Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 72: Muluku Onimukhaliherya Mwene Ezekiya

Mwaha 72: Muluku Onimukhaliherya Mwene Ezekiya

NYUWO munnisuwela mwaha aya mulopwana ola vanivekela awe wa Yehova? Nthowa xeeni orihenlya awe ipaphelo iya ohoolo va altari a Yehova? Mulopwana owo ti Ezekiya. Owo ti mwene a mahimo manli a okuusini a Isarayeli. Nto owo orii mmuxankihoni muulupale. Nthowa xeeni?

Mwene Ezikiya onoovekela

Mwaha woowi anakhotto aAsiria aapwetexa mahimo 10 a onikela epheyo. Yehova oohiya ela yiiraneyaka okhala wira atthu ale yaari ootakhala vanceene. Nto vano anakhotto aAsiria ahoorwa owana ni omwene a mahimo manli.

Mwene aAsiria oruminhe niinano ipaphelo wa Mwene Ezekiya. Iya ti ipaphelo seiyo Ezekiya okunha awe vameithoni va Muluku. Ipaphelo iya sinninveeha Yehova, ni sinimuleela Ezekiya wooceya. Siiso nna ti nthowa aya Ezekiya vanivekela awe oriki: ‘Oh Yehova, munoopole wa mwene aAsiria. Nto maloko otheene anrowa osuwela wira nyuwo paahi ti muri Muluku.’ Nto Yehova onrowa onwiriyana Ezekiya?

Ezekiya orii mwene ooloka. Owo khahiyo ntoko mamwene ootakhala a omwene a mahimo 10 a Isarayeli, aahiiso oolikana ni Mwene Akhazi paapa awe ootakhala. Ezekiya aahikhalana ephoole mu wiiwelela malamulo otheene a Yehova. Siiso, nuumala Ezekiya ovekela, mprofeta Yesaya onirumiha mihupi sinikhuma wa Yehova: ‘Mwene aAsiria khonrowa okela muYerusalemu. Khuuvo mmosaa aatoropa awe onrowa-tho waattamela. Awo khanrowa ovonyerya hataa nreetthe nimosaa mmuttettheni.’

Nkawehani valataratoni mu nikukhu nna. Nyuwo munnaasuwela tanii atorapa ala otheene ookhwa? Awo Asiria. Yehova aahiruma nlaikha nawe, nto ohiyu omosaa nlaikha naahiwiiva atoropa aAsiria 185.000. Siiso mwene aAsiria aahooceya nto otthikela owaani.

Atoropa awasiria ookhwa ene

Omwene a mahimo manli onnoopoliwa, nto atthu aakhalana murettele mu okathi wa vakhaani. Masi nuumala okhwa Ezekiya mwanawe Manasee onnikhala mwene. Manasee ni Amoni mwanawe aamuttharenle oowanli aya annikhala mamwene ootakhala vanceene. Siiso vasyaa-tho elapo ennisareya ni otakhala ni ohaaxa. Vaavo Mwene Amoni vaniiviwa awe ni arumeyi awexa, Yosiya mwanawe onnipakiwa mwene a omwene a mahimo manli.

2 Mamwene 18:1-36; 19:1-37; 21:1-25.



Makoho

  • Valataratoni va mulopwana owo tanii, ni nthowa xeeni ory’awe mmixankiho sinceene?
  • Ipaphelo xeeni seiyo Ezekiya okunha awe vameithoni va Muluku, ni exeeni Ezekiya enivekela awe?
  • Ezekiya mwene a muthinto xeeni, ni mihupi xeeni Yehova sinimurumihela awe orweela mwa profeta Yesaya?
  • Nlaikha na Yehova nniwiiriha exeeni Asiria, ntoko sooniheriwa aya valataratoni va?
  • Nnaamwi omwene wa mahimo manli orineene murettele mu okathi wa vakhaani, exeeni eniiraneya nuumala okhwa Ezekiya?

Makoho oowuncererya

  • Mmusome 2 Mamwene 18:1-36.

    Moota xeeni Rabsakee namuhupi a Asiria aahaayasa awe otteettheeha nroromelo na anaIsarayeli? (2 Mam 18:19, 21; Okhum 5:2; Sal 64:4)

    Vaavo vanikumana aya ni anamavaanyiha, moota xeeni Anamoona a Yehova anitthara aya ntakiheryo na Ezekiya? (2 Mam 18:36; Sal 39:2; Mir 26:4; 2 Tim 2:24)

  • Mmusome 2 Mamwene 19:1-37.

    Moota xeeni atthu a Yehova olelo animutakiha aya Ezekiya okathi wooxanka? (2 Mam 19:1, 2; Mir 3:5, 6; aHeb 10:24, 25; Yak 5:14, 15)

    Ikwaha xeeni tthaaru sa oxinttiwa saakumanne awe Mwene Senakeribi, nto eprofecia ela yaamuthoonyerya aani? (2 Mam 19:32, 35, 37; Wis 20:2, 3)

  • Mmusome 2 Mamwene 21:1-6, 16.

    Nthowa xeeni vanihimmwa aya wira Manasee aari mwene mmosaa ootakhalexa mmamwene otheene yaalamulenle oYerusalemu? (2 Wah 33:4-6, 9)