Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 44: Rahabi Oniwiipithiha Anamahottela

Mwaha 44: Rahabi Oniwiipithiha Anamahottela

ALOPWANA ala arii mmuxankihoni. Awo ahaana okhuma, aahiiso anrowa wiiviwa. Awo arii anamahottela anaIsarayeli, nto muthiyana onaakhaliherya awosa Rahabi. Rahabi onikhala mu empa eri vasuluu va ixirii sa muttetthe wa oYerikhoo. Nrowee noone nthowa naya alopwana ala ary’aya mmuxankihoni.

AnaIsarayeli arii oolikana ene wira alapuwe Muroo Yordani arowaka elapo ya oKanani. Masi ahinatthi opaka eyo, Yoxuwa onaarumiha anamahottela anli. Owo onaaleela wira: ‘Murowee, mwahottele elapo ni muttetthe wa oYerikhoo.’

Rahabi ori ni anamahottela anli anaIsarayeli

Vaavo anamahottela vaniphiya aya oYerikhoo, awo anrowa empa ya Rahabi. Masi mutthu mukina onimuleela mwene a oYerikhoo wira: ‘AnaIsarayeli anli aakela-mu ohiyu wira ahottele elapo ela.’ Vaavo owo vaniiwa awe ela, mwene onaaruma alopwana wa Rahabi, nto awo annilamula wa ola ariki: ‘Mwaakumiherye otaa, alopwana arina anyu mpaani!’ Masi Rahabi oheipithiha anamahottela ala vataratoni. Siiso ola onnihimya wira: ‘Aakela alopwana akina mpa mwaka, masi nkinsuwela onikhuma aya. Akhumanse niinano nuumala wiila, vahinatthi owaliwa mukhora wa muttetthe. Akhala wira munimwaatthimakela, nyuwo munimwaaphwanyasa!’ Siiso-nto alopwana awo annaatthimakela.

Nuumala okhumasa, Rahabi onnitthimakela vataratoni. ‘Miyo koosuwela wira Yehova onrowa woovahani elapo ela,’ owo onnaaleela anamahottela. ‘Hiyo nihiiwa moota suuminha awe Ephareya Yooxeerya vaavo mwaakhuma anyu wEjiitu, ni moota saawiivalya anyu mamwene a Sihoni ni Ogi. Miyo kihooreerelani murima, siiso-nto mukilaphele, koovara metto, wira nyuwo munrowa okireerela murima. Nwoopole atiithi ni amaama, ni axirokoraka ni axinnaka.’

Anamahottela yaahilaphela wi animwiira siiso, masi Rahabi ohaana opaka etthu. ‘Mukuxee mukhoi ola ooxeerya ni mutthukwelele vaxanelani vanyu,’ annihimya anamahottela, ‘nto mwaathukumanye amusi inyu otheene ni nyuwo mpa mwanyu. Nto vaavo vantthika ahu otheene wira nimukuxe Yerikhoo, hiyo ninrowa oweha mukhoi ola vaxanelani vanyu, nto khinnirowa omwiiva mutthu owannyu.’ Vaavo anamahottela vanihokolowela aya wa Yoxuwa, awo annimuleela etthu eri yotheene yiiranen’ye.

Yoxuwa 2:1-24; aHeberi 11:31.



Makoho

  • Rahabi onikhala vaavi?
  • Tanii alopwana ala anli valataratoni va, ni nthowa xeeni arisa aya oYerikhoo?
  • Exeeni mwene a oYerikhoo enimulamula awe Rahabi wira opakee, nto Rahabi onaakhula sai?
  • Rahabi onaakhaliherya sai alopwana anli, ni nikhaliheryo xeeni nniveka awe?
  • Natiri xeeni animpaka aya anamahottela anli wa Rahabi?

Makoho oowuncererya

  • Mmusome Yoxuwa 2:1-24.

    Moota xeeni natiri a Yehova ohimmwale mu Okhuma 23:28 aakhwanenly’awe vaavo anaIsarayeli yarwiiy’aya omutuphela Yerikhoo? (Yox 2:9-11)

  • Mmusome aHeberi 11:31.

    Moota xeeni ntakiheryo na Rahabi ninttittimiherya aya otthuneya waya waamini? (aRom 1:17; aHeb 10:39; Yak 2:25)