Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 54: Mulopwana Aikuruxa

Mwaha 54: Mulopwana Aikuruxa

NYUWO munnisuwela nsina na mulopwana aikuruxa yoowo aatonko okhala? Owo orii namaphuka oniihaniwa Sansoni. Ti Yehova yoowo oninvaha ikuruu Sansoni. Hataa Sansoni ohinatthi oyariwa, Yehova onimuleela maama awe wira: ‘Moohipisa munrowa okhalana mwaana mwaamulopwana. Owo onrowa ohoolela mu waavuluxa aIsarayeli wa aFilisti.’

Sansoni onipera eyano ya kharamu

AFilisti arii muxovo ootakhala yoowo onikhala muKanani. Awo aakhalana anakhotto anceene, nto awo mwekeekhai annaahaaxa anaIsarayeli. Ekwaha ekina, vaavo Sansoni vaarya awe vamukwahani oorowa waakhala aFilisti, mwattoo muulupale onrwa wa owo woopaka mirukulu. Masi Sansoni onnimwiiva ni matata paahi. Owo onniwiiva-tho aFilisti ootakhala imiya sinceene.

Vattuli vaya Sansoni onnisiveliwa vanceene ni muthiyana iihaniwa Dalila. Akhulupale aaFilisti animmana natiri wira khuta mmosaa a yaawo onrowa onvaha Dalila 1.100 ipasulela sa eparatha akhala wira ola onrowa waaleela esiiri ya ikuruu sa Sansoni. Dalila onniphavela musurukhu ole otheene. Ola khahiyo mpatthani eekeekhai a Sansoni, aahiiso a atthu a Muluku. Siiso ola onnithipelela omukoha Sansoni exeeni enimwiiriha okhalana ikuruu sinceene.

Dalila ni Sansoni

Wanikisa waya, Dalila onnimwiiriha Sansoni omuleela esiiri ya ikuruu sawe. ‘Ikharari saka khiitonko ometthiwa,’ owo onnihimya. ‘Okhuma okathi yoole oyariwa aka, Muluku ookithanla wira kikhalee murumeyi avameekh’awe oniihaniwa muNaziri. Akhala wira ikharari saka sinrowa ometthiwa, kinrowa oyeleela ikuruu saka.’

Saana, vaavo Dalila vanisuwela awe ela, owo onnimwiiriha Sansoni orupa mmatatani mwawe. Nuumala vo owo onimwiitthana mulopwana wira orwee ni ometthe ikharari sawe. Vaavo Sansoni vanivenya awe vaarupa awe, onniyeleela ikuruu sawe. AFilisti vano annikela ni anninvara. Awo annikumiha meitho awe otheene, nto khimpaka okhala epottha aya.

Sansoni oninyaanya maripu

Nihiku nimosaa aFilisti annikhalana niira nuulupale na omukokhorela muluku aya Dagoni, nto awo yaahimukumiha Sansoni mukhatteya wira aatheehaseke. Mu okathi yoowo, ikharari sa Sansoni saahimelela-tho. Sansoni onihimya wa mmiravo yoowo onimuhoola onvarelaka ntata wira: ‘Mukikwatihe maripu anlipiha empa.’ Nuumala vo Sansoni onivekela ikuruu wa Yehova, nto onnivara maripu. Owo onnikhuwela oriki: ‘Mukihiye kikhweeke miyo ni aFilisti.’ Vaniirani vale aakhala aFilisti 3.000, nto vaavo Sansoni vaniilipiherya awe okakha maripu a empa, eyo ennimorela vathii ni owiiva atthu otheene ootakhala.

Makhulupale ekapitulu 13 mpakha 16.



Makoho

  • Nsina na mulopwana aikuruxa yoowo aatonko okhala tinivi, ni tanii anvanhe ikuruu sawe?
  • Ekwaha ekina, Sansoni aamwiirinhe exeeni mwattoo muulupale, ntoko siniwerya anyu woona valataratoni va?
  • Esiiri xeeni Sansoni enimuleela awe Dalila valataratoni va, ni moota xeeni ela enimwiiriha aya ovariwa ni aFilisti?
  • Moota xeeni Sansoni oniwiiriha awe opweteya anyokhani aFilisti oophiyeryaka 3.000 nihiku naakhwiiye awe?

Makoho oowuncererya

  • Mmusome Makhulupale 13:1-14.

    Moota xeeni Manowa ni mwaarawe anivaha aya ntakiheryo nooloka wa axitiithi mu waahuwa anaaya? (Makh 13:8; Sal 127:3; aEf 6:4)

  • Mmusome Makhulupale 14:5-9 ni 15:9-16.

    Moota xeeni soohimmwa sa Sansoni sa omwiiva mwattoo, okwasa mukhoi musyaa waatthukweliwa awe, ni orumeela mattere a buuru wira owiive alopwana 1.000 sinooniherya aya ovara muteko wa munepa wootteela wa Yehova?

    Onnikhaliherya sai munepa wootteela olelo? (Makh 14:6; 15:14; Zak 4:6b; Mit 4:31)

  • Mmusome Makhulupale 16:18-32.

    Wataana woohiloka wanvanre sai Sansoni, nto exeeni ninwerya ahu wiixutta mwa yeela? (Makh 16:18, 19; 1 aKor 15:33)