Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 101: Yesu Onimwiiviwa

Mwaha 101: Yesu Onimwiiviwa

NKAWEHANI etthu yootakhala yeeyo eniiraneya! Yesu onimwiiviwa. Awo amukhomenle vamwirini. Ipregu sikhomeliwe mmatatani ni munawoni mwawe. Xeeni mutthu vaarowa awe ophavela opaka ela wa Yesu?

Okhwa wa Yesu

Nthowa noowi atthu akina annimunyokha Yesu. Nyuwo munnaasuwela tanii awo? Mmosaa a yaawo nlaikha nootakhala Satana Diabo. Owo ti yoowo aari oowerya owiiriha Adamu ni Eva wira ahimwiiwelele Yehova. Nto Satana ti yoowo aawiirinhe anyokhani a Yesu wira apake ecrime ela yootakhala.

Hataa nlelo Yesu ohinatthi okhomeliwa vamwirini va, anyokhani awe annimwiiriha itthu sootakhala. Munnuupuwela moota awo saarwiiya aya ojardim ya oJeseemani ni amukuxa owo? Anyokhani ale yaari aani? Aayo, awo yaari ahooleli a itiini. Saana, nrowee niwehee exeeni eniiraneya moottharelana.

Vaavo Yesu vanikuxiwa awe ni ahooleli a itiini, arummwa awe annitthyawa. Awo annimuhiya Yesu mekhawe ni anyokhani awe, okhala wira animoova. Masi arummwa Pedru ni Yohani khanirowa otteiwene vanceene. Awo annimutthara wira yoone yeeyo enimwiiraneela Yesu.

Alipa a mukuttho animukuxa Yesu amuroihaka wa mulopwana mutokweene Hanaa, yoowo aarumenle ntoko muulupale aalipa a mukuttho. Va muttitthi khonipisa. Awo moottharelana animukuxa Yesu amuroihaka owannyawe Kaifa, yoowo vano ori muulupale aalipa a mukuttho. Ahooleli anceene a itiini athukumanne owannyawe.

Va owannyawe Kaifa awo anomphukela. Atthu anniruuhiwa wira ahimye voomootherya Yesu. Ahooleli otheene a itiini anihimya so: ‘Yesu ohaana wiiviwa.’ Nuumala vo awo animusenela owiitho, ni ommana ni isookho.

Nlelo itthu iya sotheene siriki mwiiraneya, Pedru orii otaa vanivateni. Ola ohiyu wooriirya, ni siiso atthu anipattiha mooro. Nlelo awo ariki moora arukurenrye ene mooro, murumeyi muthiyana onninweha Pedru, ni onahimya wira: ‘Mulopwana ola nave-tho aari ni Yesu.’

‘Nnaari, miyo nkaakhanle n’uwo!’ onnaakhula Pedru.

Ikwaha tthaaru atthu anihimya wa Pedru wira aari ni Yesu. Masi khuta ekwaha Pedru onihimya wira eyo khahiyo ekeekhai. Ekwaha ya neeraru vaavo Pedru vanihimya awe ela, Yesu onnirukunuwa ni onanweha owo. Pedru onniriipiwa murima vanceene mwaha woolavula sowootha iya, nto onnikhuma ni onanla.

Vaavo nsuwa vanipacerya aya okhuma Namathanu voosiisu, alipa a mukuttho animukuxa Yesu amuroihaka nipuro naya nuulupale na muthukumano, esaala ya eSineedrio. Va awo anilavula sa yeeyo enrowa aya omwiiriha. Awo animukuxa amuroihaka wa Ponsio Pilato, namalamulela a edistritu ya oYudeya.

‘Ola mulopwana ootakhala,’ alipa a mukuttho animuleela Pilato. ‘Owo ohaana wiiviwa.’ Nuumala omukoha makoho Yesu, Pilato onihimya so: ‘Nkinoona wira oopaka etthu yoonanara.’ Nuumala vo Pilato onnimurumiha Yesu wa Herodi Antipa. Herodi namalamulela a oGalileya, masi owo onikhala muYerusalemu. Hataa Herodi khonoona wira Yesu oopaka etthu eri yotheene yoonanara, siiso onnimuttikiherya wa Pilato.

