Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 71: Muluku Onimuleiherya Parayiisu

Mwaha 71: Muluku Onimuleiherya Parayiisu

ELA elatarato ya eparayiisu waaniheryasa ntoko siisaale Muluku saamooninha awe mprofeta Yesaya. Yesaya aakhanle nuumala okhwa Yona.

Atthu ari mParayiisu

Eparayiisu enitaphulela “ematta ya ithutuu” aahiiso “eparkhi.” Ela kheniwuupuxeryani etthu ekina yoonalya ahu muliivuruni-mu? Enlikana tthiri ni ematta ya ithutuu yooreera yeeyo Yehova Muluku yaapakenlya awe Adamu ni Eva, khahiyo siiso? Masi niireke wira elapo yotheene enrowa okhala eparayiisu?

Yehova aahimuleela mprofeta Yesaya wira olepe sa eparayiisu esyaa yeeyo enrwa wa nloko na Muluku. Owo aahimye so: ‘Miici ni ipwittipwitthi sinrowa okhalaka vamosaa ni murettele. Axinyompe ni axikharamu anrowa olyaaka vamosaa, nto anamwane anrowa weettihaka ni olyiha. Hataa mwaana khonrowa olummwa akhala wira onrowa othweelaka vakhiviru va enowa yootakhala.’

Anceene anoohimya wira, ‘Ela khenrowa wiiraneya. Okathi wotheene wookhala muxankiho mulaponi, ni nlelo onrowa ovikaniha okhala.’ Masi muupuwelele ela: Waari sai opuro wookhala yoowo Muluku aavanha awe Adamu ni Eva?

Muluku aakunhe mparayiisu Adamu ni Eva. Paahi okhala wira awo khiyaamwiiwelenle Muluku siiso awo yaahiyeleela opuro aya wooreera, yaahuuluvala ni okhwa. Muluku oolakela wira onrowa ovaha nloko nenno nnimphenta itthu imosaru seiye siyeleenlya aya Adamu ni Eva.

Mu eparayiisu esyaa eyo enrwa, khiivo enrowa ovulaliha aahiiso ohonona. Mme munrowa okhala murettele wekeekhai. Atthu otheene anrowa okhala akumi ni oohakalala. Ela enrowa okhala ntoko siisaale Muluku saaphavenlya awe wanipacerya. Masi hiyo ninrowa wiixutta muhoolo moota Muluku sinrowa awe opaka ela.

Yesaya 11:6-9; Wisupulula 21:3, 4.



Makoho

  • Yesaya aari aani, aakhanle okathi xeeni, nto Yehova aamoonihenrye exeeni?
  • Nintaphulela exeeni nsuu noowi “eparayiisu”, nto ela eniwuupuxeryani exeeni?
  • Yehova onimuleela exeeni Yesaya wira olepe voohimya sa eParayiisu esyaa?
  • Nthowa xeeni Adamu ni Eva vaayeleelalya aya etthoko aya yooreera?
  • Natiri xeeni Yehova onaamanela awe otheene yaale animphenta?

Makoho oowuncererya

  • Mmusome Yesaya 11:6-9.

    Moota xeeni Masuu a Muluku anooniherya aya murettele onrowa okhala eriyari ya inamaa ni apinaatamu mu elapo esyaa? (Sal 148:10, 13; Yes 65:25; Ezek 34:25)

    Waakhwaniheriwa xeeni woomunepani wa masuu a Yesaya okhanle eriyari ya atthu a Yehova olelo? (aRom 12:2; aEf 4:23, 24)

    Tanii oniphwanelela ovuwa mu orukunuwa wa mikhalelo sa apinaatamu vano ni elapo esyaa? (Yes 48:17, 18; aGal 5:22, 23; aFil 4:7)

  • Mmusome Wisupulula 21:3, 4.

    Moota xeeni Soolempwa sinooniherya aya wi Muluku okhalaka ni apinaatamu onitaphulela okhala mwa nthoonyeryo vathii vaava, ohiya mmukhalelo wowooneya? (Onam 26:11, 12; 2 Wah 6:18; Yes 66:1; Wis 21:2, 3, 22-24)

    Muthinto xeeni wa maithori ni ohaawa onrowa omalihiwa? (Luk 8:49-52; aRom 8:21, 22; Wis 21:4)