Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 53: Natiri A Yefte

Mwaha 53: Natiri A Yefte
Mwaana mwaamuthiyana a Yefte

MONTOKO ommana natiri nto vattuli vaya moona okhala vooxankiha omwaakhwaniherya? Mulopwana ori valataratoni-va ontoko, nto ti nthowa naya ory’awe ooriipiwa murima vanceene. Mulopwana owo orii namaphuka oolipa murima a wIsarayeli oniihaniwa Yefte.

Yefte onikhala okathi yoowo anaIsarayeli ahinimukokhorel’aya-tho Yehova. Awo anipaka-tho yeele eri yootakhala. Siiso Yehova oniweemererya atthu aAmoni wira yaahaaxe awosa. Ela enniiriha wi anaIsarayeli akhuweleke wa Yehova yiiraka: ‘Hiyo nihootthekelani. Xontte, munoopole!’

Yefte no anakhotto awe

Atthu anniikhupanyiha mwaha wa itthu sootakhala seiyo awo sivanrya aya. Awo anooniherya ottharuwa waya mwa omurumeela-tho Yehova. Siiso Yehova onnaakhaliherya-tho.

Yefte onithanliwa ni atthu awo wira owane ni Amoni ootakhala. Yefte onniphavela vanceene wira Yehova omukhaliherye mukhottoni. Siiso owo onnimmanela natiri Yehova oriki: ‘Akhala wira munookivaha oxintta wa Amoni, mutthu oopacerya onikhuma mpaani mwaka wira okumane ni miyo vaavo vanitthika aka wooxinttani kinrowa woovahani.’

Yehova onnimwiiwa natiri a Yefte, nto onnimukhaliherya wira owerye oxintta. Vaavo Yefte vanitthikela awe owaani, nyuwo munnimusuwela ole orii oopacerya okhuma wira okumane n’uwo? Mwanawe mwaamuthiyana, yoowo ori mmosaa ene. ‘Oh, mwanaka mwaamuthiyana!’ Yefte onnikhuwela. ‘Mookiruuhela oriipiwa murima. Masi kommana natiri wa Yehova, nto nkinwerya otthikela ottuli.’

Vaavo mwaana a Yefte vanisuwela awe voohimya sa natiri owo, wanipacerya owo-tho onikhala ooriipiwa murima. Okhala wira vanitaphulela omuhiya tiithi awe ni apatthani. Masi owo onrowa oviriha okumi awe wotheene omurumeelaka Yehova mutabernaakulu mwawe oSilo. Siiso owo onimuleela tiithi awe wira: ‘Akhala wira mwaahimmana natiri wa Yehova, muhaana omwaakhwaniherya.’

Siiso mwaana a Yefte onnirowa oSilo, nto owo onniviriha okathi wotheene wa okumi awe omurumeelaka Yehova mutabernaakulu. Mahiku maxexee khuta mwaakha athiyana a wIsarayeli yaanrowa omuxukurya iwe, nto awo yaanikhalana okathi woohakalaliha vamosaa. Atthu annimphenta mwaana a Yefte okhala wira ola orii murumeyi oolokexa a Yehova.

Makhulupale 10:6-18; 11:1-40.



Makoho

  • Yefte tanii, ni okathi xeeni waakhanlya awe?
  • Natiri xeeni Yefte onimmanela awe Yehova?
  • Nthowa xeeni Yefte onikhala awe ooriipiwa murima vaavo vanitthikela awe owaani okhumaka waaxintta awe Amoni?
  • Mwaana mwaamuthiyana a Yefte onihimya exeeni vaavo vanisuwela awe voohimya sa natiri a tiithi awe?
  • Nthowa xeeni atthu animphenta aya mwaana a Yefte?

Makoho oowuncererya

  • Mmusome Makhulupale 10:6-18.

    Yoolopola xeeni yaareerela ahu ovaha ephoole voohimya sa ohiroromela wa Isarayeli wa Yehova? (Makh 10:6, 15, 16; aRom 15:4; Wis 2:10)

  • Mmusome Makhulupale 11:1-11, 29-40.

    Ninsuwela sai wira onvaha Yefte mwanawe mwaamuthiyana ntoko ‘mukuttho woopahiwa’ khiyaataphulela onvaha owo ntoko mukuttho woomutthu woopahiwa ni mooro? (Makh 11:31; Onam 16:24; Otum 18:10, 12)

    Mmukhalelo xeeni Yefte anvanha awe mwanawe ntoko mukuttho?

    Exeeni ninwerya ahu wiixutta mmuupuwelelo a Yefte voohimya sa natiri awe wa Yehova? (Makh 11:35, 39; Mus 5:3, 4; Mat 16:24)

    Moota xeeni mwaana a Yefte ory’awe ntakiheryo noolokexa wa maKristau amiravo mu okela muteko wa orummwa wa okathi wotheene? (Makh 11:36; Mat 6:33; aFil 3:8)