Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 89: Yesu Onireeriha Empa Ya Muluku

Mwaha 89: Yesu Onireeriha Empa Ya Muluku

VA Yesu tthiri onooneya okhala oonanariwa, khahiyo siiso? Nyuwo munnisuwela nthowa naya ory’awe oonanarexiwa? Nthowa noowi alopwana ala mu empa ya Muluku oYerusalemu ananrima vanceene. Awo aneererya ophwanya musurukhu munceene wa atthu yaawo arwiiye va wira amukokhorele Muluku.

Yesu opitulaka mesa a musurukhu

Nyuwo munniweha inyompe soolopwana saamukhaani ni ipwittipwitthi ni ipomba iye sotheene? Saana, alopwana awo anitumiha inamaa iya vaaveenexa mu empa ya Muluku. Nyuwo munnisuwela nthowa naya? Nthowa noowi anaIsarayeli aniphavela inamaa ni axipalame wira anvahe mukuttho Muluku.

Nlamulo na Muluku naahimya wira akhala wi muIsarayeli aapanke etthu yootakhala, owo aahaana opaka yoovaha wa Muluku. Nave-tho, waahikhala okathi mukina, vaavo anaIsarayeli yaatthuneya aya opaka yoovaha. Masi ti wuuwi muIsarayeli aakela awe waaphwanya axipalame ni inamaa wira onvahe Muluku?

AnaIsarayeli akina yaahikhalana axipalame ni inamaa. Siiso awo yanwerya ovaha iya. Masi anaIsarayeli anceene khiyaarina inamaa aahiiso axipalame. Nto akina yaakhala otteiwenexa ni oYerusalemu awo khiyaawerya oruuha emosaa sa inamaa saya mu empa ya Muluku. Siiso atthu annoorwa va ni anniruuha inamaa aahiiso axipalame yaawo awo yaaphavela aya. Masi alopwana ala anaavekela atthu musurukhu munceene. Awo anaawokerya atthu. Ohiya vo, awo khiyaareerela otumiha vaaveenexa mu empa ya Muluku.

Ela tenimwiiriha Yesu okhala oonanariwa. Siiso owo aahipittula meesa a musurukhu aalopwana awo ni onnimwarexa musurukhu aya a maluku. Owo-tho, aahipaka murepettho a mikhoyi ni oroiha otaa wa empa ya Muluku inamaa sotheene. Owo onnaalamula alopwana yaawo anitumiha ipomba wira: ‘Mukumihe-va itthu iya! Muhiyee opaka empa ya Tiithi aka okhala nipuro na opaka musurukhu munceene.’

Atthareli akina a Yesu arii n’uwo va mu empa ya Muluku muYerusalemu. Awo annitikinihiwa ni yeele enoona aya Yesu opakaka. Nto awo anuupuwela nipuro mBiibiliya nenno nnihimya sa Mwaana a Muluku nriki: ‘Ophenta wa empa ya Muluku onrowa ovarela wa owo ntoko mooro.’

Yesu oryeene muYerusalemu va Paasikhani, owo onipaka mitikiniho sinceene. Nuumala vo, Yesu onnivenya oYudeya ni onipacerya mukwaha wootthikela oGalileya. Masi mmukwaha awe, owo onirowa mu ephiro ya edistritu ya oSamariya. Nrowee niwehee exeeni eniiraneya iwe.

Yohani 2:13-25; 4:3, 4.



Makoho

  • Nthowa xeeni inamaa sinitumihiwa aya mu empa ya Muluku?
  • Exeeni enimwiiriha Yesu okhala oonanariwa?
  • Ntoko siniwerya anyu woona valataratoni va, Yesu onipaka exeeni, ni yooruma xeeni onivaha awe wa alopwana yaale anitumiha ipomba?
  • Vaavo awiixutti a Yesu vanoona aya ele enipaka awe, anuupuxeriwa exeeni?
  • Edistritu xeeni Yesu enivira awe mmukwaha awe wootthikela oGalileya?

Nikoho nowuncererya

  • Mmusome Yohani 2:13-25.

    Nthokoreryaka onyoonyiheya wa Yesu ni alipa oowaakakhanya musurukhu mu empa ya Muluku, tuuvi ori mukhalelo wooloka voohimya sa miteko sa nakoso mu Esalau ya Omwene? (Yoh 2:15, 16; 1 aKor 10:24, 31-33)