Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 81: Ororomela Nikhaliheryo Na Muluku

Mwaha 81: Ororomela Nikhaliheryo Na Muluku

ATTHU oowaattamelaka 50.000 anipaka mukwaha woorakama okhuma oBabilonia orowa oYerusalemu. Masi vaavo awo vaniphiya aya, Yerusalemu orii milepe suulupale paahi. Khuuvo onikhala mme. AnaIsarayeli ahaana oteka etthu eri yotheene vasyaa-tho.

Emosaa ya itthu soopacerya yeeyo awo eniteka aya ti altari. Ola opuro yoowo onrowa aya opakaka mukuttho a inamaa, aahiiso yoovaha, wa Yehova. Miyeeri vakhaani vattuli vaya anaIsarayeli annipacerya oteka empa ya Muluku. Masi anyokhani anikhala ilapo sa vakhiviru khaniphavela wira anaIsarayeli ateke ela. Siiso awo aneererya owoopopiha wira yaahiihe awosa oteka. Wanikisa waya, anyokhani ala animwiiriha mwene a niinano ooPersia opaka nlamulo wira muteko wooteka weemele.

Iyaakha sinnivara. Vano soovira iyaakha 17 okhuma vaavale anaIsarayeli vatthinka aya oBabilonia. Yehova onaarumiha maprofeta awe Hagayo ni Zakariya orowa waaleela atthu wira apacerye oteka vasyaa-tho. Atthu awo anniroromela yookhaliherya ya Muluku, nto awo anniwiiwelela maprofeta. Awo annipacerya oteka vasyaa-tho, hataa nlamulo nihimyaka wira awo ahiire ela.

Siiso muhooleli mmosaa ooPersia iitthaniwa Tatenayi onnoorwa wa anaIsarayeli ni waakoha ehakhi erina aya wira ateke empa ya Muluku. AnaIsarayeli yaahimuleela owo wira vaavo vaary’aya oBabilonia, Mwene Kiro aahaaleela awosa wira: ‘Murowee, vano, oYerusalemu ni mwateke empa ya Yehova, Muluku anyu.’

Tatenayi onirumiha epaphelo oBabilonia ni okoha akhala wira Kiro, yoowo vano okhwiiye, mwekeekhai aahilavula ele. Moohilokela epaphelo yookhuma wa mwene a niinano ooPersia ennitthika. Enihimya wira mwekeekhai Kiro aahilavula ela. Nto siiso mwene onilepa wira: ‘Mwaahiye anaIsarayeli ateke empa ya Muluku aya. Ni kinilamula wira nyuwo mwaakhaliherye awosa.’ Mu iyaakha soowiiraka xexee empa ya Muluku ennimalihiwa otekiwa, ni anaIsarayeli arii oohakalala vanceene.

Iyaakha sikina sinceene sinnivira. Vano soovira iyaakha soowaattamela 48 nuumala otekiwa empa ya Muluku. Atthu muYerusalemu arii oohaawa, nto muttetthe ni empa ya Muluku khisirina mooneelo ooreera. Ottuli oBabilonia Eezira muIsarayeli onnisuwela sa otthuneya waya olokiherya empa ya Muluku. Nto munnisuwela ele owo enivara awe?

Eezira onirowa onweha Artaserse, mwene ooPersia, nto mwene ola ooloka onimunnya Eezira soovaha sinceene wira okuxe otthikelaka oYerusalemu. Eezira onnaavekela anaIsarayeli oBabilonia wira amukhaliherye owo okuxa soovahiwa iya aroihaka oYerusalemu. Atthu oophiyeryaka 6.000 anihimya wira anoorowa. Awo aakhalana eparatha ni eweero yinceene ni itthu sikina sa esisapo yoowalamela wira akuxe.

Eezira orii ooxanka, okhala wira mphironi aakhala atthu ootakhala. Atthu ala waaniheryasa anookuxa eparatha ni eweero, ni owiiva awosa. Siiso Eezira onnaathukumanya atthu awo, ntoko nyuwo siniwerya anyu woona valataratoni va. Nuumala vo awo aninvekela Yehova wira oxeererye mukwaha aya woorakama wootthikela oYerusalemu.

Eezira onoovekela vamosa ni atthu a nloko nawe

Yehova tthiri onnaaxeererya awosa. Nto nuumala miyeeri mixexee sa mukwaha, awo anniphiya saana oYerusalemu. Ela khenooniherya wira Yehova onoowerya waaxeererya otheene yaale aniroromela nikhaliheryo nawe?

Ezira muruu 2 mpakha 8.



Makoho

  • Atthu akavii anipaka mukwaha woorakama okhuma oBabilonia orowa oYerusalemu, masi exeeni eniphwanya aya vaavo vaniphiya aya?
  • AnaIsarayeli anipacerya oteka exeeni vaavo vaniphiya aya, masi anyokhani aya anipaka exeeni?
  • Hagayo ni Zakariya tanii, nto anaaleela exeeni atthu?
  • Nthowa xeeni Tatenayi onirumiha awe epaphelo oBabilonia, nto onaakhuliwa sai?
  • Eezira onipaka exeeni vaavo vanisuwela awe sa otthuneya waya olokiherya empa ya Muluku?
  • Eezira oniveka exeeni valataratoni va, nnaakhuliwa sai nivekelo nawe, ni ninniixuttiha exeeni?

Makoho oowuncererya

  • Mmusome Ezira 3:1-13.

    Akhala wira nihiku nikina nrii nipuro nihikhanle muloko wa atthu a Muluku, exeeni enitthuneya ahu ovikaniha opaka? (Ezi 3:3, 6; Mit 17:16, 17; aHeb 13:15)

  • Mmusome Ezira 4:1-7.

    Ntakiheryo xeeni Zorobabeli nivanha awe wa atthu a Yehova voohimya sa wataaniha itiini? (Okhum 34:12; 1 aKor 15:33; 2 aKor 6:14-17)

  • Mmusome Ezira 5:1-5, 17 ni 6:1-22.

    Nthowa xeeni anamavaanyiha yahaawenrya aya omaaliha muteko wooteka empa ya Muluku? (Ezi 5:5; Yes 54:17)

    Moota xeeni mwiirelo wa alopwana oowunnuwela aaYuda sinaalipiha aya axitokweene a eKristau ophavelasa yoolakiherya ya Yehova vaavo vanikumana aya ni ovaanyihiwa? (Ezi 6:14; Sal 32:8; aRom 8:31; Yak 1:5)

  • Mmusome Ezira 8:21-23, 28-36.

    Nihinatthi opaka etthu eri yotheene, ntakiheryo xeeni na Eezira naarowa okhala nooloka otakiha? (Ezi 8:23; Sal 127:1; Mir 10:22; Yak 4:13-15)