Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 70: Yona Ni Ehopa Yuulupale

Mwaha 70: Yona Ni Ehopa Yuulupale

NKANWEHEENI mulopwana owo mmaasini. Owo orii mmuxankiho muulupale, khahiyo siiso? Ehopa eyo eniphavela ommirya! Nyuwo munnimusuwela tanii ola? Nsina nawe ti Yona. Nrowee niwehee moota sikenlya awe mmuxankiho muulupale.

Yona mprofeta a Yehova. Khivavinre okathi munceene nuumala okhwa mprofeta Eliseyo vaavo Yehova vanimuleela awe Yona wira: ‘Murowee muttetthe muulupale wa oNiinive. Otakhala wa atthu ale ti wuulupale, ni kimphavela wira nyuwo mwaaleele awosa voohimya sa ela.’

Yona ni ehopa yuulupale

Masi Yona khomphavela orowa. Siiso owo onipakhira ekalawa enirowa mpantta mukina voohikhala oNiinive. Yehova khonisiveliwa ni Yona mwaha wootthyawa. Siiso Yehova onimukumiherya munamukhaya muulupale. Aari ootakhalexa mpakha ekalawa ohaleela omiryeya. Animweettiha pakiti annoova vanceene, nto awo annikhuwela wa amuluku aya aphavelaka nikhaliheryo.

Wanikisa waya Yona onaaleela so: ‘Miyo kinimukokhorela Yehova, Muluku yoowo opanke erimu ni elapo. Nto miyo kintthyawa opaka yeele Yehova okileelalya awe ovara.’ Siiso animweettiha pakiti anikoha so: ‘Niwiiriheni exeeni wira omaale munamukhaya ola?’

‘Mukirihele mphareya, nto ephareya enrowa omaala-tho,’ onnihimya Yona. Animweettiha pakiti khamphavela wiira ela, masi vaavo munamukhaya vanitepa awe wanikisa waya awo annimurihela Yona otaa wa ekalawa. Niinanoru munamukhaya onnimaala, nto ephareya ennimaala vasyaa-tho.

Vaavo Yona vanimiryeya awe mmaasini, ehopa yuulupale ennimmirya. Masi owo khonikhwa. Mmahiku mararuu othana ni ohiyu owo orii mmirimani mwa ehopa. Yona onniriipiwa murima vanceene mwaha woowi khomwiiwelenle Yehova mu orowa oNiinive. Siiso nyuwo munnisuwela yeeyo enipaka awe?

Yona onivekela wa Yehova ovekaka nikhaliheryo. Nto Yehova oniiriha wi ehopa emurapheye Yona vatthayani yowuuma. Nuumala vo Yona onirowa oNiinive. Ela khenniixuttiha wira ti vootthuneya wi hiyo nivareke etthu eri yotheene enihimya Yehova?

Eliivuru ya Yona.



Makoho

  • Yona tanii, ni exeeni Yehova enimuhimeerya awe opaka?
  • Okhala wira khoniphavela orowa iwee Yehova aamurummya awe, exeeni Yona enipaka awe?
  • Exeeni Yona enaaleela awe opaka animweettiha pakiti wira omaale munamukhaya?
  • Ntoko siniwerya anyu woona valataratoni va, exeeni eniiraneya vaavo Yona vanimiryeya awe mmaasini?
  • Mahiku makavii Yona onikhala awe mmirimani mwa ehopa yuulupale, ni exeeni enipaka awe mme?
  • Nuumala okhuma mmirimani mwa ehopa yuulupale Yona onirowa woowi, nto ela enniixuttiha exeeni?

Makoho oowuncererya

  • Mmusome Yona 1:1-2:1.

    Mowooneya, Yona oonenle sai voohimya sa yoothanleliwa awe ya waalaleerya atthu a oNiinive? (Yona 1:2, 3; Mir 3:7; Mus 8:12)

  • Mmusome Yona 2:2, 3, 11.

    Moota xeeni yookumanana ya Yona ennivaha aya nroromelo wira Yehova onimwaakhula mavekelo ahu? (Sal 22:25; 34:7; 1 Yoh 5:14-15)

  • Mmusome Yona 3:1-10.

    Yoolipiha xeeni eniphwanya ahu mwaha woowi Yehova aahivikaniha onvarihela muteko Yona hataa wanipacerya aakhoottale yoothanleliwa awe? (Sal 103:14; 1 Ped 5:10)

    Yookumanana ya Yona ni atthu a oNiinive enniixuttiha exeeni voohimya sa waaphukela atthu a muttetthe ahu? (Yona 3:6-9; Mus 11:6; Mit 13:48)