Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 24: Yosefe Oniweehererya Annawe

Mwaha 24: Yosefe Oniweehererya Annawe

YOSEFE oniphavela osuwela akhala wira axuulupale awe 10 nlelo arii ootakhala ni oohimoriwa ikharari. Siiso owo onii: ‘Nyuwo mwaanamahottela. Nyuwo murweenle osuwela mapuro ootteettheya a elapo ahu.’

Awo anihimya so: ‘Nnaari, khanihiyoo.’ ‘Hiyo nrii atthu oororomeleya. Otheene ahu nrii anna. Hiyo naari 12. Masi munnihu mmosaa kokhanle-tho, nto ookiserya oyeva orii owaani ni tiithi ihu.’

Yosefe onoothererya ohaakupali awosa. Owo onimuhela mukhatteya munna oniihaniwa Simeyoni, nto onnaahiya akina okuxa yoolya ni orowa owaani. Masi owo onnaahimeerya awosa: ‘Vaavo vanitthika anyu, muhaana omurwaana munnihu ookiserya oyeva.’

Vaavo vanihokolowela aya owaani oKanani, anna awo animuleela tiithi aya Yakobe etthu eri yotheene yiiranen’ye. Yakobe orii ooriipiwa murima vanceene. ‘Yosefe kokhanle-tho,’ owo onninla, ‘nto vano Simeyoni kokhanle-tho. Nkinoohiyani mmukuxaka mwanaka ookiserya oyeva Beniyamini.’ Masi vaavo yoolya aya vanipacerya aya omala, Yakobe onnaahiya amukuxaka Beniyamini orowa wEjiitu siiso awo anoowerya ophwanya yoolya ekina.

Vano Yosefe onnaaweha annawe arwaaka. Owo orii oohakalala vanceene onweha munnawe mukhaani Beniyamini. Tthiri, khuuvo mmosaa a yaawo onisuwela wira mutthu ola ootthuneya ti Yosefe. Vano Yosefe onnipaka etthu wira oweehererye annawe 10.

Owo onaaruma arumeyi awe wira asaryee yoolya mirupa saya. Masi voohaasuweliha awosa, owo nave-tho onnirumiha oheliwa mmurupani mwa Beniyamini ekoopho awe ya eparatha ya vameekh’aya. Nuumala okhuma otheene aya ni weetta erakamelo vakhaani, Yosefe onnaaruma arumeyi awe waatthimakela awosa. Vaavo awo vanaaphwanya aya awosa, arumeyi awo anihimya so: ‘Mwiiyenryenii ekoopho ya eparatha ya pwiyahu?’

Anna awo otheene anihimya so: ‘Hiyo khiniiyale ekoopho awe.’ ‘Akhala wira nyuwo munomphwanyana ekoopho eyo mmosaa a hiyo, mutthu owo iiviwe.’

Siiso arumeyi awo annihaayasa mmirupani sotheene, nto awo anniphwanya ekoopho eyo mmurupani mwa Beniyamini, ntoko siiso sinoona anyu va. Arumeyi awo anihimya so: ‘Nyuwo akina murowaseke, masi Beniyamini ohaana ohokolowa ni hiyo.’ Vano exeeni enrowa aya opaka annawe akina 10?

Otheene aya ni Beniyamini annihokolowela owannyawe Yosefe. Yosefe onnaaleela annawe: ‘Otheene sanyu murowaseke owaani, masi Beniyamini ohaana ohala va ntoko epottha aka.’

Yuda onnaakiha oriki: ‘Akhala wira kinihokolowela owaani voohikhala mmiravo ola, tiithi aka onimookhwa okhala wira onnimphenta vanceene. Siiso xontte, mukikuxe miyo kikhalee epottha anyu, masi mmuhiye mmiravo ola wira orowee owaani.’

Yosefe onniwerya woona wira annawe aattharuwa. Awo khahiyo-tho ootakhala ni oohioriwa ikharari. Nrowee noone yeeyo Yosefe enipaka awe vano.

Maphattuwelo 42:9-38; 43:1-34; 44:1-34.

Annawe Yosefe animootheriwa


Makoho

  • Nthowa xeeni Yosefe vaniwootherya awe annawe okhala anamahottela?
  • Nthowa xeeni Yakobe vanimuhiya awe mwanawe mwaamulopwana ookiserya oyeva, Beniyamini, orowaka wEjiitu?
  • Ekoopho ya eparatha ya Yosefe yaakenle sai mmurupani mwa Beniyamini?
  • Exeeni Yuda eniphavela awe opaka wira otaphuliwe Beniyamini?
  • Annawe Yosefe yoonihenrye sai wira yaahittharuwa?

Makoho oowuncererya

  • Musome Maphattuwelo 42:9-38.

    Moota xeeni masuu a Yosefe mu Maphattuwelo 42:18 ary’aya ntakiheryo noolokexa waale arina muritti mmulokiheryo a Yehova olelo? (Neh 5:15; 2 aKor 7:1, 2)

  • Musome Maphattuwelo 43:1-34.

    Nnaamwi Rubeni aari oopacerya oyariwa, vanooneya sai wira Yuda taahoolela olavula wa annawe? (Maph 43:3, 8, 9; 44:14, 18; 1 Wah 5:2)

    Moota xeeni Yosefe seeherenrya awe annawe, ni nthowa xeeni? (Maph 43:33, 34)

  • Musome Maphattuwelo 44:1-34.

    Ntoko mpantta wa yowoothererya ovitha osuwanyeya wawe wa annawe, Yosefe iixoonihenrye sai? (Maph 44:5, 15; Onam 19:26)

    Yoonihenrye sai annawe Yosefe wira mukhalelo waarina aya khalai woomukhalela nrima munna aya yaahihiya vano? (Maph 44:13, 33, 34)