Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 80: Nloko Na Muluku Ninnikhuma Obabilonia

Mwaha 80: Nloko Na Muluku Ninnikhuma Obabilonia

IYAAKHA soowaattamela piili soovira okhuma vaavale Babilonia vaakuxiwa awe ni aMedia ni aPersia. Nto nkawehani ele eniiraneya vano! Aayo, anaIsarayeli anookhuma mBabilonia. Aphwannye sai otaphuwa nno? Tanii oweemerenrye orowa?

Kiro, mwene ooPersia, toweemerenrye. Khalai, Kiro ohinatthi oyariwa, Yehova aahimuruma murumeyi awe Yesaya olepa sa owo: ‘Nyuwo munrowa opaka moolikanyiha ele eniphavela aka wira mupakee. Mikhora sinrowa ohiiwa soohuleya wira nyuwo mukuxee muttetthe.’ Nto mwekeekhai Kiro aahihoolela mu okuxa muttetthe wa oBabilonia. Amedia ni aPersia annikela mmuttettheni ohiyu aviraka mikhora seiyo saahiiwale soohuleya.

Masi mprofeta a Yehova Yesaya aahihimya-tho wira Kiro aarowa olamula wira Yerusalemu ni empa ya Muluku otekiwe vasyaa-tho. Niireke wira Kiro aahivaha nlamulo nna? Aayo, owo aahilamula. Ela tiiyo Kiro enihimya awe wa anaIsarayeli: ‘Vano, murooke, oYerusalemu ni oteka empa ya Yehova, Muluku anyu.’ Nto ela tiiyo anaIsarayeli enirowa aya opaka.

AnaIsarayeli anikhuma obabilonia

Masi khahiyo wira anaIsarayeli otheene oBabilonia toowerya opaka mukwaha woorakama wootthikela oYerusalemu. Ola mukwaha woorakamexa a ikiloomo soowiraka 800, ni anceene towuuluvalexa aahiiso owereyasiwa wira apake mukwaha woorakama. Ni aakhala mathowa makina aniiriha wi atthu akina ahirowe. Masi Kiro onihimya wa ale ahinrowa wira: ‘Mwaavahe eparatha ni eweero ni soovaha sikina atthu yaale anitthikela omuteka Yerusalemu ni empa ya Muluku.’

Siiso, soovaha sinceene anninnyiwa anaIsarayeli yaale anirowa oYerusalemu. Kiro aahaavahererya-tho awosa mihasa ni ikoopho seiye Mwene Nabukhodonosori saakunxa awe mu empa ya Yehova okathi waanyaanyiwa awe Yerusalemu. Nloko nookhalana itthu sinceene sookuxa mmukwaha wootthika.

Nuumala miyeeri soowiiraka mixexee sa mukwaha, anaIsarayeli anniphiya oYerusalemu mu okathi yoole waahimmwale. Iya iyaakha soomalela 70 okhumela vaavale waanyaanyiwa aya muttetthe, ni elapo eyo yaahiiwale yoohikhala atthu moomalela. Masi nnaamwi anaIsarayeli atthikenle ene vano elapo aya, awo anrowa okhalana okathi wa mixankiho, ntoko sinrowa ahu wiixutta moottharelana.

Yesaya 44:28; 45:1-4; Ezira 1:1-11.



Makoho

  • Ntoko sooniheriwa aya valataratoni va, anaIsarayeli anipaka exeeni?
  • Moota xeeni Kiro aakhwanihenrya awe eprofecia ya Yehova yaahimmwale ni Yesaya?
  • Kiro onaaleela exeeni anaIsarayeli yaale ahinwerya otthikela oYerusalemu?
  • Kiro onaavaha exeeni atthu wira akuxe atthikelaka oYerusalemu?
  • Sinivira miyeeri mikavii wira anaIsarayeli atthikele oYerusalemu?
  • Saavinre iyaakha kavii okhuma vaavale elapo yaahiiwale aya yoohikhala atthu moomalela?

Makoho oowuncererya

  • Mmusome Yesaya 44:28 ni 45:1-4.

    Moota xeeni Yehova saattittimihenrya awe waakhwanela wekeekhai wa eprofecia voohimya sa Kiro? (Yes 55:10, 11; aRom 4:17)

    Eprofecia ya Yesaya enimuthoonya Kiro enooniherya exeeni voohimya sa owerya wa Yehova Muluku mu ohimya vahinatthi sa muhoolo? (Yes 42:9; 45:21; 46:10, 11; 2 Ped 1:20)

  • Mmusome Ezira 1:1-11.

    Nttharaka ntakiheryo na yaale yaari oohiwerya otthikela oYerusalemu, ninwerya sai olelo ‘waakhaliherya’ ale aniwerya okela orummwa wa okathi wotheene? (Ezi 1:4, 6; aRom 12:13; aKol 4:12)