Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 42: Buuru Onnilavula

Mwaha 42: Buuru Onnilavula

MONTOKO omwiiwa buuru olavulaka? ‘Nnaari,’ nyuwo pooti ohimya siiso. ‘Inamaa khisinlavula.’ Masi Biibiliya onnihimya sa buuru aalavunle. Nrowee noone moota ela yiiranen’ya aya.

Nlaikha

AnaIsarayeli ahanle vakhaani okela elapo ya oKanani. Balaki mwene oMowabi, oniwoova anaIsarayeli. Siiso onnimwiihaniha mulopwana oolavilavi oniihaniwa Balaamu wira orwee waalaphe anaIsarayeli. Balaki onnimmana natiri a onvaha Balaamu musurukhu munceene, nto Balaamu oninwela buuru awe ni onapacerya mukwaha awe woorowa okumana ni Balaki.

Yehova khomphavela wira Balaamu olaphe nloko Nawe. Siiso owo onirumiha nlaikha nikunxe ekatana yoorakama wi neemele mphironi wira nimweemexa Balaamu. Balaamu khonwerya woona nlaikha nna, masi buuru awe onnoona. Siiso buuru onnivikaniha weererya ohapuwa nlaikha, nto wanikisa waya onimmaathi mphironi paahi. Balaamu oonanariwa vanceene, nto onimmana buuru awe ni ekopo.

Nuumala vo Yehova onnimwiiriha Balaamu omwiiwa buuru awe omulavulihaka. ‘Etthu xeeni ewiirihalyakani wira nyuwo mukimaneke?’ onnikoha buuru.

Balaamu onwenle Buuru

‘Mookipakiha okhala ntoko mulolo,’ onnaakhula Balaamu. ‘Kaarina ekatana saano kiwiivaleni!’

‘Kootoko owiirihani siisa?’ buuru onnikoha.

‘Nnaari,’ onnaakhula Balaamu.

Nuumala vo Yehova onnimwiiriha Balaamu woona nlaikha nikunxe ekatana neemenle ene mphironi. Nlaikha nnihimya so: ‘Mummanenle-ni buuru anyu? Kirweenle ottiyelela ephiro anyu, wira nyuwo muhirowe waalapha a Isarayeli. Vaakhanleke wira buuru anyu khaakihapunwe, saano kiwiivaleni, masi voohinvulaliha buuru anyu.’

Balaamu onihimya so: ‘Miyo koottheka. Miyo nkaasuwenle wira nyuwo mweemenle mphironi.’ Nlaikha ninnimuhiya Balaamu orowaka, nto Balaamu onnirowa okumana ni Balaki. Balaamu ola nlelo onneererya waalapha a Isarayeli, masi, moovirikana ni vo, Yehova onniiriha wi owo omureelihe Isarayeli ikwaha tthaaru.

Mothakoni 21:21-35; 22:1-41; 23:1-30; 24:10-25.



Makoho

  • Balaki tanii, ni nthowa xeeni onimurumiha awe Balaamu?
  • Nthowa xeeni buuru a Balaamu onimmaathi awe mphironi?
  • Exeeni Balaamu eniiwa awe buuru olavulaka?
  • Exeeni nlaikha nnimuhimeerya aya Balaamu?
  • Exeeni eniiraneya vaavo Balaamu vaneererya awe omulapha Isarayeli?

Makoho oowuncererya

  • Mmusome Mothakoni 21:21-35.

    Nthowa xeeni Isarayeli vaamuxinttalya awe Mwene Sihoni a wAmori ni Mwene Ogi ooBaxari? (Moth 21:21, 23, 33, 34)

  • Mmusome Mothakoni 22:1-40.

    Tiivi yaari yotthuna ya Balaamu mu weererya waalapha aIsarayeli, ni sowiixutta xeeni nniwerya ahu ophwanya mwa yeela? (Moth 22:16, 17; Mir 6:16, 18; 2 Ped 2:15; Yuda 11)

  • Mmusome Mothakoni 23:1-30.

    Hataa Balaamu aahimmye wira aari tthiri namakokhorela a Yehova, moota xeeni miteko sawe soonihenrya aya okhala yoovirikana ni yoohimya awe? (Moth 23:3, 11-14; 1 Sam 15:22)

  • Mmusome Mothakoni 24:1-25.

    Moota xeeni yoohimya ya Biibiliya enlipiha aya nnoromelo nahu mu waakhwanela wa yotthuna ya Yehova? (Moth 24:10; Yes 54:17)