Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 57: Muluku Onimuthanla Davidi

Mwaha 57: Muluku Onimuthanla Davidi
Davidi onaakiherya epwittipwitthi

NYUWO munniwerya woona ele yiiranen’ye? Mmiravo owo oomwaakiherya mwaapwittipwitthi ola wa enamaa yootakhala. Enamaa eyo yootakhala yaahirwa evara epwittipwitthi nto yaarowa okhuura. Masi mmiravo owo aahoomola, nto aahaakiherya epwittipwitthi vayanoni va enamaa yootakhala. Nto vaavo enamaa eyo yootakhala vaniittukhula aya, mmiravo onnivara enamaa eyo yootakhala ni onamana mpakha wiiva! Okathi mukina owo aahaakiherya epwittipwitthi wa mwattoo. Khahiyo mmiravo oolipa murima? Nyuwo munnimusuwela tanii ola?

Ola mmiravo Davidi. Owo onikhala muttetthe wa oBethelehemu. Taata awe aari Obedi, mwaana a Ruthi ni Bowazi. Nyuwo munniwuupuwelasa? Yesee tori paapa awe Davidi. Davidi onikhapelela ipwittipwitthi sa apapawe. Davidi aayariwe iyaakha 10 nuumala Yehova omuthanla Sawuli okhala mwene.

Okathi waahiphiya vaavo Yehova onimuleela awe Samuweli wira: ‘Mukuxee makhura a vameekh’aya ni murowee owannyawe Yesee, oBethelehemu. Koomuthanla mmosaa aan’awe wira okhalee mwene.’ Vaavo Samuweli vaninweha awe Eliyabi mwaana muulupale a Yesee, owo onnihimya wa yoowo mwaneene oriki: ‘Tthiri ola ti yoowo othanliwe ni Yehova.’ Masi Yehova onnimuleela wira: ‘Muhinweheke orakama nnakhala oreera. Nkimuthanlale wira okhalee mwene.’

Siiso Yesee onnimwiitthana mwaana awe Abinadabi ni onnimuruuha wa Samuweli. Masi Samuweli onihimya wira: ‘Nnaari, nnakhala ola Yehova khomuthanlale.’ Moottharelana, Yesee onimuruuha mwanawe Xamma. ‘Nnaari, nnakhala ola Yehova khomuthanlale,’ onnihimya Samuweli. Yesee onnaaruuha an’awe athanuu na anli wa Samuweli, masi Yehova khommuthanla hataa mmosaa a yaawo. ‘Amiravo akhanle ti yaala paahi?’ onnikoha Samuweli.

‘Nlelo ookhala ooyeveela iwee,’ onnihimya Yesee. ‘Masi owo orii otaa onikhapelela ipwittipwitthi.’ Vaavo Davidi vaniphiya awe, Samuweli onniwerya woona wira owo orii mmiravo ooreera. ‘Ti yoola,’ onnihimya Yehova. ‘Mmwiitthele makhura awo.’ Nto ela ti etthu enivara awe Samuweli. Okathi onoophiya vaavo Davidi vanrowa awe okhala mwene a Isarayeli.

1 Samuweli 17:34, 35; 16:1-13.



Makoho

  • Nsina na mmiravo owo ori valataratoni vo tanii, nto ninsuwela sai wira t’olipa murima?
  • Davidi onikhala woowi, nto tinivi nsina na tiithi ni taata awe?
  • Nthowa xeeni Yehova onimuleela awe Samuweli wira orowee oBethelehemu vatthokoni va Yesee?
  • Exeeni eniiraneya vaavo Yesee vanimuruuhela awe Samuweli an’awe aaxilopwana athanuu nenli?
  • Vaavo Davidi vaniruuhiwa awe, exeeni Yehova enimuleela awe Samuweli?

Makoho oowuncererya

  • Mmusome 1 Samuweli 17:34, 35.

    Moota xeeni soowiiraneya iya sinttittimiherya aya olipa murima wa Davidi ni ororomela wa Yehova? (1 Sam 17:37)

  • Mmusome 1 Samuweli 16:1-14.

    Moota xeeni masuu a Yehova ari mu 1 Samuweli 16:7 annikhaliherya aya okhala oohithanla ni osyaka ophukela ni mooneelo wa otaa? (Mit 10:34, 35; 1 Tim 2:4)

    Moota xeeni ntakiheryo na Sawuli nnooniherya aya wira vaavo munepa wootteela wa Yehova vanimukhuma awe mutthu, nipuro noohikhaliwa nnoowerya osareya munepa wootakhala, aahiiso yoophavela ya opaka yoonanara? (1 Sam 16:14; Mat 12:43-45; aGal 5:16)