Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 91: Yesu Oniixuttiha Va Mwaako

Mwaha 91: Yesu Oniixuttiha Va Mwaako

MUNWEHEKE Yesu okilaathale va. Owo oniwiixuttiha atthu awo otheene va mwaako oGalileya. Awo akilaathale vakhiviruxa n’uwo ti awiixutti awe. Owo ohaathanla 12 a yaawo wira akhalee arummwa. Arummwa arii awiixutti a vameekh’aya a Yesu. Nyuwo munnisuwela masina aya?

Yesu onimwiixuttiha

Ookhala Simoni Pedru ni munnawe Andreya. Ohiya vo ookhala Yakobo ni Yohani, yaawo-tho arii anna. Murummwa mukina oniihaniwa-tho Yakobo, ni mukinaku oniihaniwa-tho Simoni. Arummwa anli aniihaniwa Yuda. Mmosaa ti Yuda Isikaryoti, ni Yuda mukina oniihaniwa-tho ni nsina na Tadeyo. Ohiya vo ookhala Filipe ni Natanayeli (oniihaniwa-tho Bartolomeyo), ni Mateyo ni Tomee.

Nuumala otthika okhumaka oSamariya, Yesu aahipacerya olaleerya mu ekwaha yoopacerya oriki: ‘Omwene wa wirimu orii vakhiviru.’ Nyuwo munnisuwela omwene owo orii exeeni? Erii ekuvernu yekeekhai ya Muluku. Yesu tori mwene aya. Owo onrowa olamulelaka ori wirimu ni oruuha murettele mulaponi. Elapo yotheene enrowa opakiwa okhala eparayiisu yooreera orweela mwa omwene wa Muluku.

Va, Yesu oniwiixuttiha atthu voohimya sa omwene. ‘Nyuwo moohaana ovekela so,’ owo onnitthokiherya. ‘Tiithi Ihu a wirimu, nsina nanyu nttittimihiwe. Omwene anyu orwee. Otthuna wanyu wiiraneye mulaponi, ntoko siiso siry’aya wirimu.’ Atthu anceene aniihana nna okhala ‘Nivekelo n’Apwiya.’ Akina aniihana okhala ‘Tiithi Ihu.’ Nyuwo munniwerya ohimya nivekelo notheene?

Yesu oniwiixuttiha-tho atthu moota woothokoreryanaka mukina ni mukhw’awe. ‘Nwiireleke akina yeele nyuwo muniphavela anyu wira awosa awiirelekeni,’ owo onnihimya. Nyuwo khimunisiveliwa vaavo akina anoothokoreryayani mmukhalelo wooreerela murima? Siiso, Yesu oniphavela ohimya wira, hiyo nohaana waathokoreryaka atthu akina mooreerela murima. Khivanrowa okhala vooreera saana mparayiisu mulaponi vaavo khuta mutthu vanrowa awe opakaka ela?

Mateyo ikapitulu 5 mpakha 7; 10:1-4.



Makoho

  • Valataratoni va, Yesu oniixuttiha nipuro xeeni, ni ale akilaathale vakhiviruxa n’uwo tanii?
  • Masina aya taavi arummwa 12?
  • Omwene yoowo Yesu onilaleerya awe exeeni?
  • Yesu oniwiixuttiha atthu wira avekeleke exeeni?
  • Yesu onihimya exeeni sa moota atthu saatthuneya aya othokoreryanaka mukina ni mukhw’awe?

Makoho oowuncererya

  • Mmusome Mateyo 5:1-12.

    Mu iphiro xeeni ninwerya ahu wooniherya wira nrii oosuwelexa sa yoophavela ahu ya omunepani? (Mat 5:3; aRom 10:13-15; 1 Tim 4:13, 15, 16)

  • Mmusome Mateyo 5:21-26.

    Moota xeeni Mateyo 5:23, 24 onttittimiherya awe wira wataana wahu ni annihu onnivara wataana wahu ni Yehova? (Mat 6:14, 15; Sal 133:1; aKol 3:13; 1 Yoh 4:20)

  • Mmusome Mateyo 6:1-8.

    Inamuna xeeni sa wiikupali seiyo maKristau anitthuneya aya osyaka? (Luk 18:11, 12; 1 aKor 4:6, 7; 2 aKor 9:7)

  • Mmusome Mateyo 6:25-34.

    Etthu xeeni Yesu yiixuttinha awe voohimya sa otthuneya waya omuroromela Yehova mu soophavela sahu sa werutthuni? (Okhum 16:4; Sal 37:25; aFil 4:6)

  • Mmusome Mateyo 7:1-11.

    Ninniixuttiha exeeni nlikanyiheryo naari nowiiwanyeya wa alipa-oowiriyana nri mMateyo 7:5? (Mir 26:12; aRom 2:1; 14:10; Yak 4:11, 12)