Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 84: Nlaikha Nimmuxukurya Maria

Mwaha 84: Nlaikha Nimmuxukurya Maria

MUTHIYANA ola ooreera ti Maria. Ola muIsarayeli, yoowo onikhala mmuttetthe oniihaniwa Nazarethi. Muluku onnisuwela wira ola mutthu ooloka vanceene. Ti nthowa naya vaniruma awe nlaikha Gabriyeli wira nalavule n’ula. Nyuwo munnisuwela ele Gabriyeli erwenlya awe ohimya wa Maria? Nrowee niwehee.

‘Mooxeleliwa, nyuwo oophentexiwa,’ Gabriyeli onihimya wa owo. ‘Yehova orii ni nyuwo.’ Maria khonamoone mutthu ola khalai. Owo orii ooxankiheya, okhala wira khonsuwela yaaphavela awe ohimya. Masi niinanoru Gabriyeli onnimaaliha woova wawe.

Maria

‘Muhoove, Maria,’ owo onnihimya. ‘Yehova ohoocaaliyani vanceene. Ti nthowa naya vanrowa awe opaka etthu yootikiniha wa nyuwo. Moohipisa nyuwo munrowa omuyara mwaana. Nto nyuwo munrowa omwiitthana okhala Yesu.’

Gabriyeli onnivikaniha otthokiherya wira: ‘Mwaana ola onrowa okhala muulupale, ni owo onrowa wiihaniwa Mwaana a Muluku Muulupalexa. Yehova onrowa ompaka okhala mwene, ntoko saary’awe Davidi. Masi Yesu onrowa okhala mwene moohimala, ni omwene awe khonrowa omala!’

‘Ela enrowa wiiraneya sai?’ Maria onnikoha. ‘Miyo hataa nkitheliwe. Nkinakhale ni mulopwana, siiso kinrowa okhalana sai mwaana?’

‘Owerya wa Muluku onrowa okhala ni nyuwo,’ Gabriyeli onnaakhula. ‘Siiso mwaana owo onrowa wiihaniwa okhala Mwaana a Muluku.’ Nuumala vo owo onimuleela Maria wira: ‘Mmuupuwelele mmus’inyu Elizabeti. Atthu yaahimya wira ola aari oowuuluvala vanceene wira okhalane anamwane. Masi niinano va owo onrowa okhalana mwaana. Siiso munnoona, khiivo Muluku ehiniwerya awe opaka.’

Niinanoru Maria onihimya wira: ‘Ka mwali epottha ya Yehova! Nto ela yiiraneye ntoko sihimmya anyu.’ Nuumala vo nlaikha ninnirowa.

Mowaakuveya Maria onirowa omuxukurya Elizabeti. Vaavo Elizabeti vaniiwa awe esooti ya Maria, mwaana ori mmirimani mwa Elizabeti onnitupha moohakalala. Elizabeti orii oosareya ni munepa wa Muluku, ni owo onihimya wa Maria wira: ‘Nyuwo murii ooreelihiwa mwa vameekh’aya eriyari ya athiyana.’ Maria onikhala ni Elizabeti moophiyeryaka miyeeri miraruu, nuumala vo onnitthikela owaani oNazarethi.

Maria ohanle otheliwa ni mulopwana oniihaniwa Yosefe. Masi vaavo Yosefe vanisuwela awe wira Maria onrowa okhalana mwaana, owo khonuupuwela wira ti vooloka omuthela. Nuumala vo nlaikha na Muluku nnihimya wa owo wira: ‘Muhoove omukuxa Maria wira okhalee mwaarinyu. Okhala wira Muluku tonvanhe mwaana owo.’ Siiso Maria ni Yosefe annithelana, nto awo anniwehererya oyariwa Yesu.

Luka 1:26-56; Mateyo 1:18-25.



Makoho

  • Muthiyana owo valataratoni va tanii?
  • Gabriyeli onimuleela exeeni Maria?
  • Gabriyeli onimutthokiherya sai Maria wira onrowa okhalana mwaana nnaamwi ohitonko okhala ni mulopwana?
  • Eniiraneya exeeni vaavo Maria vanimuxukurya awe mmusi awe Elizabeti?
  • Exeeni Yosefe enuupuwela awe vaavo vanisuwela awe wira Maria onrowa okhalana mwaana, masi nthowa xeeni onirukunuxa awe muupuwelelo awe?

Makoho oowuncererya

  • Mmusome Luka 1:26-56.

    Luka 1:35 onooniherya exeeni voohimya sa yoottheka eri yotheene enikhuma wa Adamu mmirimani mwa Maria vaavo okumi wa Mwaana a Muluku waathaamihiwa awe okhumaka wirimu? (Hag 2:11-13; Yoh 6:69; aHeb 7:26; 10:5)

    Yesu aakhenle sai nttittimiho hataa ohinatthi oyariwa? (Luk 1:41-43)

    Ntakiheryo xeeni noolokexa Maria nnivaha awe wa maKristau olelo yaawo anaakhela iparakha savameekh’aya sa muteko? (Luk 1:38, 46-49; 17:10; Mir 11:2)

  • Mmusome Mateyo 1:18-25.

    Nnaamwi Yesu ohaavahiwe nsina na Manuweli, moota xeeni muritti awe ntoko mutthu waakhwanihenrya aya yootaphulela aya? (Mat 1:22, 23; Yoh 14:8-10; aHeb 1:1-3)

MWIIXUTTE SIKINA

MUTAKIHEKE WAAMINI WAYA

Maria—‘Munweheke! Murumeyi a Yehova!’

Exeeni Maria aakhunle awe wa nlaikha Gabriyeli yooniherya waamini wawe? Mikhalelo xeeni sikina soonihenrye awe?