Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Eliivuru Aka ya Miyaha sa Biibiliya

Mwaha 16: Isakhi Onnimphwanya Mwaarawe Ooloka

Mwaha 16: Isakhi Onnimphwanya Mwaarawe Ooloka

NYUWO munnimusuwela muthiyana ola tanii ori valataratoni-va? Nsina nawe ti Rebeka. Nto mulopwana onrwa awe okumana ti Isakhi. Ola onrowa okhala mwaarawe. Ela yiiranen’ye sai?

Saana, Abrahamu tiithi awe Isakhi aaphavela omphwanya muthiyana ooloka wa mwanawe. Khaaphavela wira Isakhi omuthele mmosaa a athiyana a oKanani, okhala wira atthu ala yaakokhorela amuluku oowoka. Siiso Abrahamu aahimwiihana murumeyi awe ni aahihimya wira: ‘Kiniphavela wira nyuwo mutthikele iwee onikhala amusi aka oHarani ni mwamuhaayerye muthiyana mwanaka Isakhi.’

Moohipisa murumeyi a Abrahamu aahikuxa ikamelo mulokoo ni aahipaka mukwaha oorakama. Vaavo owo vaaphiiya awe vakhiviru ni opuro waakhala amusi a Abrahamu, owo aaheemela veehimeni. Vaari makaaripi nsuwa nikumpheene, okathi yoowo athiyana a muttetthe ole onrwa aya orika maasi veehimeni. Siiso murumeyi a Abrahamu aahihimya munivekelo wa Yehova iiraka: ‘Mwiirihe wi muthiyana yoowo onkivaha maasi miyo ni ikamelo iya okhalee muthiyana yoowo omuthanlalya anyu wira okhalee mwaarawe Isakhi.’

Rebeka onikumana ni Isakhi

Niinanoru Rebeka aahirwa wira orike maasi. Vaavo murumeyi vanvekenlya awe maasi, owo aahinvaha. Nuumala vo aahirowa ni aahirika maasi oophiyerya ikamelo sotheene soovoliwa ntthona. Owo aari muteko muulupale okhala wira ikamelo sinniwurya maasi manceenexa.

Vaavo Rebeka vaamalinha awe opaka ela, murumeyi a Abrahamu aahimukoha owo nsina na atithi awe. Nave-tho owo aahiveka akhala wira vanweryaneya orupa owannyeya. Owo aahaakhula wira: ‘Tiithi aka ti Betuweli, nto yookhala ekwaartu wa nyuwo wira mukhalee ni hiyo.’ Murumeyi a Abrahamu aahisuwela wira Betuweli aari mwaana a Nahori munnawe Abrahamu. Siiso owo aahikhoromela vathii ni aahimuxukhurela Yehova mwaha w’omuthoonyiherya amusi awe Abrahamu.

Ohiyu ole murumeyi a Abrahamu aahimuleela Betuweli ni Labano munnawe Rebeka mwaha waarwenlya awe. Oowanli ayasa yaaheemererya wira Rebeka oroweke ni atheliwe ni Isakhi. Aahimmyeni Rebeka emaara aakohinwa awe? Owo aahihimya wira: ‘Aayo,’ owo aaniphavela orowa. Siiso mmeeloni mwaya awo yaahiwela ikamelo ni yaahipacerya mukwaha woorakama wootthikela oKanani.

Vaavo vaaphiiya aya, yaari epanyaale. Rebeka aahimoona mulopwana eetta mmatta. Owo aari Isakhi. Owo aahihakalala omoona Rebeka. Sara maama awe iira okhwiiyeene iyaakha tthaaru paahi soovira, nto Isakhi nlelo aari ooriipiwa murima mwaha wa ela. Masi vano Isakhi aahimphenta vanceene Rebeka, nto aahihakalala vasyaa-tho.

Maphattuwelo 24:1-67.



Makoho

  • Tanii mulopwana owo ni muthiyana ari valataratoni?
  • Abrahamu aapanke exeeni wira omuhaaye muthiyana wi otheliwe ni mwanawe, nto nthowa xeeni?
  • Naakhuliwe sai nivekelo na murumeyi a Abrahamu?
  • Aakhunle sai Rebeka vaavo vaakohiwa awe akhala wira aaniphavela otheliwa ni Isakhi?
  • Exeeni yaamwiirinhe Isakhi ohakalala vasyaa-tho?

Makoho oowuncererya

  • Musome Maphattuwelo 24:1-67.

    Mikhalelo xeeni sooreerexa saanihenrya awe Rebeka okathi waakumanne awe ni murumeyi a Abrahamu veehimeni? (Maph 24:17-20; Mir  31:17, 31)

    Malokiheryo a Abrahamu a othela wa Isakhi, anivaha ntakiheryo xeeni nooreerexa wa maKristau olelo? (Maph 24:37, 38; 1 aKor 7:39; 2 aKor 6: 14)

    Nthowa xeeni vanitthuneya ahu ophwanya okathi wa wuupuwelela, ntoko siisaale Isakhi siiralya awe? (Maph 24:63; Sal 77:12; aFil 4:8)

MWIIXUTTE SIKINA

MUWIIXUTTIHE ANIINYU

Rebeka Aahiphavela Omuhakalaliha Yehova

Ninrowa omutakiha sai Rebeka? Musome mwaha ola ni mwiixutte voohimya sa yena.