Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 45: Olapuwa Mmuroo Yordani

Mwaha 45: Olapuwa Mmuroo Yordani

MWAAWEHEKE! AnaIsarayeli anilapuwa Muroo Yordani! Nto maasi arii wuuwi? Okhala wira ennirupa epula yinceene okathi ola wa mwaakha, muroo aahisareya maasi mminutu vakhaani sivinre. Vano maasi otheene aarowa! Nto anaIsarayeli anrowa olapuwa mu etthaya yowuuma ntoko siisaale siiralya aya mu Ephareya Yooxeerya! Yaaronwe wuuwi maasi otheene? Nrowee noone.

AnaIsarayeli anilapuwa Muro Yordani

Vaavo waaphiiya aya okathi wira anaIsarayeli alapuwe Muroo Yordani, Yehova aahimuruma Yoxuwa waaleela atthu, etthu ela: ‘Alipa a mukuttho ahaana okuxa nivuku na wataana, nto aroweke ohoolo wahu. Vaavo vaninyakela aya maasi a Muroo Yordani, nto maasi anrowa weemela.’

Siiso anamukuttho annikuxa nivuku na wataana, nto anattukhula arowaka ohoolo wa atthu. Vaavo vaniphiya aya oYordani, anamukuttho anneetta arowaka mmaasini. Maasi t’otupa ni oowiixerya. Masi amalakaru onyakela maasi, maasi awo annipacerya weemela! Ola mutikiniho! Yehova aaheemexa maasi onikhuma aya. Siiso, niinanoru muroo owo kokhanle-tho maasi!

Anamukuttho yaawo anttukhula nivuku na wataana annirowa eriyari ya muroo oowuuma. Nyuwo munniwerya waaweha awosa valataratoni-vo? Yeemenle ene vale, anaIsarayeli otheene anneetta alapuwaka Muroo Yordani mu etthaya yowuuma!

Ori otheene olapunwe ene, Yehova aahimuruma Yoxuwa waaleela alopwana aikuruu 12 wira: ‘Rowani mmuroo mme mweemenle anamukuttho ni nivuku na wataana. Muttotte maluku 12, nto muukele opuro onrowa anyu okhalasa otheene ohiyu ola. Nuumala vo, muhoolo, vaavo aniinyu vanrowa aya okoha yootaphulela ya maluku ale, nyuwo muhaana waaleela awosa wira maasi yaaheemela vaavo nivuku na wataana na Yehova vaamulapunwa aya Yordani. Maluku anrowa owuupuxeryani mutikiniho ola!’ Yoxuwa-tho onnihela maluku 12 opuro weemenle alipa a mukuttho eriyari ya muroo.

Yoxuwa

Wanikisa waya Yoxuwa onaaleela anamukuttho attukhunle nivuku na wataana oriki: ‘Mukhumee muYordani.’ Amalakaru okhuma, muroo onnipacerya weetta ekwaha ekina-tho.

Yoxuwa 3:1-17; 4:1-18.



Makoho

  • Mutikiniho xeeni Yehova onipaka awe wira anaIsarayeli awerye olapuwa Muroo Yordani?
  • Muteko xeeni wa waamini onitthuneya aya anaIsarayeli opaka wira alapuwe Muroo Yordani?
  • Nthowa xeeni Yehova onimuleela awe Yoxuwa wira othukumanyerye maluku maalupale 12 anikumihiwa eriyari ya muroo?
  • Anamukuttho akhumakaru muYordani eniiraneya exeeni?

Makoho oowuncererya

  • Mmusome Yoxuwa 3:1-17.

    Ntoko sooniheriwa aya mu yoohimmwa ela, nnitthuneya opaka exeeni wira naakhele nikhaliheryo ni nreeliho na Yehova? (Yox 3:13, 15; Mir 3:5; Yak 2:22, 26)

    Maasi a Muroo Yordani yaari sai vaavo anaIsarayeli vaalapunwa aya arowaka Elapo Yooleiheriwa, ni moota xeeni ela yannuwinha aya nsina na Yehova? (Yox 3:15; 4:18; Sal 66:5-7)

  • Mmusome Yoxuwa 4:1-18.

    Maluku 12 yaawo yaakuxiwe muYordani ni yeemexiwe oGiligali yaarumenle yoolakela xeeni? (Yox 4:4-7)