Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 77: Awosa Khiyuramenle

Mwaha 77: Awosa Khiyuramenle

NYUWO munnuupuwela wira mootoko wiiwa sa amiravo ala araruu? Aayo, awo apatthani a Daniyeli yaawo yaakhoottale olya ele yaari yoohiloka wa awosa. ABabilonia yaawiitthana awosa Xadraki, Mesaki ni Abedi-Nego. Masi nkaaweheeni awosa vano. Xeeni ohuuramelaka elatarato ela yuulupale moolikanasa ni akina? Nrowee noone.

Nyuwo munnuupuwela malamulo yaawo Yehova mwaneene yaalempe awe yiitthaniwa Sooruma Mulokoo? Noopacerya na yaawo ti nna: ‘Muhimukokhoreleke muluku mukina ohikhanle miyo paahi.’ Amiravo ala aniiwelela nlamulo nenna, nnaamwi ehikhanle etthu yookhweya wiira.

Nabukhodonosori, mwene ooBabilonia, oheetthana atthu anceene ootthuneya wira attittimihe elatarato ela yeeyo yeemenxa awe. Owo omalinhe niinano ohimya wa atthu otheene wira: ‘Vaavo vaniiwa nyu nsuu na nlope, na pankwe ni ikaruma sikina sa masipo, nyuwo muurameleke ni okokhorela elatarato ela ya eweero. Ori otheene yoowo ohinrowa wuuramela ni okokhorela onrowa ovonyeriwa niinanoru munlittini ninvarela mooro.’

Vaavo Nabukhodonosori vanisuwela awe wira Xadraki, Mesaki ni Abedi-Nego khiyuramenle, owo orii oonanariwa vanceene. Owo oniruma oruuhiwa. Owo onaavaha okathi mukina wira yuuramele. Masi amiravo awo animuroromela Yehova. ‘Muluku ahu yoowo onimurumeela ahu toowerya onoopola,’ awo animuleela Nabukhodonosori. ‘Masi hataa owo ohirowaka onoopola, khinnirowa wuuramela elatarato anyu ya eweero.’

Xadraki, Mesaki ni Abedi-Nego

Emaara eniiwa awe ela, Nabukhodonosori onnitepa onanariwa. Nookhala nlitti na mooro vakhiviru nto owo onilamula wira: ‘Mutetheererye nlitti nno na mooro ikwaha thanuu na piili oviha waya ovikana saary’aya!’ Nuumala vo onnaaruma alopwana ootupexa aanakhotto awe wira amutthukwe Xadraki, Mesaki ni Abedi-Nego ni waavonyerya awosa munlittini na mooro. Nlitti na mooro ti noovihexa mpakha malumi a mooro owiiva alopwana ootupexa. Masi sai voohimya sa amiravo araruu yaawo yaarihenlya aya?

Mwene oniweha munlittini na mooro, ni onikhala oowoova vanceene. ‘Khinaatthunkwe alopwana araruu ni waavonyerya munlittini na mooro wooviha?’ owo onnikoha.

‘Aayo, nihaavonyerya,’ annaakhula arumeyi awe.

‘Masi kiniwoona alopwana axexee yeettakasaka va mooroni,’ owo onnihimya. ‘Awo khatthukiwe, ni mooro khonaawereya awosa. Ni aneexexe onikhala ntoko muluku.’ Mwene onnaattamela mukhora a nlitti na mooro ni khiyakhuwela oriki: ‘Xadraki! Mesaki! Abedi-Nego! Mukhumee mmo, nyuwo arumeyi a Muluku a Muulupalexa!’

Vaavo awo vanikhuma aya ori otheene onniwerya woona wi awo khavulanle. Vattuli vaya mwene onihimya so: ‘Ottottopeliwe Muluku a Xadraki Mesaki ni Abedi-Nego! Owo oorumiha nlaikha nawe ni owoopola awosa mwaha woowi khiyuramenle ni omukokhorela muluku mukina voohikhala awaya.’

Nna khahiyo ntakiheryo nooloka na ororomeleya wa Yehova wira hiyo nitthareleke?

Okhuma 20:3; Daniyeli 3:1-23, 91-97.



Makoho

  • Yooruma xeeni Nabukhodonosori, mwene ooBabilonia, onaavaha awe atthu?
  • Nthowa xeeni apatthani araruu a Daniyeli ahinuuramela aya elatarato ya weero?
  • Vaavo Nabukhodonosori onaavaha awe aHeberi araruu okathi mukina wira yuuramele, anooniherya sai omuroromela waya Yehova?
  • Nabukhodonosori onaaruma alopwana awe owiiriha exeeni Xadraki, Mesaki ni Abedi-Nego?
  • Nabukhodonosori onoona-ni vaavo vaniweha awe munlittini na mooro?
  • Nthowa xeeni mwene vanimuttottopela awe Muluku a Xadraki, Mesaki ni Abedi-Nego, nto ntakiheryo xeeni nnivaha aya wa hiyo?

Makoho oowuncererya

  • Mmusome Daniyeli 3:1-19, 91-97.

    Muupuwelelo xeeni woonihenrya aya amiravo araruu aHeberi waatthuneya otthara arumeyi otheene a Muluku vaavo vanikumana aya ni soweehererya sa ompurukuma? (Dan 3:17, 18; Mat 10:28; aRom 14:7, 8)

    Etthu xeeni yootthuneya yeeyo Yehova yaamusominha awe Nabukhodonosori? (Dan 3:95, 96; 4:31, 32)