Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 76: Yerusalemu Onninyaanyiwa

Mwaha 76: Yerusalemu Onninyaanyiwa

SOOVIRA iyaakha 10 okhuma vaavale Mwene Nabukhodonosori vaakunxa awe anaIsarayeli oowiixuttihiwa saana aaroihaka oBabilonia. Nto vano nkawehani ele eniiraneya! Yerusalemu onoopahiwa. Ni anaIsarayeli yaale ahiiviwe anookuxiwa ntoko anamutthukiwa aroihiwaka oBabilonia.

Nkuupuwelani, ela tiiyo maprofeta a Yehova yaaloponlya aya wira yaarowa wiiraneya vakhala wira atthu khiyaarowa ottharuwa iphiro saya sootakhala. Masi anaIsarayeli khiyaawiriyanne maprofeta. Awo yaahivikaniha waakokhorela amuluku oowoka mmapuro mwa Yehova. Siiso nloko nne nanreerela ohukhummwa. Ninnisuwela ela okhala wira Ezekiyeli mprofeta a Muluku onninleela sa itthu sootakhala seiyo anaIsarayeli saavara aya.

Nyuwo munnimusuwela Ezekiyeli tanii? Owo ti mmosaa a amiravo yaale Mwene Nabukhodonosori yaakunxa awe aaroihaka oBabilonia iyaakha soovikanaka 10 vahinatthi wiiraneya ohononiwa nno wuulupale wa Yerusalemu. Daniyeli ni apatthani awe araruu, Xadraki, Mesaki ni Abedi-Nego, yaahikuxiwa-tho aroihiwaka oBabilonia mu okathi omosaru.

Ezekiyeli oryeene oBabilonia, Yehova onimooniherya owo itthu sootakhala siniiraneya oYerusalemu mu empa ya Muluku. Yehova onniira ele mwa mutikiniho. Ezekiyeli mwekeekhai nlelo orii oBabilonia, masi Yehova onnimuhiya oonaka etthu eri yotheene eniiraneya mu empa ya Muluku. Nto ele Ezekiyeli enoona awe ti yoowiiniha murima.

‘Nkawehani itthu iya soohiirya seiyo atthu sinivara aya va mpaani mwa Muluku,’ Yehova onimuleela Ezekiyeli. ‘Nkawehani ixirii soosareya ni ilatarato sa inowa ni inamaa sikina. Ni nkaaweheeni anaIsarayeli anookokhorela iyo!’ Ezekiyeli onniwerya woona itthu iya, ni owo onnilepa ele eniiraneya.

Atthu ootthukiwa annikumihiwa oYerusalemu

‘Munnoona ele ahooleli a Isarayeli enivara aya wiiphiini?’ Yehova onimukoha Ezekiyeli. Aayo, owo onniwerya-tho woona ela. Aakhala alopwana 70, ni otheene aya anaakokhorela amuluku oowoka. Awo anihimya wira: ‘Yehova khonnoona. Owo oohiya elapo.’

Nuumala vo Yehova onimooniha Ezekiyeli athiyana akina vamukhora a onikela epheyo a empa ya Muluku. Awo arookilaathi vale amukokhorelaka muluku oowoka Tamuzi. Ni nkaaweheeni alopwana ale otheene vamukhora a empa ya Yehova! Aakhala oophiyeryaka 25 a yaawo. Ezekiyeli onniwoona awosa. Awo anuuramela onikhuma nsuwa ni anikokhorela nsuwa!

‘Atthu ala khanikittittimiha,’ Onnihimya Yehova. ‘Awo khanivara sootakhala paahi masi anrwa mpakha mpa mwaka ni khiyavara itthu iyo!’ Siiso Yehova onnilaphela: ‘Awo anrowa woona ikuruu sa onanariwa waka. Ni nkinrowa owoonela othunku awosa vaavo vanihononiwa aya.’

Sivinre iyaakha tthaaru paahi nuumala Yehova omooniherya Ezekiyeli itthu iye vaavo anaIsarayeli animurukunuwela aya Mwene Nabukhodonosori. Nto owo onirowa owana ni awosa. Nuuvira mwaakha mmosaa ni nuusu aBabilonia annipwexa ixirii sa oYerusalemu ni opaha muttetthe. Anamunceene a atthu anniiviwa aahiiso okuxiwa ntoko anamutthukiwa aroihiwaka oBabilonia.

Xeeni Yehova ohiyaka onyaanyiwa nno wootakhala wiiraneyaka wa anaIsarayeli? Aayo, okhala wira awo khiyanwiriyanne Yehova ni khiyiiwelenle malamulo awe. Ela enooniherya wa hiyo moota ory’aya wootthuneya okathi wotheene ovara enihimya Muluku.

Wanipacerya atthu vakhaani anneemereriwa okhala mu elapo ya wIsarayeli. Mwene Nabukhodonosori onimukuha Muyuda iitthaniwa Gedaliya wira aaweheryeke atthu ala. Masi nuumala vo akina a anaIsarayeli annimwiiva Gedaliya. Vano nloko ti nowoova wira aBabilonia animoorwa ni waanyaanya otheene aya mwaha wa etthu yootakhala ela yiiranen’ye. Siiso awo animukhanyererya Yeremiya wira aatthare, nto awo annitthyawela wEjiitu.

Ela enniiriha elapo ya Isarayeli ohikhaliwa ni mutthu moomalela. Mu iyaakha 70 khuuvo onikhala mulaponi mme. Ela erii yoohikhaliwa moomalela. Masi Yehova onimmana natiri wira owo onrowa ottikiherya nloko nawe mulaponi nuumala iyaakha 70. Mu okathi yoowo exeeni eniiraneya ni nloko na Muluku mu elapo yoBabilonia weiwo oroihiwa aya? Nrowee niwehee.

2  Mamwene 25:1-26; Yeremiya 29:10; Ezekiyeli 1:1-3; 8:1-18.



Makoho

  • Exeeni eniiraneya ni Yerusalemu ni anaIsarayeli ntoko sooniheriwa aya valataratoni va?
  • Ezekiyeli tanii, nto itthu xeeni soohiirya Yehova sinimooniherya awe?
  • Okhala wira anaIsarayeli khanimuttittimiha Yehova, nto Yehova onilakela exeeni?
  • Mwene Nabukhodonosori onipaka exeeni nuumala anaIsarayeli omurukunuwela?
  • Nthowa xeeni Yehova vanihiya awe yoohonona ela yootakhala ewiiraneelaka anaIsarayeli?
  • Moota xeeni elapo ya Isarayeli enihiiwa aya ehikhanle atthu, ni mpakha iyaakha kavii?

Makoho oowuncererya

  • Mmusome 2 Mamwene 25:1-26.

    Tanii aari Zedekiya, exeeni yaamwiiranenle, ni moota xeeni ela yaakhwanenlya aya eprofecia ya Biibiliya? (2 Mam 25:5-7; Ezek 12:13-15)

    Yehova aavanhe aani nthowa na itthu sotheene sa ohiroromela seiyo Isarayeli aapanke awe? (2 Mam 25:9, 11, 12, 18, 19; 2 Wah 36:14, 17)

  • Mmusome Ezekiyeli 8:1-18.

    Moota xeeni eKristau Yoowoka enaatakiha aya aIsarayeli oomwareya anamakokhorela nsuwa? (Ezek 8:16; Yes 5:20, 21; Yoh 3:19-21; 2 Tim 4:3)