Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 22: Yosefe Onikuhiwa Mukhatteya

Mwaha 22: Yosefe Onikuhiwa Mukhatteya

YOSEFE orina paahi iyaakha 17 vaavo onikuxiwa awe okuruxeriwaka wEjiitu. Iwe onnitumiheriwa mulopwana mmosaa iihaniwa Potifari. Potifari oninvarela muteko mwene a wEjiitu, yoowo oniihaniwa Farawoo.

Yosefe oriheliwe mukhatteya

Yosefe oninvarela moohaawela muteko pwiy’awe, Potifari. Siiso vaavo Yosefe vaninnuwa awe, Potifari onnimukuha owo okhala ooweherya a etthoko awe yotheene. Nto, nthowa xeeni, Yosefe varya awe mukhatteya-mu? Nthowa na mwaara a Potifari.

Yosefe onninnuwa onakhala mulopwana ooreera saana, nto mwaara a Potifari omphavela wira orupe n’uwo. Masi Yosefe onnisuwela wira ela ti yoottheka, nto owo khaaphavela wiira ela. Mwaara a Potifari orii oonanariwa vanceene. Siiso vaavo iyawe vaniphiya awe owaani, ola onnimootherya oriki: ‘Mutakhali ole Yosefe oheererya wira orupe ni miyo!’ Potifari onnimukupali mwaarawe, nto owo orii oonanariwa vanceene ni Yosefe. Siiso onnirumiha oriheliwa mukhatteya.

Mulopwana oniweherya ekhatteya niinanoru onnoona wi Yosefe orii mutthu ooloka. Siiso owo onnimukuha okhala ooweherya wa alipa ootthukiwa akina otheene. Valokenle ene Farawoo onninanariwa ni namavahererya soowurya ni onooxa iphaawu, ni onaakuhasa mukhatteya. Ohiyu omosaa khuta mmosaa a yaawo onnikhalana oloha wa vameekh’aya, masi awo khanisuwela yootaphulela ya oloha waya. Nihiku noottharelana Yosefe onihimya wira: ‘Nkakileeleni oloha wanyu.’ Nto vaavo awo vanihimya aya, Yosefe, okhaliheriwaka ni Muluku, onnaalakiherya yootaphulela ya oloha waya.

Wa namavahererya soowurya, Yosefe onihimya so: ‘Mmahiku mararuu nyuwo munrowa otaphuliwa mukhatteya, nto nyuwo munrowa otthikela okhala namavahererya soowurya a Farawoo vasyaa-tho.’ Siiso Yosefe onnincererya oriki: ‘Vaavo nyuwo vanikhumela anyu otaa, mmuleele Farawoo voohimya sa miyo, nto mukikhaliherye okhumela otaa nipuro nna.’ Masi wa onooxa iphaawu, Yosefe onihimya so: ‘Mmahiku mararuu paahi Farawoo onoorumiha okwasiwa muruu anyu.’

Mmahiku mararuu yaahiiraneya tthiri ntoko Yosefe saahimmya awe. Farawoo aahirumiha okwasiwa muruu wa onooxa iphaawu. Vano, namavahererya soowurya, onnitaphuliwa mukhatteya onapacerya omurumeela mwene vasyaa-tho. Masi namavahererya soowurya onniliyala sotheene voohimya sa Yosefe! Owo khaamuleelale Farawoo voohimya sa Yosefe, nto Yosefe aahaana okhala mukhatteya memme.

Maphattuwelo 39:1-23; 40:1-23.



Makoho

  • Yosefe aarina iyaakha kavii vaavo aakuxiwa awe oroihiwaka wEjiitu, ni exeeni eniiraneya nuumala ophiya iwe?
  • Nthowa xeeni Yosefe oniriheliwa awe mukhatteya?
  • Muritti xeeni Yosefe onivahiwa awe mukhatteya?
  • Ori mukhatteya, Yosefe aamuleelale exeeni namavahererya soowurya a Farawoo ni wa onooxa iphaawu?
  • Exeeni eniiraneya nuumala namavahererya soowurya okhuma mukhatteya?

Makoho oowuncererya

  • Musome Maphattuwelo 39:1-23.

    Okhala wira khivaakhanle nlamulo na Muluku noolempwa naakhoottiha oraruwa mmahiku a Yosefe, exeeni yaamwiirinhe Yosefe omutthyawa mwaara a Potifari? (Maph 2:24; 20:3; 39:9)

  • Musome Maphattuwelo 40:1-23.

    Mowaakuveya muhimye oloha wa namavahererya soowurya ni yootaphulela aya yeeyo Yehova yaamusuwelinha awe Yosefe. (Maph 40:9-13)

    Oowooxa iphaawu aalohenrye exeeni, nto yaataphulelanii? (Maph 40:16-19)

    Moota xeeni nikhuuru na epottha yoororomeleya ni ya miruku olelo nnitakiha aya mukhalelo a Yosefe? (Maph 40:8; Sal 36:9; Yoh 17:17; Mit 17:2, 3)

    Maphattuwelo 40:20 anooniherya exeeni wa maKristau voohimya sa wuupuwelela nihiku nooyariwa? (Mus 7:1; Mar 6:21-28)