Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 64: Salomoni Oniteka Empa Ya Muluku

Mwaha 64: Salomoni Oniteka Empa Ya Muluku

OHINATTHI Davidi okhwa, owo aahinvaha Salomoni ithoonyeryo sa Muluku sa itekelo empa ya Yehova. Mwaakha wa neexexe wa olamulelo awe, Salomoni onnipacerya oteka empa ya Muluku, nto ela yaahipisa iyaakha thanuu na piili ni nuusu wira emale. Ikonto miloko sinceene sa atthu annivara muteko mu empa ya Muluku, nto empa eyo yaahiyiiha musurukhu munceene, munceenexa. Okhala wira yoovariheliwa muteko eweero ni eparatha yinceene.

Empa eyo ya Muluku yookhalana ikwaartu piili suulupale, ntoko saarina aya etabernaakulu. Masi ikwaartu iya sihinnuwa ikwaha piili ovikana iye sa etabernaakulu. Salomoni onniiriha wi nivuku na wataana nikuhiwe muhina mwa ekwaartu ya empa ya Muluku, nto itthu sikina saasukiwe mutabernaakulu sinikuhiwa ekwaartu ekina.

Vaavo vanimalihiwa aya empa ya Muluku, vaakhala nto niira nuulupale. Salomoni onikhoroma ohoolo wa empa ya Muluku ni onavekela, ntoko nyuwo muniwerya anyu oweha valataratoni va. ‘Hataa wirimu wene wotheene khonoophiyeryani okhala,’ onnihimya Salomoni wa Yehova, ‘vootepexa, nto, ohiwerya wa empa ela woophiyeryani. Masi, Oh Muluku aka, xontte mwaawiriyane atthu vaavo awo vanrwa aya ovekela nipuro nna.’

Mwene Salomoni onolompa

Vaavo Salomoni vanimaliha awe nivekelo nawe, mooro onnikhuruwa okhumaka wirimu. Ola onnipaha mukuttho wa inamaa yoowo waapakiwe. Nto waarya wa muthuko a Yehova onnisarya empa eyo. Ela enooniherya wira Yehova onninwiriyana, ni wira owo oohakalala ni empa eyo ni nivekelo na Salomoni. Empa ya Muluku, mu nipuro na etabernaakulu, nookhala vano nipuro nenno atthu anrwa aya okokhorela.

Mu okathi woorakama Salomoni onilamulela mmukhalelo wa miruku, nto atthu annihakalala. Masi Salomoni onaathela athiyana anceene a ilapo sikina yaawo ahimmukokhorela Yehova. Nyuwo munniwerya onweha mmosaa a yaawo okokhorelaka ohoolo wa muluku a ethiru? Wanikisa waya axaarawe yaahimwiiriha Salomoni waakokhorela-tho amuluku akina. Nyuwo munnisuwela yeeyo eniiraneya vaavo Salomoni vanipaka awe ela? Owo khonaakhapelela-tho atthu moophenta. Owo ookhala ootakhala murima, ni atthu khanihakalala-tho.

Mwene Salomoni onaakokhorela amuluku eethiru

Ela ennimwiiriha Yehova onanariwa ni Salomoni, nto owo onimuleela so: ‘Kinrowa okumiha omwene wa nyuwo ni omunnya mutthu mukinaku. Nkinrowa opaka ela okathi wa okumi anyu, masi okathi wa olamulelo wa mwaninyu. Masi nkinrowa waakuxa atthu otheene moomweneni wa mwaninyu.’ Nrowee niwehee moota siiranen’ya aya.

1 Wahala 28:9-21; 29:1-9; 1 Mamwene 5:15-32; 2 Wahala 6:12-42; 7:1-5; 1 Mamwene 11:9-13.



Makoho

  • Saavinre iyaakha kavii wira Salomoni omalihe oteka empa ya Yehova, ni nthowa xeeni vaayiihalya aya musurukhu munceene?
  • Ikwaartu kavii suulupale sikhanle mu empa ya Muluku, nto etthu xeeni ekuhiwe muhina mwa ekwaartu?
  • Exeeni enihimya awe Salomoni mu nivekelo nawe vaavo empa ya Muluku vanimala aya?
  • Moota xeeni Yehova sinooniherya awe wira onnisiveliwa ni nivekelo na Salomoni?
  • Axaarawe Salomoni animwiiriha opaka exeeni, nto exeeni eniiraneya ni Salomoni?
  • Nthowa xeeni Yehova vananariwa awe ni Salomoni, nto etthu xeeni Yehova enimuhimeerya awe?

Makoho oowuncererya

  • Mmusome 1 Wahala 28:9, 10.

    Moovariha ni masuu a Davidi ari mu 1 Wahala 28:9, 10, wiimananiha xeeni nintthuneya ahu opaka mu okumi ahu wa khuta nihiku? (Sal 19:15; aFil 4:8, 9)

  • Mmusome 2 Wahala 6:12-21, 32-42.

    Moota xeeni Salomoni soonihenrya awe wira khiivo yooteka ya mutthu eniwerya ophiyerya okhala Muluku Muulupalexa? (2 Wah 6:18; Mit 17:24, 25)

    Anooniherya exeeni masuu a Salomoni aniphwanyaneya mu 2 Wahala 6:32, 33 voohimya sa Yehova? (Mit 10:34, 35; aGal 2:6)

  • Mmusome 2 Wahala 7:1-5.

    Ntoko siisaale anamwane a Isarayeli yaakuxiwa aya murima mu omuttottopela Yehova mwaha wa woona ovuwa wawe, nto ela ennivara sai olelo vaavo vaniweha ahu mareeliho a Yehova wa atthu awe? (2 Wah 7:3; Sal 22:23; 34:2; 96:2)

  • Mmusome 1 Mamwene 11:9-13.

    Moota xeeni mweettelo wa okumi wa Salomoni sinooniherya aya otthuneya waya ovikaniha okhala oororomeleya mpakha wanikisa? (1 Mam 11:4, 9; Mat 10:22; Wis 2:10)