Pilato oniphavela omuhiya Yesu wira orooke. Masi anyokhani a Yesu aniphavela wira namutthukiwa mukina ohiiwe orowaka munipuro nawe. Mulopwana ola ti nawiiye Barabaa. Vano ola okathi wa othana eriyari vaavo Pilato vanimukumiherya awe Yesu otaa. Owo onihimya wa nloko wira: ‘Munweheke! Mwene anyu!’ Masi ahooleli aalipa a mukuttho annikhuwela ariki: ‘Mmukumihe vo! Iiviwe! Iiviwe!’ Siiso Pilato onnimutaphula Barabaa, nto awo annimukuxa Yesu wira iiviwe.

Wanipacerya wa makaaripi ya Namathanu Yesu onnikhomeliwa vamwirini. Nyuwo khimunwerya owoona awosa valataratoni va, masi khuta mpantta wa Yesu aakhomeliwa-tho anacrime wira akhwe vamwirini. Okathi vakhaani Yesu ohinatthi okhwa, mmosaa aanacrime onnihimya wa owo: ‘Mukuupuwele vaavo vanikela anyu moomweneni mwanyu.’ Ni Yesu onnaakhula oriki: ‘Kinnoomanelani natiri wira nyuwo munrowa okhala ni miyo mParayiisu.’

Ola khahiyo natiri oohakalaliha? Nyuwo munnisuwela eparayiisu ene yeeyo Yesu aahimya awe? Yaari wuuwi eparayiisu yeeyo Muluku yaapanka awe wanipacerya? Aayo, yaari elapo ya vathii. Ni vaavo Yesu vanilamulela awe ntoko mwene wirimu, owo onrowa omuttikiherya okumi mulopwana ola wira ohakalale mu eParayiisu esyaa mulaponi. Khinnikhala oohakalala mwaha wa ela?

Mateyo 26:57-75; 27:1-50; Luka 22:54-71; 23:1-49; Yohani 18:12-40; 19:1-30.



Makoho

  • Tanii orina muritti muulupale mwaha wa okhwa wa Yesu?
  • Arummwa anipaka exeeni vaavo Yesu vanikuxiwa awe ni ahooleli a itiini?
  • Eniiraneya exeeni vatthokoni va Kaifa, muulupale aanamukuttho?
  • Nthowa xeeni Pedru vanikhuma awe ni onanla?
  • Nuumala Yesu ottikiheriwa wa Pilato, anikhuwela exeeni ahooleli a alipa a mukuttho?
  • Exeeni enimwiiraneela Yesu wanipacerya wa makaaripi ya enamathanu, ni natiri xeeni onimmanela awe nacrime mmosaa yoowo othomeiwale vamwirini mu mpantta awe?
  • Parayiisu yoowo Yesu aamuhimmya awe onrowa okhala wuuwi?

Makoho oowuncererya

  • Mmusome Mateyo 26:57-75.

    Mu ephiro xeeni atthu a ephwaro ya milattu yuulupale ya aYuda yoonihenrya aya wira mirima saya saari sootakhala? (Mat 26:59, 67, 68)

  • Mmusome Mateyo 27:1-50.

    Nthowa xeeni vaniwerya ahu ohimya wira wiiniwa murima wa Yuda khiwaari wekeekhai? (Mat 27:3, 4; Mark 3:29; 14:21; 2 aKor 7:10, 11)

  • Mmusome Luka 22:54-71.

    Exeeni ninwerya ahu wiixutta Pedru omukhootta wawe Yesu mu ohiyu wa oveleeliwa wawe ni otthukiwa? (Luk 22:60-62; Mat 26:31-35; 1 aKor 10:12)

  • Mmusome Luka 23:1-49.

    Yesu oonela sai sootakhala siireliwa awe, ni exeeni eniwerya ahu wiixutta mwa yeela? (Luk 23:33, 34; aRom 12:17-19; 1 Ped 2:23)

  • Mmusome Yohani 18:12-40.

    Nnaamwi Pedru mu okathi wa vakhaani aavaren’ye ni omoova mutthu, exeeni yoonen’ye mwaha wa wiilokiherya wawe ni okhala murummwa a vameekh’awe? (Yoh 18:25-27; 1 aKor. 4:2; 1 Ped 3:14, 15; 5:8, 9)

  • Mmusome Yohani 19:1-30.

    Moonelo xeeni ooweereryaneya Yesu aarina awe voohimya sa itthu sa werutthuni? (Yoh 2:1, 2, 9, 10; 19:23, 24; Mat 6:31, 32; 8:20)

    Moota xeeni masuu a okathi wa okhwa wa Yesu yaary’aya masuu a oxintta yaawo yaarina awe mu waakiherya olamulelo wa Yehova? (Yoh 16:33; 19:30; 2 Ped 3:14; 1 Yoh 5:4)