Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 58: Davidi Ni Goliyathi

Mwaha 58: Davidi Ni Goliyathi

AFILISTI annoorwa-tho owana ni Isarayeli. Axuulupalya awe Davidi araruu arii vano muhina mwa anakhotto a Sawuli. Siiso nihiku nimosaa Yesee onimuleela Davidi wira: ‘Mwaakuxerye anninyu inukuu sowaarikiwa ni iphaawu. Mwaawehe moota siry’aya.’

Goliyathi

Vaavo Davidi vaniphiya awe mmixaxani sa anakhotto, owo onitthimakela waathataanale anakhotto wira aawehe annawe. NFilisti nakuruu Goliyathi onnikhuma wira aanyohole anaIsarayeli. Owo onnipaka ela khuta voosiisu ni makaaripi moophiyeryaka mahiku 40. Owo onnikhuwela oriki: ‘Mmuthanle mmosaa a atthu anyu wira owane ni miyo. Akhala wira onrowa oxintta ni okiiva miyo, hiyo ninrowa okhala ipottha sawe. Masi akhala wira kinrowa oxintta ni omwiiva owo, nyuwo munrowa okhala ipottha sahu. Miyo kinnoopacani wira mmuthanle mutthu wi owane ni miyo.’

Davidi onimukoha mmosaa a atoropa wira: ‘Exeeni enrowa awe ophwanya mutthu onrowa omwiiva nFilisti ola ni waataphula aIsarayeli mu etthu ela yoowuuliha muruu?’

‘Sawuli onrowa onvaha mutthu owo mihakhu sinceene,’ onnihimya toropa owo. ‘Ni owo onrowa onvaha mwanawe mwaamuthiyana wira okhalee mwaarawe.’

Masi anaIsarayeli otheene annimoova Goliyathi okhala wira owo ti muulupalexa. Owo orina imeetru sowiiraka 3 sa erakamelo awe, ni ookhalana toropa mukina onimukuxerya eyuuma yoowaakiha.

Atoropa akina annirowa omuleela Mwene Sawuli wira Davidi omphavela owana ni Goliyathi. Masi Sawuli onimuleela Davidi wira: ‘Nyuwo khimunwerya owana ni nFilisti. Nyuwo mwa mmiravo puree, nto owo toropa mu okumi awe wotheene.’ Davidi onaakhula wira: ‘Miyo kihiiva enamaa yootakhala ni mwattoo yoowo aakunxe epwittipwitthi ya paapa aka. Nto nFilisti ola onrowa okhala ntoko inamaa iya. Yehova onrowa okikhaliherya.’ Siiso Sawuli onihimya so: ‘Murowee, nto Yehova okhalee ni nyuwo.’

Davidi onkhuruwela mmuroo ni onattotta maluku mathanuu oovilikeya, nto onnikuha mmurupani mwawe. Nuumala vo onnimukuxa pharansikula awe ni onnirowa okumana ni nakuruu owo. Vaavo Goliyathi vaninweha awe, owo khonwerya okupali. Owo onuupuwela wira vanrowa okhala vookhweyexa omwiiva Davidi.

Davidi onivonya nluku

‘Nkarwani wa miyo,’ onnihimya Goliyathi, ‘nto kinrowa ovaha erutthu anyu wa axipalame ni wa inamaa wira akhuure.’ Masi Davidi onihimya wira: ‘Nyuwo munrwa wa miyo ni ekatana, mphulo ni nivaka, masi miyo kinrwa wa nyuwo ni nsina na Yehova. Olelo vaava Yehova onrowa okivaha nyuwo mmatatani mwaka ni miyo kinrowa woomoroxeryani vathi.’

Nto Davidi onitthimakela orowaka wa Goliyathi. Owo onikuxa nluku mmurupani mwawe, onahela mpharansikulani mwawe, nto onavonya ni ikuruu sawe sotheene. Nluku nne naaheetta mpakha othaka muruu a Goliyathi, nto owo onnimorela vathii ni okhwa! Vaavo aFilisti vaninweha aya wira nakhotto aya ootupexa oomora, otheene aya annirukunuwa ni otthyawa. AnaIsarayeli anniwoomola ni annixintta ekhotto.

1 Samuweli 17:1-54.



Makoho

  • Muxankiho xeeni Goliyathi onaakumiherya awe anakhotto a Isarayeli?
  • Goliyathi wunnuwa wawe waari sai, nto yootthuvela xeeni Mwene Sawuli enimmanela awe natiri mulopwana yoowo onrowa omwiiva Goliyathi?
  • Davidi onihimya exeeni vaavo Sawuli vanimuleela awe wira khonwerya owana ni Goliyathi mwaha woowi Davidi mwammiravo puree?
  • Mu omwaakhula wawe Goliyathi, moota xeeni Davidi sinooniherya awe ororomela wawe wa Yehova?
  • Ntoko siniwerya anyu woona valataratoni va, Davidi onirumeela exeeni wira omwiive Goliyathi, ni exeeni eniwiiraneela maFilisti nuumala ela?

Makoho oowuncererya

  • Mmusome 1 Samuweli 17:1-54.

    Tiivi yaari esiiri ya ohoova wa Davidi, nto moota xeeni sinwerya ahu otakiha olipa wawe murima? (1 Sam 17:37, 45; aEf 6:10, 11)

    Nthowa xeeni maKristau anitthuneya aya osyaka munepa wookottholihana moolikana ni Goliyathi vaavo vary’aya vaxookuni aahiiso vanitthekula aya? (1 Sam 17:8; aGal 5:26; 1 Tim 4:8)

    Moota xeeni masuu a Davidi anooniherya aya wira aahikhalana ororomela nikhaliheryo na Muluku? (1 Sam 17:45-47; 2 Wah 20:15)

    Mmapuro mwa ohimya ntoko onyakulihana paahi eriyari ya maloko manli a ekhotto oonyokhana, moota xeeni yoohimmwa ela enooniherya aya wira ekhotto yaari tthiri ya amuluku oowoka ni Muluku eekeekhai, Yehova? (1 Sam 17:43, 46, 47)

    Moota xeeni oohalela oowoottihiwa vanitthara aya ntakiheryo na Davidi mu omuroromela Yehova? (1 Sam 17:37; Yer 1:17-19; Wis 12:17)

MWIIXUTTE SIKINA

MUWIIXUTTIHE ANIINYU

Davidi khawoova awanani awe

Musome mwaha ola woovara murima wira mwiixutte ele yaamwiiriha Davidi ohoova.