Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 86: Alopwana Anihooleliwa Ni Etheneeri

Mwaha 86: Alopwana Anihooleliwa Ni Etheneeri
Alipa-oosoma itheneeri

NYUWO munniwerya woona etheneeri ele yoowaarya yeeyo enithoonya awe mmosaa a alopwana ala? Vaavo awo vanikhuma aya oYerusalemu, etheneeri eyo yaahikhumelela. Alopwana ala anrwa Onikhuma Nsuwa, nto awo anamasoma itheneeri. Awo anikupali wira etheneeri ela esyaa enaahoola wa mutthu ootthuneya.

Vaavo alopwana ala vaniphiya aya oYerusalemu, awo yaahikoha ariki: ‘Orii wuuwi mwaana yoowo onrowa okhala mwene aAyuda?’ “Ayuda” nsina nikina na anaIsarayeli. ‘Wanipacerya hiyo naawenhe etheneeri ya mwaana vaavo naarya ahu Onikhuma Nsuwa,’ alopwana awo yaahimmye siiso, ‘nto hiyo nihoorwa wira nimukokhorele owo.’

Vaavo Herodi, yoowo orii mwene a oYerusalemu, vaiwalya awe ela owo aahixankiheya. Owo khaaphavela wira mwene mukina okuxe nipuro nawe. Siiso Herodi aahiwiitthana makhulupale aanamukuttho ni onaakoha oriki: ‘Mwene olaiheriwe onrowa oyariwa woowi?’ Awo yaahaakhula wira: ‘Biibiliya onihimya wira mBethelehemu.’

Siiso Herodi aahiwiitthana alopwana a Onikhuma Nsuwa, ni aahihimya wira: ‘Rowani mwamphavelase mwaana owo mwaamukhaani. Vaavo nyuwo vanimphwanya anyu, mukisuwelihe. Miyo kiniphavela orowa wira kamukokhorele-tho.’ Masi, mwekeekhai, Herodi aaphavela omphwanya mwaana ni wira omwiive!

Nuumala vo etheneeri eneetta ohoolo wa alopwana awo erowaka oBethelehemu, nto eneemela vasuluu va nipuro nenne naari mwaana. Vaavo alopwana vanikela aya mpaani, awo animphwanya Maria ni mwaana Yesu. Awo anikumiha soovaha saya ni anamunnya Yesu. Masi vattuli vaya Yehova onaalopola alopwana awo moolohani wira ahitthikele wa Herodi. Siiso awo anitthikela elapo aya arumeelaka ephiro ekina.

Vaavo Herodi vanisuwela awe wira alopwana a Onikhuma Nsuwa aahokolowela owaannyeya, owo onninanariwa vanceene. Siiso onnilamula wira anamwane otheene a mBethelehemu arina iyaakha piili orowa vathii yiiviwe. Masi vahinatthi Yehova onimulopola Yosefe moolohani, nto Yosefe ni etthoko awe annikhuma arowaka wEjiitu. Vattuli vaya, vaavo Yosefe vanisuwela awe wira Herodi ohookhwa, owo onimukuxa Maria ni Yesu atthikelaka owaani oNazarethi. Nna nipuro nenno Yesu nninnuwa awe.

Munuupuwela wira tanii iirinhe wira etheneeri esyaa yaarye? Muupuweleke, wanipacerya wene alopwana awo yaaronwe oYerusalemu nuumala woona etheneeri. Satana Diabo aaphavela omwiiva Mwaana a Muluku, nto owo aahisuwela wira Mwene Herodi a oYerusalemu onrowa weererya omwiiva owo. Siiso ohaana okhala Satana yoowo iirinhe wira etheneeri yaarye.

Mateyo 2:1-23; Mikeya 5:2.



Makoho

  • Alopwana ala valataratoni va tanii, ni nthowa xeeni mmosaa a yaawo vanithoonya awe etheneeri enaarya?
  • Nthowa xeeni Mwene Herodi ory’awe ooxankiheya, ni onipaka exeeni?
  • Etheneeri yoowaarya yaahoolale mpakha wuuwi alopwana ale, masi nthowa xeeni vanitthika aya arumeelaka ephiro ekina?
  • Yooruma xeeni Herodi enivaha awe, ni nthowa xeeni?
  • Yehova onimuleela Yosefe opaka exeeni?
  • Tanii iirinhe etheneeri esyaa waarya, ni nthowa xeeni?

Nikoho nowuncererya

  • Mmusome Mateyo 2:1-23.

    Yesu aarina iyaakha kavii ni aakhala wuuwi vaavo vaaxukuriwa awe ni anamasoma itheneeri? (Mat 2:1, 11, 16)