Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 19: Yakobe Ookhalana Emusi Yuulupale

Mwaha 19: Yakobe Ookhalana Emusi Yuulupale
Yakobe ori ni anaawe

NKAWEHANI paahi emusi ela yuulupale. Alasa anamwane aaxilopwana 12 a Yakobe. Nto owo ookhalana-tho anamwane aaxithiyana. Nyuwo munnisuwela masina aanamwane awo? Nrowee niwiixutte amosaa a yaawo.

Liya aahimuyara Rubeni, Simeyoni, Levi ni Yuda. Vaavo Rakheli voonalya awe wira owo khaakhalana anamwane, ola aahiriipiwa murima vanceene. Siiso ola aahimunnya murumeyi awe Biliha wa Yakobe, nto Biliha aahikhalana anamwane anli yiihaniwa Dani ni Nefetali. Nuumala vo Liya nave-tho aahimunnya murumeyi awe Ziilipa wa Yakobe, nto Ziilipa aahimuyara Gadi ni Axeri. Wanikisa waya Liya aahikhalana anamwane aaxilopwana anli akina, Isakari ni Zabuloni.

Wanikisa waya Rakheli aahiwerya omuyara mwaana. Aahinvaha nsina na Yosefe. Muhoolo hiyo ninrowa wiixutta sikina voohimya sa Yosefe, okhala wira owo aahikhala mutthu ootthuneya vanceene. Alasa yaari anamwane aaxilopwana 11 yaawo Yakobe yaayanrya awe okhalaka ni Labano tiithi awe Rakheli.

Yakobe nave-tho aahikhalana anamwane akina aaxithiyana, masi Biibiliya onihimya nsina nimosaa paahi na awo. Nsina nawe naari Dina.

Okathi waahiphiya vaavo Yakobe aathanlalya awe omuhiya Labano ni otthikela oKanani. Siiso owo aahithukumanya emusi awe yuulupale ni nikoto nuulupale na ipwittipwitthi ni na inyompe, nto aahipacerya weetta mukwaha woorakama.

Okathi vakhaani vattuli va Yakobe ni emusi awe ophiya oKanani, Rakheli aahimuyara mwaana mukinaku mwaamulopwana. Ela yiiranen’ye nlelo awo ari vamukwahani. Rakheli aahikhalana okathi wa muxankiho, nto wanikisa waya owo aahikhwa oyaraka. Masi mwaana mwaamukhaani owo aari mukumi. Yakobe aahinvaha nsina na Beniyamini.

Nimphavela wuupuwelela masina aanamwane aaxilopwana 12 a Yakobe, okhala wira nloko notheene na Isarayeli ninrwa wa awosa. Mwekeekhai, mahimo 12 a Isarayeli aniihaneliwa masina aanamwane aaxilopwana 10 a Yakobe ni anamwane aaxilopwana anli a Yosefe. Isakhi aahikhala iyaakha sinceene nuumala oyariwa anamwane ala otheene, nto ela yaahimwiiriha okhala oohakalala mwaha wa okhalana axisulw’awe anceene. Masi nrowee noone yeele yaamwiiranenle Dina musulw’awe.

Maphattuwelo 29:32-35; 30:1-26; 35:16-19; 37:35.



Makoho

  • Taavi yaari masina aanamwane aaxilopwana athanuu na mmosaa a Yakobe yaawo yaayanry’awe ni mwaarawe oopacerya, Liya?
  • Anamwane xeeni aaxilopwana anli a Yakobe yaayariwe ni Ziilipa murumeyi muthiyana a Liya?
  • Taavi yaari masina aanamwane aaxilopwana anli a Yakobe yaayariwe ni Biliha murumeyi muthiyana a Rakheli?
  • Anamwane xeeni aaxilopwana anli Rakheli yaayanry’awe, masi exeeni yiiranen’ye vaavo mwaana mwaamulopwana a nenli vaayariwa awe?
  • Moovarihana ni elatarato, anamwane akavi aaxilopwana Yakobe yaarina awe, ni exeeni yaakhumme mwa awo?

Makoho oowuncererya

  • Musome Maphattuwelo 29:32-35; 30:1-26 ni 35:16-19.

    Ntoko sooniheriwa aya mmwaha wa anamwane aaxilopwana 12 a Yakobe, khalai ikwaha sinceene yiitthaniwa sai amiravo ale aaHeberi?

  • Musome Maphattuwelo 37:35.

    Nnaamwi Biibiliya omuhimyaka paahi Dina, hiyo ninsuwela sai wi Yakobe aahikhalana anamwane akina aaxithiyana? (Maph 37:34, 35)