Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 56: Sawuli—Mwene Oopacerya a Isarayeli

Mwaha 56: Sawuli—Mwene Oopacerya a Isarayeli
Samuweli onimuhela emwene Sawuli

NKANWEHEENI Samuweli oniitthela makhura vamuruu va mulopwana owo. Ela ti etthu yaalimaleliwe wiirihiwa mutthu wira ooniheriwe wi owo oothanliwa okhala ntoko mwene. Yehova onimuleela Samuweli wira iitthele makhura vamuruu va Sawuli. Ala makhura a vameekh’aya oowunkhela.

Sawuli khaapuwela wira owo aari ooreerela wira okhalee mwene. ‘Kirii a nihimo na Beniyamini, nootepexa oyeva wIsarayeli,’ owo onnimuleela Samuweli. ‘Nthowa xeeni nyuwo ohimyaka wira miyo kinrowa okhala mwene?’ Yehova onnisiveliwa ni Sawuli okhala wira owo khomphavela okhala muulupale ni ootthuneya. Ti nthowa naya Yehova vanimuthanla awe Sawuli okhala mwene.

Masi Sawuli khahiyo mulopwana oohaawa aahiiso ooyeva. Owo ta emusi yooraala, nto owo mulopwana ooreera vanceene, oorakama. Owo toorakama mmakhatani mpakha vamuruu waavikana atthu otheene a Isarayeli! Sawuli orii-tho ootthyawexa, ni owo mulopwana aikuruu sinceene. Nto atthu awo arii oohakalala ni Yehova mwaha woomuthanla Sawuli okhala mwene. Otheene aya annipacerya okhuwela ariki: ‘Mwene okhalee ni okumi woorakama!’

Anyokhani a Isarayeli annivikaniha okhala aikuruu. Awo nlelo annikumiherya mixankiho sinceene wa anaIsarayeli. Niinanoru nuumala Sawuli opakiwa mwene, Amoni annoorwa owana n’awosa. Masi Sawuli onnithukumanya muloko muulupale a ekhotto, nto owo onnixintta ekhotto wa Amoni. Ela enniwiiriha atthu ohakalala okhala wira Sawuli mwene.

Moovira wa iyaakha, Sawuli onaahoolela anaIsarayeli mu waaxintta ikwaha sinceene anyokhani aya. Sawuli ookhalana-tho mwaana oolipa murima oniitthaniwa Yonathani. Nto Yonathani onaakhaliherya a Isarayeli oxintta ikhotto sinceene. AFilisti nlelo arii anyokhani ootakhalexa a anaIsarayeli. Nihiku nimosaa ikonto-ikonto sene sa aFilisti annoorwa owana ni anaIsarayeli.

Samuweli onnimuleela Sawuli wira owehererye mpakha owo orwa ni oveleela mukuttho, aahiiso yoovaha, wa Yehova. Masi Samuweli oopisa ophiya. Sawuli onnoova wira aFilisti anrowa opacerya ekhotto, siiso onnirowa ohoolo ni onaveleela mukuttho mmensawe. Wanikisa waya vaavo Samuweli vaniphiya awe, onimuleela Sawuli wira khiiwelenle. ‘Yehova onrowa omuthanla mutthu mukina wira okhalee mwene a Isarayeli,’ onnihimya Samuweli.

Vattuli vaya Sawuli aahitthikela ohiiwelela. Siiso Samuweli onimuleela wira: ‘Ti vooloka omwiiwelela Yehova ovikana onvaha mukuttho a epwittipwitthi yoolokexa. Okhala wira khimmwiiwelenle Yehova, Yehova khonrowa woohiyani nyuwo mukhalaka ntoko mwene a Isarayeli.’

Hiyo nnoowerya wiixutta etthu yooloka mwa yeela. Ela eninooniherya otthuneya waya omwiiwelela Yehova okathi wotheene. Nave-tho, enooniherya wira mutthu ooloka, ntoko saarya awe Sawuli, onoowerya orukunuwa ni okhala ootakhala. Hiyo nihikhala-khalee niphavelaka okhala ootakhala, khahiyo siiso?

1 Samuweli ekapitulu 9 mpakha 11; 13:5-14; 14:47-52; 15:1-35; 2 Samuweli 1:23.



Makoho

  • Valataratoni va, Samuweli onipaka-ni, ni nthowa xeeni?
  • Nthowa xeeni Yehova vanisiveliwa awe ni Sawuli, nto Sawuli mulopwana a mukhalelo xeeni?
  • Nsina na mwaana mwaamulopwana a Sawuli tanii, ni onipaka-ni mwaana owo?
  • Nthowa xeeni Sawuli vanivaha awe mukuttho mmapuro mwa omulipelela Samuweli wira opake ela?
  • Itthu xeeni nniwerya ahu wiixutta mwa yoohimmwa ya Sawuli?

Makoho oowuncererya

  • Mmusome 1 Samuweli 9:15-21 ni 10:17-27.

    Moota xeeni muupuwelelo wowiiyeveiha wa Sawuli waamukhalihenrya aya osyaka mwiirelo wookhummwa murima vaavo alopwana akina vaalavunlya aya moohimuttittimiha? (1 Sam 9:21; 10:21, 22, 27; Mir 17:27)

  • Mmusome 1 Samuweli 13:5-14.

    Yoottheka xeeni yeeyo Sawuli yaapanke awe oGiligali? (1 Sam 10:8; 13:8, 9, 13)

  • Mmusome 1 Samuweli 15:1-35.

    Yoottheka xeeni yootakhala Sawuli yaapanke awe voohimya sa Agagi, mwene aAmaleki? (1 Sam 15:2, 3, 8, 9, 22)

    Sawuli eerenrye sai okhootta soottheka sawe ni waavonyerya nthowa atthu akina? (1 Sam 15:24)

    Yoolopola xeeni naatthuneya ahu otthara olelo vaavo vanivahiwa ahu miruku? (1 Sam 15:19-21; Sal 141:5; Mir 9:8, 9; 11:2)