Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 85: Yesu Oniyariwa Munikholwani

Mwaha 85: Yesu Oniyariwa Munikholwani

NYUWO munnimusuwela mwaana ola tanii? Aayo, ola Yesu. Owo oyariwe niinano munikholwani. Nikholwa empa ya inamaa. Maria onnimwaatalela Yesu munikulani, nipuro nenno ninkuhiwa yoolya ya abuuru ni inamaa sikina wira silyeeke. Masi xeeni Maria ni Yosefe arisa aya va ni inamaa? Nna khahiyo nipuro nooyareliwa mwaana, ti siiso?

Nnaari, khahiyo tthiri. Masi arisa va mwaha woowi: Namalamulela ooRoma, Seesari Augusto, aahipaka nlamulo wira ori otheene ohaana otthikela muttetthe oyariwa awe wira nsina nawe nlempwe muliivuruni. Saana, Yosefe aayariwe oBethelehemu va. Masi vaavo owo ni Maria vaniphiyasa aya, vale khivaakhanle opuro ori wotheene wa awosa. Siiso awo yaahaana okhala vamosaa ni inamaa. Nto mu nihiku nenna Maria onnimuyara Yesu! Masi, ntoko siniwerya anyu woona, owo mukumi.

Yosefe, Maria ni Yesu oryeene mwaana

Nyuwo munniwerya waaweha amakampusi arwaaka onweha Yesu? Awo yaari mmathalani ohiyu akhapelelaka ipwittipwitthi saya, nto omwaleya waahaarukurerya otheene ayasa. Naari nlaikha! Amakampusi yaari oowoova vanceene. Masi nlaikha naahimmye so: ‘Muhoove! Kooruuha ehapari yooreera wa nyuwo. Olelo, oBethelehemu, ooyariwa Kristu Pwiya. Owo onrowa owoopola atthu! Nyuwo munrowa omphwanya ovitikeleliwe ene ni ikuwo ni waataleliwe ene munikulani.’ Mootutuxerya malaikha manceene annoorwa ni annipacerya omuttottopela Muluku. Siiso niinanoru amakampusi ala yaahirowa mowaakuveya onweha Yesu, nto vano awo annimphwanya.

Nyuwo munnisuwela nthowa naya Yesu ory’awe avameekh’awe? Munnimusuwela tthiri owo tanii? Nkaapuwelani, mwaha oopacerya a eliivuru ela noolavula sa Mwaana oopacerya a Muluku. Mwaana ola aahivara muteko ni Yehova mu opaka irimu ni elapo ya vathii ni itthu sikina. Saana, owo tokhanle Yesu!

Aayo, Yehova aahikuxa okumi a Mwanawe okhuma osuluu ni ohela mmirimani mwa Maria. Niinanoru mwaana onnipacerya wunnuwa mmirimani mwawe ntoko siiso anamwane akina sininnuwa aya mmirimani mwa aximaama aya. Masi mwaana ola aari Mwaana a Muluku. Wanikisa waya, Yesu aahiyariwa munikholwani-mu oBethelehemu. Nyuwo munniwerya woona vano nthowa naya malaikha vaary’aya oohakalalexa mu owerya waaleela atthu wira Yesu aahiyariwa?

Luka 2:1-20.



Makoho

  • Mwaana ori valataratoni va tanii, nto Maria onimwaatalela vaavi?
  • Nthowa xeeni Yesu vaayariwa awe munikholwani mwa inamaa?
  • Valataratoni va, alopwana awo anikela munikholwani tanii, ni nlaikha naaleelale exeeni?
  • Nthowa xeeni Yesu ory’awe a vameekh’awe?
  • Nthowa xeeni Yesu vaniihaniwa awe okhala Mwaana a Muluku?

Makoho oowuncererya

  • Mmusome Luka 2:1-20.

    Mpantta xeeni Ceesari Augusto aavanre awe muteko mu waakhwaniherya eprofecia ya oyariwa wa Yesu? (Luk 2:1-4; Mik 5:1)

    Moota xeeni waaniheryasa mutthu mukina saarowa awe okhala eriyari yaale anihimmwa okhala ntoko ‘atthu [Muluku] onaaphent’awe’? (Luk 2:14; Mat 16:24; Yoh 17:3; Mit 3:19; aHeb 11:6)

    Okhala wira amakampusi oowiiyeveiha aYuda yaahikhalana nthowa noohakalala mwaha wa oyariwa Moopoli, nthowa xeeni nuulupale na ohakalala nrina aya arumeyi a Muluku olelo? (Luk 2:10, 11; aEf 3:8, 9; Wis 11:15; 14:6)