

Yesu omuhihimuxaka mwaana mwamuthiyana a Jairo

Paapa awe mwaaruusi owo ti mutthu ootthuneya oniihaniwa Jairo. Nihiku nimosaa mwanawe mwaamuthiyana onniwereiwa, ni owo onaataleliwa vakhaamani. Masi owo khonikhala saana hataa vakhaani. Paahi owo onootepeleleya owereiwa. Jairo ni mwaarawe arii ooxankiheya vanceene, okhala wira vanooneya ntoko wi mwaaruusi ooyeveela owo onirowa okhwa. Owo orii mwanaya mwaamuthiyana mmoseene. Siiso Jairo onirowa omuhaayasa Yesu. Owo ohiiwa voohimya sa mitikiniho sinivara Yesu.

Vaavo Jairo vanimphwanya awe Yesu, ookhala muttitthi muulupale omurukurenrye. Masi Jairo onnivira vamuttitthini vo ni onamorela munawoni mwa Yesu. ‘Mwanaka mwaamuthiyana khoreere owereiwa,’ owo onnihimya. ‘Xontte, murwee ni munvonihe,’ owo onnixonttela. Yesu onihimya wira onimoorwa.

Vaavo awo yiiraaya yeettaka, muttitthi onnivikaniha okakhana wira waattamele. Mootutuxerya Yesu onneemela. ‘Tanii okikwannyale?’ owo onnikoha. Yesu onnoona ikuruu sikhumaka wa owo, siiso oosuwela wira ookhala mutthu omukwannyale. Masi tanii? Orii muthiyana ohireere owereiwa vanceene mu iyaakha 12. Owo aahirwa ni aahikwannya ikuwo sa Yesu, nto aahivona!

Ela ennimwiiriha Jairo woona saana, okhala wira owo onniwerya woona moota vary’aya vookhweya wa Yesu wira onvonihe mutthu. Masi vano onniphiya namuhupi. ‘Muhimunyoonyihee-tho Yesu,’ owo onnimuleela Jairo. ‘Mwaninyu ohookhwa.’ Yesu onniiwa ela ni onnimuleela Jairo wira: ‘Muhixanke, owo onrowa okhala saana.’

Wanikisa waya, vaavo awo vaniphiya aya owannyawe Jairo, atthu awo animunla ni oriipiwa murima wuulupale. Masi Yesu onihimya so: ‘Muhinle. Mwaana owo kokhwiiye. Owo onoorupa paahi.’ Masi awo anoomutheya ni omunyohola Yesu, okhala wira awo annisuwela wira owo ohookhwa.

Nuumala vo Yesu onimukuxa paapa ni maama awe mwaaruusi ni arummwa awe araruu arowaka ekwaartu yaataleliwe mwaana. Owo oninvarela ntata ni onahimya oriki: ‘Nvenye!’ Nto owo onnikhala ni okumi, ntoko siiso sinoona anyu va. Nto owo onnivenya ni oneetta! Nna nthowa naya maama awe ni paapa awe arisa aya oohakalala vanceene, vanceenexa.

Ola khahiyo mutthu oopacerya yoowo Yesu oninvenxa awe waalipa-ookhwa. Oopacerya yoowo Biibiliya onimuhimya awe ti mwaana mwaamulopwana a naamukhweli yoowo onikhala mmuttetthe wa oNayini. Vattuli vaya, Yesu onninvenxa-tho mookhwani Laazaro, munnawe Maria ni Martha. Vaavo Yesu vanilamulela awe ntoko mwene a Muluku, owo onrowa waaruuha atthu anceene, anceenexa mookhwani wira akhalee akumi. Hiyo khinnikhala oohakalala mwaha wa eyo?

Luka 8:40-56; 7:11-17; Yohani 11:17-44.



Makoho

  • Tiithi a mwaaruusi ola valataratoni va tanii, ni nthowa xeeni Jairo ni mwaarawe arisa aya ooxankiheya?
  • Jairo onipaka exeeni vaavo vanimphwanya awe Yesu?
  • Exeeni eniiraneya vaavo Yesu vanrowa awe owannyawe Jairo, nto mphironi Jairo onaakhela muhupi xeeni?
  • Nthowa xeeni atthu ari owannyawe Jairo vanimutheya aya Yesu?
  • Nuumala waakuxa arummwa araruu ni axitiithi awe mwaaruusi arowaka okwaartu wa mwaaruusi, Yesu onipaka exeeni?
  • Tanii-tho Yesu onvenxalya awe mwaalipa-ookhwa, nto ela enooniherya exeeni?

Makoho oowuncererya

  • Mmusome Luka 8:40-56.

    Yesu oonihenrye sai othunku ni oreera murima wa muthiyana aarina eretta ya onowa ephomee, ni exeeni eniwerya aya wiixutta olelo axitokweene eeKristau mwa yeela? (Luk 8:43, 44, 47, 48; Onam 15:25-27; Mat 9:12, 13; aKol 3:12-14)

  • Mmusome Luka 7:11-17.

    Nthowa xeeni atthu yaale akhwelinwe vaniwerya aya ophwanya yoomaaliha yuulupale mu waakhula wa Yesu wa naamukhweli a oNayini? (Luk 7:13; 2 aKor 1:3, 4; aHeb 4:15)

  • Mmusome Yohani 11:17-44.

    Moota xeeni Yesu soonihenrya awe wira etthu yoohitthekeya oriipiwa murima mwaha wookhweliwa? (Yoh 11:33-36, 38; 2 Sam 19:1; 19:2-5)