Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 61: Davidi Onipakiwa Mwene

Mwaha 61: Davidi Onipakiwa Mwene

SAWULI onneererya-tho onvara Davidi. Owo onaakuxa atoropa awe ootupexa 3.000 ni onarowa omuhaayasa Davidi. Vaavo Davidi vanisuwela awe ela, owo onaaruma anamahottela orowa osuwela vaamanka awe Sawuli n’atthu awe ohiyu. Nto Davidi onnaakoha atthu awe anli wira: ‘Tanii a nyuwo onrowa ni miyo omuxaxani wa Sawuli?’

Davidi onimwiitthana Mwene Sawuli

‘Miyo kinoorowa,’ onnaakhula Abixayi. Abixayi mwaana a Serwiya murokorawe Davidi. Okathi yoole Sawuli ni atthu awe yiira aya arupaka, Davidi ni Abixayi anniita arowaka omuxaxani. Awo annikuxa nivaka na Sawuli ni murinki awe a maasi, yoowo aari vakhiviru va muruu wa Sawuli. Khuuvo mutthu mukina onaaweha aahiiso owiiwa okhala wira otheene aya aarupa vanceene.

Munwehee Davidi ni Abixayi vano. Awo ahoopowa, nto aaphiya saana vasuluu va mwaako. Davidi onnikhuwela wa muhooleli a anakhotto a Isarayeli oriki: ‘Abineri, exeeni muhimusukaka pwiya anyu, mwene? Nkawehani! Nivaka nawe nrii vaavi ni murinki awe a maasi?’

Sawuli onnivenya vaarupa awe. Owo onnisuwela nsuu na Davidi, ni onnikoha wira: ‘Ti nyuwo, Davidi?’ Nyuwo munniwerya onweha Sawuli ni Abineri vathii vale?

‘Aayo, pwiy’aka mwene,’ Davidi onnimwaakhula Sawuli. Nto Davidi onikoha wira: ‘Xeeni muneererya anyu okivara miyo? Etthu xeeni yootakhala evanrya aka? Nna nivaka nanyu, Oh mwene. Mmurume mmosaa a atthu anyu wira orwee okuxe.’

Mwene Sawuli ori ni Abineri

‘Kihiira etthu yoohiloka,’ onneemererya Sawuli. ‘Kihiira moololo.’ Nto okathi yoowo Davidi onnirowa, ni Sawuli onnihokolowela owaani. Masi Davidi onnihimya wa owo mwaaneene wira: ‘Nihiku nikina Sawuli onrowa okiiva. Miyo koohaana otthyawela elapo ya aFilisti.’ Nto eyo ti etthu enipaka awe. Davidi onniwerya waawoka aFilisti ni owiiriha awo okupali wira owo vano orii mu mpantta aya.

Okathi mukina vattuli vaya, aFilisti annirowa owana ni Isarayeli. Mukhottoni, oowanli aya Sawuli ni Yonathani anniiviwa. Ela ennimwiiriha Davidi oriipiwa murima vanceene, nto onnilepa nsipo nooreera, nenno nniipa awe so: ‘Kooriipiwa murima mwaha wa nyuwo, munna aka Yonathani. Moota aarya anyu oophenteya wa miyo!

Nuumala ela Davidi onihokolowela wIsarayeli muttetthe wa oHebroni. Vaakhala ekhotto eriyari ya atthu yaawo yaamuthanlale Ixiboxethi mwaana a Sawuli okhala mwene ni atthu akina yaawo amphavela wira Davidi okhalee mwene. Masi wanikisa waya atthu a Davidi annixintta. Davidi orina iyaakha 30 vaavo vanipakiwa awe mwene. Moowiiraka iyaakha thanuu ni piili ni nuusu owo onilamulela oHebroni. Anamwane akina aayanrya awe weiwe masina aya ti Amoni, Absalomi ni Adonayi.

Okathi woophiya vaavo Davidi ni atthu awe vanrowa aya otuphela muttetthe wooreera wiitthaniwa Yerusalemu. Yowabi, mwaana a Serwiya murokorawe Davidi, onihoolela ekhotto. Siiso Davidi onimutthuvela Yowabi ompakaka okhala muhooleli aanakhotto awe. Vano Davidi onnipacerya olamulela mmuttetthe wa oYerusalemu.

1 Samuweli 26:1-25; 27:1-7; 31:1-6; 2 Samuweli 1:26; 3:1-21; 5:1-10;



Makoho

  • Exeeni Davidi ni Abixayi yaapanke aya vaavo Sawuli vaarupa awe mmuxaxani mwawe?
  • Makoho xeeni Davidi animukoha awe Sawuli?
  • Nuumala omuhiya Sawuli, Davidi onirowa woowi?
  • Exeeni enimwiiriha Davidi oriipiwa murima vanceene, enimwiiriha olepa nsipo nooreera?
  • Davidi orina iyaakha kavii vaavo vanipakiwa awe mwene a oHebroni, ni taavi ari masina a an’awe akina aaxilopwana?
  • Valokenle ene, Davidi onilamulela woowi ntoko mwene?

Makoho oowuncererya

  • Mmusome 1 Samuweli 26:1-25.

    Masuu a Davidi ahimmwale mu 1 Samuweli 26:11 anooniherya muupuwelelo xeeni voohimya sa orummwa woomuluku? (Sal 37:7; aRom 13:2)

    Vaavo vanipaka ahu wiimananiha wekeekhai mu wooniherya oreerela murima masi kihiyaphwanya waakhuleliwa ni akina, moota xeeni masuu a Davidi aniphwanyaneya mu 1 Samuweli 26:23 annikhaliherya aya okhalana muupuwelelo wooloka? (1 Mam 8:32; Sal 18:21)

  • Mmusome 2 Samuweli 1:26.

    MaKristau aniwerya sai olelo wunnuuherya mukhalelo mmosaru wa ‘okhalela nthiti ophentana’ mukina ni mukhw’awe yoowo waarina awe Davidi ni Yonathani? (1 Ped 4:8; aKol 3:14; 1 Yoh 4:12

  • Mmusome 2 Samuweli 5:1-10.

    Iyaakha kavii Davidi saalamulenlya awe ntoko mwene, nto saakawanyen’ye sai iyaakha iyo? (2 Sam 5:4, 5)

    Davidi anvanhe aani otokweene, ni moota xeeni ela enirumeela aya ntoko yowuupuxerya wa hiyo olelo? (2 Sam 5:10; 1 Sam 16:13; 1 aKor 1:31; aFil 4:13)