Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 67: Yosafati Onimuroromela Yehova

Mwaha 67: Yosafati Onimuroromela Yehova

NYUWO munnaasuwela tanii alopwana ala ni exeeni enipaka aya? Awo anirowa okhottoni, nto alopwana ale ohoolo animwiipa. Masi nyuwo pooti okoha wira: ‘Xeeni alipa-aniipa ahikunxe aya ikatana ni mavaka oowanana?’ Nrowee niwehee.

AnaIsarayeli anirowa okhottoni

Yosafati mwene a mahimo manli a omwene a wIsarayeli. Owo onikhala okathi omosaru wa Mwene Akhabi ni Yezabeli a mahimo 10 a omwene a onikela epheyo. Masi Yosafati mwene ooloka, nto Asa paapa awe aari-tho mwene ooloka. Siiso mu iyaakha sinceene atthu a omwene a mahimo manli a okuusini annihakalalela okumi wooloka.

Masi vano enniiraneya etthu ekina eniiriha nloko woova. Anamihupi animuleela Yosafati wira: ‘Muttitthi muulupale wa anakhotto anikhuma elapo ya oMowabi, Amoni ni Mwaako Siyeri anrwa wira yootupheleni.’ AnaIsarayeli anceene annithukumana oYerusalemu wira aphavelase nikhaliheryo na Yehova. Awo anirowa empa ya Muluku, nto Yosafati onnivekela iiraka: ‘Oh Yehova Muluku ahu, hiyo khininsuwela yoowiira. Hiyo khininwerya owana ni muttitthi ola wa anakhotto. Hiyo ninweha wa nyuwo.’

Yehova onniwiriyana, nto onnimuruma mmosaa a arumeyi awe oleela nloko wira: ‘Ekhotto khahiyo yawinyu, masi ti ya Muluku. Nyuwo khimunrowa owana. Nweheke paahi, ni moone moota Yehova sinrowa awe woovuluxani.’

Siiso mmeeloni mwaya voosiisu Yosafati onileela nloko wira: ‘Mmuroromele Yehova!’ Nto owo onaakuha alipa-oowiipa ohoolo wa atoropa awe, nto ariki mweetta awo anniipa nttittimiho na Yehova. Nyuwo munnisuwela eniiraneya vaavo vaniphiya aya vakhiviru va ekhotto? Yehova onniwiiriha atoropa a anyokhani owana yaaworu. Nto vaavo anaIsarayeli vaniphiya aya, khuta toropa a anyokhani ohookhwa!

Kaakhanle amiruku Yosafati mu omuroromela Yehova? Hiyo ninrowa okhala amiruku namuroromela-tho Owo.

1 Mamwene 22:41-53; 2 Wahala 20:1-30.


Makoho

  • Yosafati tanii, ni onikhala okathi xeeni?
  • Nthowa xeeni anaIsarayeli ary’aya oowoova, nto anamunceene a yaawo exeeni enipaka aya?
  • Waakhula xeeni Yehova onivaha awe wa nivekelo na Yosafati?
  • Etthu xeeni Yehova eniiriha awe wiiraneya ekhotto ehinatthi opacerya?
  • Etthu xeeni eniwerya ahu wiixutta wa Yosafati?

Makoho oowuncererya

  • Mmusome 2 Wahala 20:1-30.

    Moota xeeni Yosafati soonihenrya awe ele yaatthuneya aya opakaka arumeyi oororomeleya a Muluku vaavo vanikumana aya ni mikhalelo sowoopiha? (2 Wah 20:12; Sal 25:15; 62:1)

    Okhala wira mahiku otheene Yehova oovarihela muteko ephiro ya olavulihana vaavo vanaathokorerya awe atthu awe, ephiro xeeni enivarihela awe muteko olelo? (2 Wah 20:14, 15; Mat 24:45-47; Yoh 15:15)

    Vaavo Muluku vanrowa awe okumiherya ‘ekhotto ya nihiku nuulupale na Muluku Oowerya Sotheene,’ moota xeeni mukhalelo ahu onrowa aya olikanasa ni a Yosafati? (2 Wah 20:15, 17; 32:8; Wis 16:14, 16)

    Yaatakihaka aLevi, mapioneero ni mamissionaario anipaka yoovaha ya mukhalelo xeeni mmuteko wa olaleerya wa elapo yotheene olelo? (2 Wah 20:19; aRom 10:13-15; 2 Tim 4:2)