Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 28: Moota Woopolinwa Awe Mwaana Moise

Mwaha 28: Moota Woopolinwa Awe Mwaana Moise

MUNWEHEKE mwaana mwaamukhaani owo oninla, ni onvarela ekatha ya mwali. Ola ti Moise. Nyuwo munnimusuwela mwali owo ooreera tanii? Ola pwiyamwene a wEjiitu, mwaana mwaamuthiyana a mwaneene Farawoo.

Moise onnittottiwa ni mwaana mwamuthiyana a Farawo

Maama awe Moise aahinvitha mwanawe mpakha okhalana miyeeri miraruu, okhala wira khaaphavela wira iiviwe ni atthu a wEjiitu. Masi maama awe aahisuwela wira Moise anwerya ophwanyiwa, ela ti etthu yaapanka awe wira omoopole.

Aahikuxa nivuku ni aahilokiherya wira maasi ahiweryeke okela. Nuumala vo aahimuhela Moise munivukuni mmo, ni khikuhaka nivuku nne mmalaxini oorakama muxerexere mwa Muroo Nilo. Murokorawe Moise, Miryamu, aahileeliwa wira eemele vakhivuru ni wira oona yeele yaarowa wiiraneya.

Moohipisa mwaana mwaamuthiyana a Farawoo aahikhuruwa orwaaka oMuroo Nilo wira orape. Mootutuxerya owo aahoona nivuku mmalaxini oorakama. Owo aahimwiihana mmosaa aaximwali yaamurumeela: ‘Mukiruuhele nivuku nne.’ Vaavo pwiyamwene vaakhununlya awe nivuku, moota orya awe ooreera mwaana aamoonalya awe! Mwaana owo Moise aamunla, nto pwiyamwene aahimoonela othunku. Owo khaaphavela wira iiviwe.

Nuumala vo Miryamu aahirwa. Nyuwo munoowerya onweha owo valataratoni. Miryamu aahimukoha mwaana mwaamuthiyana a Farawoo wira: ‘Kiroweke owiihanelani muthiyana muIsarayeli wira owaamwiheryeni mwaana ola?’

‘Xontte mwiire siiso,’ aahihimya pwiyamwene owo.

Siiso Miryamu aahitthimakasa mowaakuveya wira aaleele amamawe. Vaavo vanirwa awe maama awe Moise wa pwiyamwene, pwiyamwene owo onii: ‘Mmukuxe mwaana ola ni mwakaamwiherye, nto miyo kinrowa woolivani.’

Siiso maama awe Moise aahimuhuwa mwanawexa. Vattuli vaya vaavo Moise vannunwa awe moophiyerya, aahimuroiha wa mwaana mwaamuthiyana a Farawoo, yoowo aampanke awe okhala ntoko mwanawexa. Ola moota yoowo Moise sannunwa awe vatthokoni va Farawoo.

Okhuma 2:1-10.



Makoho

  • Tanii mwaana ola valataratoni, ni ekatha ele evarenly’awe tiyawani?
  • Maama awe Moise aapankenii wira Moise ohiiviwee?
  • Mwaaruusi ola valataratoni tanii, ni exeeni yaapanke awe?
  • Vaavo mwaana mwaamuthiyana a Farawoo vamphwannya awe mwaana owo, Miryamu aahimmye exeeni?
  • Exeeni pwiyamwene yaahimmye awe wa maama awe Moise?

Nikoho nowuncererya

  • Mmusome Okhuma 2:1-10.

    Okathi xeeni wooreerela waarina awe maama awe Moise wira omulakiherye ni omwiixuttiha Moise okathi wa onamwane awe, ni ntakiheryo xeeni ninvaha awe wa axitiithi olelo? (Okhum 2:9, 10; Otum 6:6-9; Mir 22:6; aEf 6:4; 2 Tim 3:15)