Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 38: Anamahottela 12

Mwaha 38: Anamahottela 12
Anamahottela anaisarayeli attempe mihokorokho

NKAWEHANI mihokorokho iya sikunxe alopwana ala. Mooneke moota ninnunwa aya niphara na uuva. Vanitthuneya alopwana anli wira athateke vamwirini. Nkawehani-tho mihokorokho sikina. Sinikhuma wuuwi mihokorokho iya sooreera? Sinikhuma elapo ya oKanani. Muupuweleke, oKanani ti weiwo waatonko aya okhala Abrahamu, Isakhi ni Yakobe. Masi mwaha wa etala yaakhanle iwe, Yakobe ni emusi awe, yaahithaama arowaka wEjiitu. Vano, moophiyeryaka iyaakha 216 soovira, Moise onnaahoolela anaIsarayeli ohokolowela oKanani. Awo yaahiphiya opuro wa mothakoni wiihaniwa oKadexi.

Atthu ootakhala tanikhala elapo ya oKanani. Siiso Moise onnaarumiha anamahottela 12, ni onaahimeerya wira: ‘Mwaawehe atthu akavii anikhala iwe ni moota sirya aya ikuruu saya. Mwawehe akhala wira etthaya ti yooloka oruwerya ipyo. Nto muhiliyale oruuha mihokorokho sikina.’

Vaavo anamahottela vanihokolowela aya oKadexi, awo annimuleela Moise wira: ‘Elapo eyo ti yooreera tthiri.’ Nto wira attittimiherye, awo annimooniherya Moise mihokorokho sikina. Masi 10 aanamahottela anihimya wira: ‘Atthu anikhala iwe taalupale ni aikuruu. Hiyo ninrowa wiiviwa akhala wira nnimweererya okuxa elapo ele.’

AnaIsarayeli arii oowoova vaavo vaniiwa aya ela. ‘Fataari waari okhwela wEjiitu aahiiso hataa mothakoni-mu,’ awo annihimya. ‘Hiyo ninrowa wiiviwa mukhottoni, nto axaarihu ni aniihu anrowa ovariwa. Nrowee nimuthanle muhooleli a niinano mu nipuro na Moise, nto nihokolowele wEjiitu.’

Masi anli aanamahottela aniroromela wa Yehova, nto aneererya waamaaliha atthu awo. Masina aya ti Yoxuwa ni Kalebi. Awo anihimya wira: ‘Muhikhale oowoova. Yehova orii ni hiyo. Vanrowa okhala vookhweya okuxa elapo.’ Masi atthu awo khaniiwelela. Awo aniphavela-tho omwiiva Yoxuwa ni Kalebi.

Ela ennimwiiriha Yehova okhala oonanariwa vanceene, nto onnimuleela Moise wira: ‘Khuuvo mutthu a iyaakha okhuma 20 orowa ohoolo onrowa okela elapo ya oKanani. Awo aaweha mitikiniho seiyo sipanke aka wEjiitu ni mothakoni, masi nlelo khankiroromela. Siiso awo anrowa weettaka puree mothakoni-mu mu iyaakha 40 mpakha okhwa mutthu ookiserya. Paahi Yoxuwa ni Kalebi tanrowa okela mu elapo ya oKanani.’

Mothakoni 13:1-33; 14:1-38.



Makoho

  • Nrii sai niphara na uuva nnoona anyu valataratoni va, nto ninkhuma woowi?
  • Nthowa xeeni Moise vanaarumiha awe anamahottela 12 orowa elapo ya oKanani?
  • Anamahottela anihimya exeeni vaavo vanittikiha aya muhupi wa Moise?
  • Moota xeeni anamahottela anli anooniherya aya omuroromela Yehova, nto masina aya tanii?
  • Nthowa xeeni Yehova oninanariwa awe, ni onimuleela exeeni Moise?

Makoho oowuncererya

  • Mmusome Mothakoni 13:1-33.

    Tanii yaathanliwe wira yahottele elapo, nto eparakha xeeni yuulupale yaarina aya? (Moth 13:2, 3, 18-20)

    Nthowa xeeni moonelo a Yoxuwa ni Kalebi aary’awe oovirikana ni anamahottela akina, ni ela enniixuttiha exeeni? (Moth 13:28-30; Mat 17:20; 2 aKor 5:7)

  • Mmusome Mothakoni 14:1-38.

    Yoolopola xeeni enitthuneya ahu ovaha ephoole voohimya sa owaapa ahooleli a vathii a Yehova? (Moth 14:2, 3, 27; Mat 25:40, 45; 1 aKor 10:10)

    Moota xeeni Mothakoni 14:24 onooniherya awe wira Yehova onnimucalela khuta mmosaa a arumeyi awe? (1 Mam 19:18; Mir 15:3)