Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 88: Yohani Onimbatiza Yesu

Mwaha 88: Yohani Onimbatiza Yesu

NKAWEHANI epomba enikhuruwela vamuruu va mulopwana owo. Mulopwana owo ti Yesu. Owo vano orina iyaakha 30. Nto mulopwana orina awe ti Yohani. Hiyo nihiixutta etthu-vale sa owo. Nyuwo munnuupuwela vaavo Maria vaaronwa awe omuxukurya mmusi awe Elizabeti, wira mwaana mmirimani mwa Elizabeti aahitupha mwaha wa ohakalala? Mwaana owo iira ohiyariwe aari Yohani. Masi vano exeeni Yohani ni Yesu anipaka aya?

Obatiziwa wa Yesu

Yohani ompwininhe niinano Yesu mmaasi a Muroo Yordani. Ola ti moota onibatiziwa awe mutthu. Wanipacerya, owo onipwinihiwa mmaasini, nto khiyakumihiwa vasyaa-tho. Okhala wira ela ti etthu yeeyo Yohani eniwiiriha awe atthu, owo oniitthaniwa Yohani Mbatiza. Masi Yohani ombatisenryeni Yesu?

Saana, Yohani aahipaka ela okhala wira Yesu aahirwa ni onvekela Yohani wira ombatize. Yohani onaabatiza atthu yaawo aniphavela wooniherya wira aariipiwa murima mwaha wa itthu sootakhala sivanry’aya. Masi Yesu ontoko ovara etthu yootakhala wira oriipiweke murima? Nnaari, Yesu khonavare, okhala wira owo Mwaana a mwaneene Muluku onikhuma wirimu. Siiso owo aahinvekela Yohani wira ombatize mwaha wa nthowa nikina. Nrowee noone tinivi naari nthowa naya.

Ohinatthi Yesu orwa wa Yohani va, owo aari kalapintero. Kalapintero mutthu yoowo onipaka itthu sa thaapwa, ntoko meesa ni ikhattera ni ikhukulu. Yosefe iyawe Maria aari kalapintero, nto owo aahimwiixuttiha Yesu wira okhalee-tho kalapintero. Masi Yehova khaamuruminhe Mwanawe mulaponi wira okhalee kalapintero. Owo ookhalana muteko a vameekh’aya wa owo wira ovare, nto okathi woophiya wira Yesu opacerye opaka ela. Siiso wira ooniherye wi vano owo ohoorwa wira opakee yotthuna ya Tiithi awe, Yesu oninvekela Yohani wira ombatize. Muluku onnihakalalela ela?

Aayo, owo onnihakalala, okhala wira, nuumala Yesu okhuma mmaasini, nsuu nookhuma wirimu nnihimya so: ‘Ola Mwanaka, yoowo onihakalalana aka.’ Nave-tho, vanikhala ntoko wira wirimu woohuleya ni epomba ela enimukhuruwela Yesu. Masi khahiyo epomba tthiri. Ela enoolikana paahi. Ola tthiri orii munepa wootteela a Muluku.

Vano Yesu ookhalana itthu sinceene sa wuupuwelela, siiso owo onirowa nipuro noomaaleleya khukhalaka mahiku 40. Vale Satana onnimurweela. Ikwaha tthaaru Satana oneererya wira omwiirihe Yesu opaka etthu yoovaanyihana ni malamulo a Muluku. Masi Yesu khonipaka ela.

Nuumala vo, Yesu onnitthika ni onnikumana ni alopwana akina yaawo anikhala atthareli awe oopacerya, aahiiso awiixutti. Masina a amosaa a yaawo ti Andreya, Pedru (iihaniwa-tho Simoni), Filipe ni Natanayeli (iihaniwa-tho Bartholomeyo). Yesu ni awiixutti ala a niinano annivenya arowaka edistritu ya oGalileya. MuGalileya awo aneemela oKanani muttetthe a Natanayeli. Vale Yesu onirowa vaniirani nuulupale na othela, nto onipaka mutikiniho awe oopacerya. Nyuwo munnisuwela tuuvi ola? Owo onitatuxa maasi okhala eviinyu.

Mateyo 3:13-17; 4:1-11; 13:55; Marko 6:3; Yohani 1:29-51; 2:1-12.



Makoho

  • Alopwana ala anli valataratoni va tanii?
  • Mutthu onibatiziwa sai?
  • Tanii moolimaleleya Yohani onaabatiza awe?
  • Nthowa xeeni navameekh’aya Yesu nninvekela awe Yohani wira ombatize?
  • Moota xeeni Muluku sinooniherya awe wira Owo oosiveliwa wira Yesu oobatiziwa?
  • Exeeni eniiraneya vaavo Yesu vanrowa awe nipuro noomalela mmahiku 40?
  • Atthareli oopacerya a Yesu aahiiso awiixutti tanii, nto mutikiniho awe oopacerya tuuvi?

Makoho oowuncererya

  • Mmusome Mateyo 3:13-17.

    Ntakiheryo xeeni na obatizo Yesu nivanha awe wa awiixutti awe? (Sal 40:8, 9; Mat 28:19, 20; Luk 3:21, 22)

  • Mmusome Mateyo 4:1-11.

    Moota xeeni oratta wa Yesu mu ovarihela muteko Soolempwa onnilipiha aya omusoma Biibiliya moohihiyererya? (Mat 4:5-7; 2 Ped 3:17, 18; 1 Yoh 4:1)

  • Mmusome Yohani 1:29-51

    Yohani Mbatiza aavaherenrye aani awiixutti awe, ni moota xeeni ninwerya ahu omutakiha olelo? (Yoh 1:29, 35, 36; 3:30; Mat 23:10)

  • Mmusome Yohani 2:1-12.

    Moota xeeni mutikiniho oopacerya a Yesu onooniherya awe wira Yehova khonikhoottiherya etthu eri yotheene yooreera wa arumeyi Awe? (Yoh 2:9, 10; Sal 84:12; Yak 1:17)