Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 36: Mwaanyompe A Eweero

Mwaha 36: Mwaanyompe A Eweero

OH! EXEENI enipaka aya atthu awo vano? Awo aninvekela mwaanyompe! Nthowa xeeni aniira aya ela?

Vaavo Moise vanikhala awe omwaako okathi munceene, atthu anihimya wira: ‘Khansuwenle emukhumelenle Moise. Siiso nrowee nimpake muluku wira onihooleleke okhuma elapo ela.’

Moise onirihela vathi maluku ale manli

‘Aayo,’ onnihimya Aroni munnawe Moise. ‘Murulee ibrinku sanyu sa eweero ni muruuhe wa miyo.’ Vaavo atthu vaniira aya siiso, Aroni onnitotoxa ni onnimpaka mwaanyompe a eweero. Nto atthu anihimya wira: ‘Ola Muluku ahu, yoowo onikuminhe elapo ya wEjiitu!’ Nuumala vo anaIsarayeli annikhalana efesta yuulupale, ni annimukokhorela mwaanyompe a eweero.

Vaavo Yehova vaniweha awe ela, onninanariwa vanceenexa. Siiso owo onnihimya wa Moise: ‘Mwaakuveke ni mukhuruwe. Atthu anivara etthu yootakhalexa. Awo aaliyala malamulo aka ni animuuramela mwaanyompe a eweero.’

Atthu animukokhorela mwaanyompe a eweero

Moise aahikhuruwa omwaako mowaakuveya. Nto vaavo vanaattamela awe, ela ti etthu enoona awe. Atthu awo animwiipa ni wiina moomurukurerya mwaanyompe a eweero! Moise onninanariwa vanceenexa nto onnirihela vathii maluku manli oophapateya yaale yaarina malamulo, nto ala yaahiphweeya apakeya ipetaasu sinceene. Nuumala vo owo onnimukuxa mwaanyompe a eweero ni onnimutotoxa. Nto onnimunyakatta ni ompaka ntthupi.

Atthu awo yaahipaka etthu yootakhalexa. Siiso Moise onaaleela alopwana akina wira akuxe ikatana saya. ‘Atthu ootakhala yaawo yaamukokhorenle mwaanyompe ahaana okhwa,’ onnihimya Moise. Siiso-nto alopwana awo anniwiiva atthu 3.000! Ela khenooniherya wira nintthuneya okhala a ephoole wira nimukokhoreleke Yehova paahi, ohiya amuluku ari otheene oowoka?

Okhuma 32:1-35.



Makoho

  • Valataratoni va, atthu anipaka exeeni, ni nthowa xeeni?
  • Nthowa xeeni Yehova vananariwa awe, ni exeeni Moise enipaka awe vaavo vanoona awe ele atthu eniira aya?
  • Exeeni Moise enaaleela awe alopwana akina wira apakee?
  • Mwaha ola waatthuneya oniixuttiha exeeni?

Makoho oowuncererya

  • Mmusome Okhuma 32:1-35.

    Moota xeeni yoohimya ela enooniherya aya muupuwelelo a Yehova voohimya sa otakaaha okokhorela woowoka ni wekeekhai? (Okhum 32:4-6, 10; 1 aKor 10:7, 11)

    Ephoole xeeni maKristau enitthuneya aya okhalana mu othanla waya otthekula, mmwaha wa wiipa ni wiina? (Okhum 32:18, 19; aEf 5:15, 16; 1 Yoh 2:15-17)

    Moota xeeni nihimo na Levi nivanha aya ntakiheryo noolokexa mu waakiherya exariya? (Okhum 32:25-28; Sal 18:26)