Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 29: Nthowa Naya Moise Onitthyaw’awe

Mwaha 29: Nthowa Naya Moise Onitthyaw’awe

MUNWEHEKE Moise owo onitthyawa wEjiitu. Munniwerya waaweha alopwana awo animoomola? Nyuwo munnisuwela nthowa naya aniphavela aya omwiiva Moise? Nrowee niwehee akhala wira nnoophwanya nthowa naya.

Moise onnitthyawa wEjiitu

Moise annuwenle vatthokoni va Farawoo, namalamulela a wEjiitu. Moise aahikhala mutthu a miruku ni muulupale. Moise aahisuwela wira khahiyo aari mwEjiitu, masi axitiithi awe eekeekhai yaari ipottha anaIsarayeli.

Nihiku nimosaa, vaavo aarinaawe iyaakha 40, Moise aahilakela orowa oweha moota atthu awe saarya aya. Waari wootakhalexa moota awo waathokoreriwa aya. Aahimoona mwEjiitu omanaka epottha emosaa muIsarayeli. Moise aahiwehaweha nno ni nno, nto vaavo vahaamoonalya awe mutthu ori otheene onwehaka, owo aahimmana mwEjiitu, nto mwEjiitu aahikhwa. Nuumala vo Moise aahivitha murutthu ole vamihaavani.

Nihiku noottharelana Moise aahirowa-tho waaweha atthu awe. Uupuwelela wira anwerya waakhaliherya wi awo ahikhale-tho ipottha. Masi owo aahiwoona alopwana anli aIsarayeli awanaka, siiso Moise aahimuhimeerya mmosaa a yaawo yoowo aatthenke: ‘Munimmanelani munninyu?’

Mulopwana owo aahihimya wira: ‘Panii oopankeni okhala namalamulela ni namaphukela ahu? Nyuwo mumphavela okiiva ntoko siiso simwiivalya anyu mwEjiitu ole?’

Vano Moise aahikhala oowoova. Owo aahisuwela wira atthu aasuwela yeele yaamwiirinha awe mwEjiitu. Hataa Farawoo aahiiwa ela, nto aahaarumiha atthu wira amwiive Moise. Nna nthowa naya Moise aatthuneya awe otthyawa wEjiitu.

Vaavo Moise vaakhumme awe wEjiitu, owo aahirowa otteiwene elapo ya oMadiyani. Iwe aahikumana ni emusi ya Yeethoro, nto aahimuthela mmosaa a mwaana mwaamuthiyana a Yeethoro iihaniwa Zeefora. Moise aahikhala makampusi ni aakhapelela ipwittipwitthi sa Yeethoro. Mu iyaakha 40, owo aahikhala elapo ya oMadiyani. Vano owo aarina iyaakha 80. Nuumala vo nihiku nimosaa, vaavo Moise vaakhapelela awe ipwittipwitthi sa Yeethoro, yaahiiraneya etthu emosaa yootikiniha yaarukununxe okumi wotheene wa Moise. Mukhunule epaaxina eyo, nto nrowee niwehee etthu ela yootikiniha tanii.

Okhuma 2:11-25; Miteko 7:22-29.



Makoho

  • Moise annuwenle wuuwi, masi exeeni aasuwenly’awe sa axitiithi awe?
  • Exeeni Moise yaavanry’awe vaavo vaarina awe iyaakha 40?
  • Exeeni Moise yaahimmye awe wa mulopwana muIsarayeli yoowo aawana, ni aakhunle sai mulopwana owo?
  • Nthowa xeeni Moise vaatthyanw’awe wEjiitu?
  • Moise aatthyawenle wuuwi, ni tanii aakumanne awe iwe?
  • Moise aavanre exeeni eriyari ya iyaakha 40 nuumala otthyawa wEjiitu?

Makoho oowuncererya

  • Mmusome Okhuma 2:11-25.

    Nnaamwi Moise iixuttihiwe iyaakha sinceene osuwela wotheene wa atthu a wEjiitu, moota xeeni oonihenrya awe ororomeleya wa Yehova ni wa nloko nawe? (Okhum 2:11, 12; aHeb 11:24)

  • Musome Miteko 7:22-29.

    Exeeni eniwerya ahu wiixutta mwaha wa Moise weererya mekhaweruu omoopola Isarayeli weepotthani wEjiitu? (Mit 7:23-25; 1 Ped 5:6, 10)