Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 59: Nthowa Naya Davidi Vantthyaw’awe

Mwaha 59: Nthowa Naya Davidi Vantthyaw’awe

NUUMALA Davidi omwiiva Goliyathi, Abineri muulupale aanakhotto a Isarayeli onnimuruuha wa Sawuli. Sawuli orii oohakalala vanceene ni Davidi. Owo onimpaka okhala muulupale aanakhotto awe ni onnimukuxa wira okhaleke mu empa ya mwene.

Vattuli vaya, vaavo anakhotto vanihokolowa aya waawana aya ni aFilisti, athiyana aniipa ariki: ‘Sawuli oowiiva ikonto, masi Davidi ikonto sene muloko.’ Ela ennimwiiriha Sawuli okhalana nrima, okhala wira Davidi oovahiwa nttittimiho noovikana nne na Sawuli. Masi Yonathani mwanawe Sawuli khorina nrima. Owo onnimphenta vanceene Davidi, ni Davidi onnimphenta-tho Yonathani. Nto oowanli aya annimanelana natiri mukina ni mukhw’awe wira mahiku otheene anrowa okhala apatthani.

Mwene Sawuli onivonya nivaka

Davidi onnisuwela omoopa saana xittaattha, nto Sawuli onnisiveliwa ni nsipo nniipa awe. Masi nihiku nimosaa nrima na Sawuli naahimwiiriha owo ovara etthu yootakhalexa. Okathi yoowo Davidi vaamoopa awe xittaattha, Sawuli onikuxa nivaka ni onavonya, oriki: ‘Kinrowa omukhomela vaxirini Davidi!’ Masi Davidi onnirapela, nto nivaka ninnimukusya. Vattuli vaya Sawuli aahimukusya-tho Davidi ni nivaka nawe. Siiso Davidi onnisuwela vano wira ohaana okhalana ephoole yinceene.

Nyuwo munnimuupuwela natiri yoowo Sawuli ampanka awe? Owo aahihimya wira onrowa onvaha mwanawe mwaamuthiyana wira okhalee mwaarawe mulopwana yoowo aarowa omwiiva Goliyathi. Wanikisa waya, Sawuli onimuleela Davidi wira onoowerya omukuxa mwanawe Mikali, masi wanipacerya ohaana owiiva anyokhani aFilisti 100. Nkahaya muupuwelele eyo! Sawuli mwekeekhai onilipelela wira aFilisti anrowa omwiiva Davidi. Masi awo khanwerya, siiso-nto Sawuli onnimunnya Davidi mwanawe mwaamuthiyana wira okhalee mwaarawe.

Nihiku nimosaa Sawuli onimuleela Yonathani ni arumeyi awe otheene wira omphavela omwiiva Davidi. Masi Yonathani onnihimya wa tiithi awe wira: ‘Muhinnvulalihe Davidi. Owo khonawiireleni etthu yootakhala. Mmapuroni mwaya, etthu eri yotheene epanka awe ti ya nikhaliheryo wa nyuwo. Owo aahileva ekumi awe vaavo vaamwiivalya awe Goliyathi, nto vaavo vaawenha anyu ela, nyuwo mwaahihakalala.’

Davidi onitthyawa nivaka

Sawuli onninwiriyana mwanawe, nto onnimmana natiri wira khonrowa onvulaliha Davidi. Davidi onnihokoloxiwa, nto owo onnimurumeela Sawuli owannyawe vasyaa-tho ntoko siira awe khalai. Nave-tho, nihiku nimosaa, okathi yoowo Davidi wiipa awe nsipo, Sawuli aahitthikela-tho ovonya nivaka nawe wira omuhome Davidi. Davidi onnirapela, nto nivaka ninnihoma vaxirini. Ela ekwaha ya neeraru! Davidi onnisuwela vano wira owo ohaana otthyawa!

Ohiyu yoole Davidi onrowa owannyawe. Masi Sawuli onaaruma alopwana akina wira yamwiive. Mikali oosuwela yeele tiithi awe eniphavela awe wira. Siiso owo onimuleela iyawe wira: ‘Akhala wira nyuwo khimunrowa otthyawa ohiyu ola, meelo munrowa okhwa.’ Ohiyu yoole Mikali onimukhaliherya Davidi okhuma vaxanelani. Moophiyeryaka iyaakha thanuu ni piili Davidi ohaana wiipitha nipuro-nnipuro nikhw’aya siiso Sawuli khonwerya omphwanya.

1 Samuweli 18:1-30; 19:1-18.



Makoho

  • Nthowa xeeni Sawuli vanimukhalela awe nrima Davidi, masi onivirikana sai ni Yonathani mwaana a Sawuli?
  • Exeeni eniiraneya nihiku nimosaa vaavo Davidi vanimoopela awe xittaattha Sawuli?
  • Exeeni Sawuli enimuleela awe Davidi wira ohaana opaka ohinatthi omukuxa Mikali mwaana mwaamuthiyana a Sawuli ntoko mwaarawe, nto nthowa xeeni Sawuli vanihimya awe ela?
  • Vaavo Davidi vanimoopela awe xittaattha Sawuli, exeeni eniiraneya okathi wa neeraru, ntoko sinooniherya aya elatarato?
  • Mikali onikhaliherya sai woopola okumi wa Davidi, siiso-nto exeeni Davidi enitthuneya awe opaka mu iyaakha thanuu na piili?

Makoho oowuncererya

  • Mmusome 1 Samuweli 18:1-30.

    Moota xeeni ophenta ohinimala wa Yonathani ni Davidi onithoonyerya aya ophentana wa “ipwittipwitthi sikina” ni ‘nikoto naamukhaani’? (1 Sam 18:1; Yoh 10:16; Luk 12:32; Zak 8:23)

    Okhala wira Yonathani mweephattu t’arowa okhala nipuro na Sawuli, moota xeeni Yonathani mu 1 Samuweli 18:4 onooniherya awe wiiwelela woolokexa wa ole othanliwe okhala mwene?

    Moota xeeni ntakiheryo na Sawuli nnooniherya aya wira nrima nnoowerya oroiha mu yoottheka yuulupale, ni yoolopola xeeni enivaha ela wa hiyo? (1 Sam 18:7-9, 25; Yak 3:14-16)

  • Mmusome 1 Samuweli 19:1-17.

    Moota xeeni Yonathani vaalenvya awe okumi awe vaavo vaalavunlya awe masuu ari mu 1 Samuweli 19:4, 5? (1 Sam 19:1, 6)