Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 60: Abigayili Ni Davidi

Mwaha 60: Abigayili Ni Davidi

NYUWO munnimusuwela muthiyana owo ooreera yoowo onrwa okumana ni Davidi? Nsina nawe Abigayili. Owo ookhalana muupuwelelo ooloka, nto onnimuhiiha Davidi opaka etthu yootakhala. Masi nihinatthi wiixutta eyo, nrowee niwehee emwiiranenle Davidi.

Nuumala Davidi omutthyawa Sawuli, owo oniipitha munikhukuni. Annawe ni oohalela a emusi awe orina hoothe weiwe. Atthu oophiyeryaka 400 annoorwa wa owo, nto Davidi onnikhala muhooleli aya. Nuumala vo Davidi onnirowa wa mwene a oMowabi ni onahimya oriki: ‘Xontte nweemererye apaapa ni amaama wira akhalee ni nyuwo mpakha woona ele enrowa okiiraneela.’ Vattuli vaya Davidi ni atthu awe annipacerya wiipitha mmiyaakoni.

Vaari nuumala wiiraneya ela vaavo Davidi vanikumana awe ni Abigayili. Nabali iyawe Abigayili ti thaaciri mwaneene imatta. Owo ookhalana ipwittipwitthi 3.000 ni ipurii 1.000. Nabali orii mutthu ootakhala. Masi Abigayili mwaarawe tooreera saana. Nave-tho, onnisuwela moota woopaka etthu yooloka. Okathi mukina aahoopola-tho emusi awe. Nrowee noone moota siiranen’ya aya.

Davidi ni atthu awe yaahimureerela murima Nabali. Awo yaahimukhaliherya waakiherya ipwittipwitthi sawe. Siiso nihiku nimosaa Davidi onaaruma amosaa a atthu awe onvekela nikhaliheryo Nabali. Atthu a Davidi anrowa wa Nabali okathi yoole owo ni anamakhaliherya awe yaavukula aya manri a ipwittipwitthi. Nna nihiku na efesta, nto Nabali ookhalana soolya sooloka sinceene. Siiso ela ti etthu atthu a Davidi enihimya aya: ‘Hiyo nihooreerelani murima. Hiyo khiniiyale epwittipwitthi eri yotheene yawinyu, masi nihookhaliheryani okhapelela. Vano, xontte, nivaheeni yoolya.’

Nkinrowa waavaha yoolya aka atthu ntoko nyuwo,’ onnihimya Nabali. Owo onilavula mmukhalelo wootakhala, nto onilavula itthu sootakhala voohimya sa Davidi. Vaavo atthu awo vanitthika aya ni omuleela ela Davidi, Davidi onninanariwa vanceene. ‘Muhele munuuvoni ikatana sanyu!’ owo onaaleela atthu awe. Nto awo annipacerya mukwaha aya woorowa omwiiva Nabali ni atthu awe.

Atthu akina a Nabali, yaawo yiiwale masuu ootakhala yaalavunle Nabali, animuleela Abigayili ele yiiranen’ye. Niinanoru Abigayili onilokiherya yoolya. Onaakapattiha yoolya abuuru ni onnipacerya mukwaha awe. Vaavo vanikumana awe ni Davidi, owo onnikhuruwa vabuuruni vawe, onakhoroma oriki: ‘Xontte, pwiya, muhimucalele iyaka Nabali. Owo mulolo, nto onipaka itthu sa ololo. Yoovaha ela. Xontte mwaakhelele, nto munlevelele mwaha wa ele yiiranen’ye.’

Abigayili oniruuha yoolya wa Davidi

‘Nyuwo mwa muthiyana a miruku,’ onnaakhula Davidi. ‘Nyuwo mookihiiha miyo omwiiva Nabali wira kimuttikiherye otakhala wawe. Vano murowee owaani ni murettele.’ Vattuli vaya, vaavo Nabali vanikhwa awe, Abigayili onnikhala mmosaa a axaarawe Davidi.

1 Samuweli 22:1-4; 25:1-43.



Makoho

  • Nsina nawe tanii muthiyana owo onrowa okumana ni Davidi valataratoni va, ni muthiyana a mukhalelo xeeni?
  • Nabali tanii?
  • Nthowa xeeni Davidi vanaarumiha awe alopwana awe akina orowa oveka etthu wa Nabali?
  • Exeeni Nabali enaaleela awe alopwana a Davidi, nto Davidi onaakhula sai?
  • Moota xeeni Abigayili sinooniherya awe wira muthiyana a miruku?

Makoho oowuncererya

  • Mmusome 1 Samuweli 22:1-4.

    Moota xeeni emusi ya Davidi yaavanha aya ntakiheryo noolokexa mmoota saatthuneya ahu okhaliheryanaka mukina ni mukhw’awe mu emusi yoowiiraana ya eKristau? (Mir 17:17; 1 aTes 5:14)

  • Mmusome 1 Samuweli 25:1-43.

    Nthowa xeeni Nabali onihimmwa awe okhala mutthu oonyohola? (1 Sam 25:2-5, 10, 14, 21, 25)

    Etthu xeeni maKristau axithiyana ootheliwa a olelo eniwerya aya wiixutta mu ntakiheryo na Abigayili? (1 Sam 25:32, 33; Mir 31:26; aEf 5:24)

    Itthu xeeni piili sootakhala Abigayili saamuhiihalya awe opaka Davidi? (1 Sam 25:31, 33; aRom 12:19; aEf 4:26)

    Moota xeeni mwiirelo a Davidi wa masu a Abigayili anaakhaliherya aya alopwana a olelo okhalana moonelo a Yehova voohimya sa athiyana? (Mit 21:8, 9; aRom 2:11; 1 Ped 3:7)

MWIIXUTTE SIKINA

MUTAKIHEKE WAAMINI WAYA

Owo aahipaka itthu mwa miruku

Exeeni eniixutta ahu voohimya sa mixankiho saawanana awe Abigayili vatthokoni vawe?